“டாப் ஆங்கிளில்” பாருங்க.. உதயசூரியன் வடிவில் புதிய நாடாளுமன்ற இருக்கைகள்! நெட்டிசன்கள் குசும்பு

டெல்லி: பிரதமர் நரேந்திர மோடி காலை புதிய நாடாளுமன்றத்தை திறந்து வைத்து இருக்கும் நிலையில் நேற்று முந்தினம் அவர் வெளியிட்ட புதிய நாடாளுமன்றத்தின் வீடியோவில் உள்ள பருந்து பார்வை காட்சியை வைத்து அதன் இருக்கை அமைப்பு திமுகவின் சின்னமான உதயசூரியன் வடிவில் இருப்பதாக நெட்டிசன்கள் பதிவிட்டு வருகின்றனர்.

தலைநகர் டெல்லியில் பழைய நாடாளுமன்ற வளாகம் அருகிலேயே முக்கோண வடிவிலான புதிய நாடாளுமன்றத்தை கட்டும் பணி கடந்த 3 ஆண்டுகளாக நடைபெற்று வந்தது. கடந்த 2020 ஆம் ஆண்டு பிரதமர் நரேந்திர மோடி இந்த புதிய நாடாளுமன்ற பணிகளுக்காக அடிக்கல் நாட்டினார்.

இந்த நிலையில் இன்று புதிய நாடாளுமன்றத்தை பிரதமர் நரேந்திர மோடி சம்பிரதாயப்படி திறந்து வைத்து இருக்கிறார். இதற்காக இன்று காலை புதிய நாடாளுமன்றத்துக்கு வந்த பிரதமர் மோடி முன்னிலையில் ஹோம பூஜைகள் நடைபெற்றன. அதை தொடர்ந்து சிருங்கேரி மடத்தினரால் கணபதி ஹோமத்துடன் திறப்பு விழா பூஜை வேத மந்திரங்கள் முழங்க நடைபெற்றது.

அதை தொடர்ந்து தமிழில் தேவாரம், திருவாசகம் ஓதப்பட்டது. ஒரு மணி நேரம் இந்து மத வழக்கப்படி நிகழ்ச்சிகள் நடைபெற்று சம்பிரதாயப்படி நாடாளுமன்றம் திறக்கப்பட்டது. அதை மக்களவைக்குள் சென்ற பிரதமர் மோடி நெடுஞ்சான்கிடையாக செங்கோல் முன் மண்டியிட்டு மரியாதை செலுத்தினார். அதை தொடர்ந்து மக்களவை சபாநாயகர் இருக்கை அருகே செங்கோலை நிறுவினார்.

செங்கோல் நிறுவப்பட்ட பிறகு இஸ்லாம், கிறிஸ்துவம், புத்தம் உள்ளிட்ட பல மதங்களின் சார்பில் சர்வ மத பிரார்த்தனை நடைபெற்றது. முன்னதாக பிரதமர் நரேந்திர மோடி ட்விட்டரில் புதிய நாடாளுமன்ற கட்டிடத்தின் பிரம்மிப்பூட்டும் வீடியோ ஒன்றை பகிர்ந்து இருந்தார். புதிய நாடாளுமன்றத்தின் கட்டுமானம், வசதி, அழகியல் என அனைத்தும் அதில் காட்சிபடுத்தப்பட்டு இருந்தன.

டிரோன் மூலம் கழுகு பார்வையில் முக்கோன வடிவிலான நாடாளுமன்றத்தின் கட்டிடம், மக்களவை மற்றும் மாநிலங்களவை இருக்கை அமைப்புகள் காட்சிபடுத்தப்பட்டு வெளியிடப்பட்டன. இந்த நிலையில் புதிய நாடாளுமன்றத்தில் மக்களவை மற்றும் மாநிலங்களவையில் டாப் ஆங்கிளில் எடுக்கப்பட்ட காட்சியை ஸ்க்ரீன் ஷாட் எடுத்து நெட்டிசன்கள் ஷேர் செய்து வருகின்றன.

அதற்கு காரணம், அதன் இருக்கை அமைப்பை டாப் ஆங்கிளில் இருந்து பார்க்கையில் திமுகவின் சின்னமான உதயசூரியனைபோல் இருக்கிறதாம். இதனை பலர் பதிவிட்டு உள்ள நிலையில் பழைய நாடாளுமன்ற இருக்கை அமைப்புமே ஏறத்தாழ இதேபோன்றுதான் இருக்கும் என பலர் விளக்கம் அளித்து வருகிறார்கள்.

அனைத்து எம்.பிக்கள் எளிதில் இருக்கைகளுக்கு செல்லும் வகையிலும், சபாநாயகர் இருக்கை அருகே வரும் வகையில் இதுபோன்ற இருக்கை அமைப்பு பயன்படுத்தப்படுவதாக கூறப்படுகிறது. இரு அவைகளிலும் உள்ள இருக்கைகள், மேஜைகள் மற்றும் பிற அலுவலக பொருட்கள் மும்பையில் வடிவமைக்கப்பட்டு உள்ளது குறிப்பிடத்தக்கது.

English summary

While Prime Minister Narendra Modi is inaugurating the new Parliament in the morning, netizens are posting that the seating arrangement is in the shape of the DMK's symbol, the rising sun, based on the hawk's view scene in the video of the new Parliament that he released the day before yesterday.