மோடி அரசு செய்த "அந்த" ஒரு தவறு.. மாணவர் போராட்டம் பெரிதாக வெடிக்க காரணம் இதுதான்! முக்கிய தகவல்
டெல்லி: மத்திய அரசுக்கு இப்போது நீட் மாணவர் போராட்டம் பெரிய தலைவலியாக மாறியுள்ளது. இந்த போராட்டத்தை முடிவுக்கு கொண்டு வர மத்திய அரசு பல்வேறு நடவடிக்கைகளை எடுக்கிறது. இருந்தபோதிலும், அதற்கு எந்தவொரு பலனும் கிடைப்பதாக தெரியவில்லை. ஆனால், சில வாரங்களுக்கு முன்பே இந்த போராட்டத்தை பெரிதாக விடாமல் தடுக்க மத்திய அரசிடம் சூப்பர் வாய்ப்பு இருந்தது. ஆனால், அதை அவர்கள் மிஸ் செய்துவிட்டனர் என்பதே உண்மை!
நீட் வினாத்தாள் லீக் விவகாரம் இப்போது தேசியளவில் மிக பெரிய போராட்டமாக மாறியுள்ளது. டெல்லி ஜந்தர் மந்தரில் தொடங்கிய இந்த போராட்டத்திற்கு மக்கள் ஆதரவு அதிகளவில் இருக்கிறது. நேரடியாக ஜந்தர் மந்தர் களத்திற்கே இளைஞர்கள் அதிகளவில் திரள்கிறார்கள். மேலும், நாடு முழுக்கவும் இந்த போராட்டத்திற்கு ஆதரவு அதிகரித்து வருகிறது.
நீட் போராட்டம்
இது என்டிஏ அரசுக்கு மிகப்பெரிய அரசியல் சவாலாக மாறியுள்ளது. இதன் காரணமாகவே முதலில் போராட்டத்தை கண்டு கொள்ளாத மத்திய அரசு இப்போது பேச்சுவார்த்தைக்கு வந்துள்ளது. காலையில் நீட் கேள்வித்தாள் லீக் குறித்து விசாரிக்க தனி நீதிமன்றம் அமைப்போம் என பிரதமர் மோடி நேரடியாக கூறியிருந்தார். இப்போது இளைஞர்கள் சொல்லும் இடத்திற்கே வந்து கூட பேச்சுவார்த்தைக்கு தயார் என மத்திய அரசு கூறியுள்ளது. ஆனால், உண்மையில் இந்த போராட்டம் இந்தளவுக்கு போகும் முன்பே மத்திய அரசு நினைத்திருந்தால் இதை தடுத்திருக்க முடியும்.
அதாவது நீட் கேள்வித்தாள் லீக் ஆக காரணமானவர்கள் மீது நடவடிக்கை எடுக்க வேண்டும் என்ற கோரிக்கையுடன் தொடங்கிய மாணவர் போராட்டத்தில் மத்திய கல்வி அமைச்சர் தர்மேந்திர பிரதான் ராஜினாமா முக்கிய கோரிக்கையாக இருக்கிறது. தர்மேந்திர பிரதான் ராஜினாமா செய்தால் பிரச்சினை சரியாகிவிடுமா என கேட்போருக்கு.. அவர் தார்மீக பொறுப்பேற்று ராஜினாமா செய்ய வேண்டும் என்பதே போராட்டத்தை முன்னெடுப்போரின் பதிலாக இருக்கிறது.
கிடைத்த வாய்ப்பு
கடந்த சில வாரங்களுக்கு முன்பு என்டிஏ அரசு அமைச்சரவையில் மிக பெரிய மாற்றம் வரவுள்ளதாக தகவல் வெளியானது அனைவருக்கும் நினைவில் இருக்கலாம். அதில் நிதியமைச்சர் நிர்மலா சீதாராமனுக்கு வேறு துறை வழங்கப்படும், தர்மேந்திர பிரதான் அமைச்சரவையில் இருந்து நீக்கப்படுவார் அல்லது வேறு சிறிய துறைக்கு மாற்றப்படுவார் உள்ளிட்ட பல தகவல்கள் வெளியானது. இருப்பினும், குளிர்கால கூட்டத்தொடருக்கு சில காலம் மட்டுமே இருந்ததால் அமைச்சரவை மாற்றத்தை மத்திய அரசு மேற்கொள்ளவில்லை.
மத்திய அரசின் யோசனை
மேலும், இந்த முறை அயோத்தி ராமர் கோயில் உண்டியல் திருட்டு விவகாரமே பெரிதாக வெடிக்கும் என மத்திய அரசு எதிர்பார்த்தது. இதனால் தான் அமைச்சரவை மாற்றம் செய்தால்.. எதிர்க்கட்சியினர் கேள்விகளுக்கு எதிர்கொள்ள புதிய அமைச்சர்களால் போதிய டைம் இருக்காது என அரசு நினைத்தது. இதுவும் அமைச்சரவை மாற்றத்தை தள்ளி போட முக்கிய காரணமாக இருந்தது. ஆனால், சில வாரங்களில் நிலைமை தலைகீழாக மாறிவிட்டது. அயோத்தி, ஆபரேஷன் சிந்தூர் விவகாரம் அனைத்தையும் தாண்டி நீட் போராட்டம் பெரிதாக வெடித்துள்ளது.
3 கோரிக்கைகள்
இப்போது போராடும் மாணவர்கள் 3 கோரிக்கைகளை முன்வைக்கிறார்கள். அதில் முதலாவது தர்மேந்திர பிரதான் பதவி விலகல்.! திட்டமிட்டிருந்தபடி அமைச்சரவை மாற்றம் நடந்திருந்தால் இந்த கோரிக்கை பேச்சே வந்திருக்காது. அடுத்து சோனம் வாங்சுக்கை விடுவிக்க வேண்டும் என்பது. தர்மேந்திர பிரதான் கல்வி அமைச்சகத்தில் இருந்து மாற்றப்பட்டு இருந்தால் வாங்சுக் உண்ணாவிரதம் தொடர்ந்தே இருக்காது. எனவே இதுவும் பெரிய பிரச்சினையாக மாறி இருக்காது. அடுத்து நீட் குளறுபடிகளால் உயிரிழந்த மாணவர்களின் குடும்பத்தினருக்கு ஒரு கோடி ரூபாய் இழப்பீடு வழங்குவது. இதை இப்போது கூட நிறைவேற்ற மத்திய அரசு ரெடியாகவே இருக்கிறது.
அதாவது சுருக்கமாக சொல்ல வேண்டும் என்றால் திட்டமிட்டிருந்தபடி அமைச்சரவை மாற்றம் செய்யப்பட்டிருந்தால் நிலைமை இந்தளவுக்கு மோசமாகி இருக்காது. அப்போது போராட்டம் நடந்திருந்தாலும் அது ஈஸியாக சமாளிக்கும் அளவுக்கே இருந்திருக்கும்!
Click it and Unblock the Notifications
Sign in with Google
