மருத்துவ மேற்படிப்புகளுக்கான "நீட் தேர்வு ஹால் டிக்கெட்" வெளியீடு.. டவுன்லோடு செய்வது எப்படி?

டெல்லி: எம்.டி., எம்.எஸ் மற்றும் முதுகலை டிப்ளமோ மருத்துவ படிப்புகளில் சேர்வதற்கான நீட் பிஜி தேர்வுக்கான ஹால் டிக்கெட் வெளியாகியுள்ளது. ஹால் டிக்கெட்டை தேர்வுக்கு விண்ணப்பித்தவர்கள் https://natboard.edu.in/ இந்த லிங்கை ஓப்பன் செய்து டவுன்லோடு செய்துகொள்ளலாம். நீட் பிஜி தேர்வு வரும் 23 ஆம் தேதி நடைபெற உள்ளது.

மருத்துவ படிப்புகளில் சேருவதற்கு நீட் எனும் நுழைவுத்தேர்வு நடத்தப்படுகிறது. நீட் தேர்வில் பெறும் மதிப்பெண்கள் அடிப்படையில் தான் நாடு முழுவதும் மருத்துவ மாணவர் சேர்க்கை நடைபெறுகிறது. நீட் தேர்வினால் ஏழை எளிய கிராமப்புற மாணவ மாணவிகளின் மருத்துவ கனவு சிதைந்த போகிறது என்றும் நீட் தேர்வை ரத்து செய்ய வேண்டும் என்றும் தமிழக அரசு தொடர்ந்து மத்திய அரசை உலுக்கி வருகிறது.

ஆனாலும் தமிழக அரசின் இந்த கோரிக்கைக்கு மத்திய அரசு செவி சாய்ப்பது இல்லை. இதுவரை இல்லாத அளவுக்கு இளநிலை மருத்துவ படிப்புகளுக்கான நீட் தேர்வில் பல்வேறு குளறுபடிகள் ஏற்பட்டு உள்ளன. தவறுகள் நடந்ததை மத்திய அரசே ஒப்புக் கொண்டுள்ளது. உச்ச நீதிமன்றத்திலும் நீட் தேர்வுக்கு எதிராக வழக்குகள் தொடுக்கப்பட்டுள்ளன. இந்த வழக்குகளுக்கு பதிலளிக்குமாறு உச்சநீதிமன்றமும் மத்திய அரசுக்கு உத்தரவிட்டுள்ளது.

இளநிலை மருத்துவ படிப்புகளுக்கு நடத்தப்படுவது போலவே முது நிலை படிப்புகளுக்கும் நீட் தேர்வு நடத்தப்படுகிறது. அதாவது, இளநிலை மருத்துவ படிப்புகள் மற்றும் முதுநிலை மருத்துவ படிப்புகளில் சேருவதற்கு தனித்தனியாக நீட் என்னும் தகுதித்தேர்வு தேசிய தேர்வு முகமையால் நடத்தப்பட்டு வருகிறது. இளநிலை நீட் தேர்வு பிளஸ் 2 முடித்த மாணவர்களுக்காக நடத்தப்படும்.

நீட்டில் பெறும் மதிப்பெண்கள் அடிப்படையில் இளநிலை மருத்துவ மாணவர்கள் சேர்க்கை நடைபெறும். அதேபோல நீட் பிஜி தேர்வு மூலமாக எம்.டி., எம்.எஸ் மற்றும் முதுகலை டிப்ளமோ மருத்துவ படிப்புகளில் மாணவர்கள் சேர முடியும். அந்த வகையில் நீட் பிஜி தேர்வு வரும் 23 ஆம் தேதி நடைபெற உள்ளது. இந்த தேர்வு எழுத விண்ணப்பித்த மாணவர்களுக்கான ஹால் டிக்கெட் வெளியாகியுள்ளது.

நாடு முழுவதும் முக்கிய நகரங்களில் இந்த தேர்வு நடைபெற உள்ளது. தேர்வு தொடங்குவதற்கு அரை மணி நேரம் முன்பே தேர்வு மையம் சென்றுவிட வேண்டும் என அறிவுறுத்தப்பட்டுள்ளது. ஹால் டிக்கெட்டை தேர்வுக்கு விண்ணப்பித்தவர்கள் https://natboard.edu.in/ இந்த லிங்கை ஓப்பன் செய்து டவுன்லோடு செய்துகொள்ளலாம். தேர்வு மையத்திற்கு ஹால் டிக்கெட் உடன் அடையாள அட்டையும் எடுத்துச் செல்வது அவசியம் ஆகும்.

English summary

Hall ticket for NEET PG exam for admission to MD, MS and Post Diploma medical courses has been released. Aspirants can download the hall ticket https://natboard.edu.in/ by opening this link. NEET PG exam is going to be held on 23rd.