புதிய நாடாளுமன்றம் டெல்லில இருக்கு.. அதுக்கு உள்ள இந்தியாவே இருக்கு! எந்த பொருள் எந்த மாநிலம்?

டெல்லி: பிரதமர் நரேந்திர மோடியால் இன்று திறந்து வைக்கப்படும் புதிய நாடாளுமன்றம் டெல்லியில் இருந்தாலும், கட்டமைக்க இந்தியா முழுவதிலும் இருந்து பொருட்கள் கொண்டு வரப்பட்டு உள்ளது அதை மேலும் சிறப்பாக்குகிறது.

தமிழ்நாட்டு செங்கோல்: கடந்த 1947 ஆம் ஆண்டு திருவாவடுதுறை ஆதீனத்தால் உருவாக்கப்பட்ட செங்கோல், இந்தியா சுதந்திரம் அடைந்த பிறகு ஜவஹர்லால் நேருவிடம் வழங்கப்பட்டது. உத்தரப்பிரதேசத்தின் அலகாபாத் அருங்காட்சியகத்தில் வைத்து பாதுகாக்கப்பட்டு வந்த இந்த செங்கோல் புதிய நாடாளுமன்றத்தில் மக்களவை சபாநாயகர் இருக்கை அருகே வைக்கப்பட உள்ளது.

ஔரங்காபாத் அசோகர் சிங்க சின்னம்: இந்திய தேசியக் கொடியின் மத்தியில் இருக்கும் அசோக சக்கர சின்னம், அசோகர் சிங்க சின்னத்தில் இருந்து எடுக்கப்பட்டது. அந்த அசோகர் சிங்க சின்னம் நாடாளுமன்ற வெளிப்புறத்தை அலங்கரிக்கிறது. இதனை தயாரிப்பதற்கான பொருட்கள் மகாராஷ்டிரா மாநிலம் ஔரங்காபாத் மற்றும் ஜெய்பூரில் பெறப்பட்டன. நாடாளுமன்ற வெளிப்புற அமைப்பின் பணிகள் மத்திய பிரதேச மாநிலம் இந்தூரில் செய்யப்பட்டது.

மும்பை மேஜைகள்: புதிய நாடாளுமன்றத்தில் லோக் சபா மற்றும் ராஜ்ஜிய சபா அரங்குகளுக்கான மேற்கூரைகளுக்கு பயன்படுத்தப்பட்ட எஃகு டாமன் & டையூவில் இருந்து சேகரிக்கப்பட்டு உள்ளது. குஜராத்தின் அஹமதாபாத்தில் பித்தளை வேலைகள் நடைபெற்று உள்ளன. உறுப்பினர்கள் பயன்படுத்தும் மேஜைகளும் இருக்கைகளும், அலுவலக பொருட்களும் மும்பையில் வடிவமைக்கப்பட்டு உள்ளன. கட்டிடத்தின் தரைக்கு மிர்சாபூர் கம்பளம் விரிக்கப்பட்டு இருக்கிறது.

திரிபுரா மூங்கில்: புதிய நாடாளுமன்றத்தில் மகாராஷ்டிரா மாநிலம் நாகபுரியில் இருந்து தேக்கு மரங்கள் கொண்டு வந்து பயன்படுத்தப்பட்டு உள்ளன. அதேபோல், கட்டிடத்தின் தரையில் திரிபுரா மூங்கிலும் பதிக்கப்பட்டு இருக்கிறது. வளாகத்தின் நடைபாதைக்காக ராஜஸ்தான் மாநிலம் கோட்டுபுதாலியில் இருந்து கல் திரட்டுகள் கொண்டு வரப்பட்டு இருக்கின்றன.

உபி கற்கள்: அரியானா மாநிலம் ஷார்கி தாத்ரி பகுதியில் எம் சாண்ட் தயாரிக்கப்பட்டு கட்டுமானத்துக்காக பயன்படுத்தப்பட்டு இருக்கிறது. அதேபோல் அரியானா மற்றும் உத்தரப்பிரதேச மாநிலங்களில் இருந்து இருந்து சிமெண்ட் கற்கள் பெறப்பட்டு கட்டுமானத்துக்காக பயன்படுத்தப்பட்டன. மழை நீர் வெளியேற்றத்துக்காக அகமதாபாத்தில் தயாரிக்கப்பட்ட சிமெண்ட் அகழிகள் பயன்படுத்தப்பட்டன.

English summary

Although the new Parliament to be inaugurated today by Prime Minister Narendra Modi is in Delhi, materials are being brought in from all over India to build it, making it even better.