என்னாது டெல்லியிலும் ஒரு நயாகரா நீர் வீழ்ச்சியா?.. வைரலாகும் வீடியோ

Updated: Thursday, September 2, 2021, 16:16 [IST]

Subscribe to Oneindia Tamil

டெல்லி: டெல்லியில் 12 ஆண்டுகளுக்கு பிறகு அதிகபட்சமான மழை பெய்து தலைநகரமே தண்ணீரால் மிதந்து வரும் நிலையில் இந்த மழை ஒரு செயற்கை நீர்வீழ்ச்சியை உருவாக்கியுள்ளது. இதை எல்லாரும் டெல்லியில் ஒரு நயாகரா நீர் வீழ்ச்சி என நெட்டிசன்கள் வைரலாக்கியுள்ளனர்.

தலைநகர் டெல்லியில் மழையானது வெளுத்து வாங்கி வருகிறது. அவ்வப்போது வெயில் அடித்தாலும் மழை பெய்யும் போது அதிக கனமழையை கொடுக்கிறது. இதனால் அங்கு மக்களின் இயல்பு வாழ்க்கை கடுமையாக பாதிக்கப்பட்டுள்ளது.

இடி மின்னலுடன் நகரம் முழுவதும் மழை பெய்து வருவதால் சாலைகளில் கடுமையான வெள்ளப்பெருக்கு ஏற்பட்டுள்ளது. பல்வேறு இடங்களிலும் மழை நீர் குளம் போல் தேங்கியுள்ளது.

கழிவுநீர் குழாய்

நகரில் ஆங்காங்கே கழிவுநீர் குழாயில் அடைப்பு இருந்ததால் பல இடங்களில் மழைநீரோடு கழிவுநீரும் கலந்தது. இதனால் கடுமையான போக்குவரத்து நெருக்கடி ஏற்பட்டது. நேற்று காலை 8.30 மணியுடன் முடிவடைந்த 24 மணி நேரத்தில் அதிகபட்சமாக 11.21 செ.மீ. மழை பதிவாகி இருக்கிறது.

செப்டம்பர் மாதம்

கடந்த 12 ஆண்டுகளில் இல்லாத அளவுக்கு இந்த செப்டம்பர் மாதம் மழையானது பதிவாகியுள்ளது. இன்னும் டெல்லியில் மழை நீடிக்கும். செப்டம்பர் 7 ஆம் தேதிக்கு மேல்தான் மழையானது குறையும் என வானிலை மையம் எச்சரிக்கை விடுத்துள்ளது. இதற்கு முன்பு கடந்த 2010 ஆம் ஆண்டு 11 செ.மீ. மழையும் 2020 ஆம் ஆண்டு 12.68 செ.மீ. மழையும் 1963 ஆம் ஆண்டு 17.26 செ.மீ. மழையும் பதிவாகியுள்ளது.

டெல்லியில் மழை

ஆண்டுதோறும் செப்டம்பர் மாதம் 125.1 மி.மீ மழையானது டெல்லியில் பதிவாகும். ஆனால் நேற்று ஒரே நாளில் 112.1 மி.மீ. (11.21 செமீ) மழை பதிவாகியுள்ளது என்றால் செப்டம்பர் மாதம் பெய்ய வேண்டிய மழையில் 90 சதவீதம் மாதத்தின் முதல் நாளில் பெய்து விட்டது. இதனிடையே வெள்ளத்தில் மிதக்கும் சாலைகள் குறித்த படங்கள், வீடியோக்கள் சமூகவலைதளங்களில் வைரலாகி வருகின்றன.

மழைநீர்

அந்த வகையில் டெல்லி மேம்பாலத்தில் இருந்து மழை நீர் அருவி போல் கொட்டுகிறது. இதை காருக்குள் உட்கார்ந்து கொண்டு ஒருவர் வீடியோ எடுத்து அதை வைரலாக்கியுள்ளார். இதை பார்த்த நெட்டிசன் ஒருவர் டெல்லியில் ஒரு நயாகரா நீர் வீழ்ச்சி என்கிறார். இன்னொருவர் ஆஹா இது நிஜமாகவே நீர்வீழ்ச்சி போல் இருக்கிறது என்றார். அது போல் இன்னொருவர் இது மகிழ்ச்சிக்குரிய விஷயம் அல்ல. எச்சரிக்கை தரும் விஷயமாகும் என்கிறார். இன்னொருவரோ சார் நீங்கள் நீர்வீழ்ச்சியில் குளிக்க நீச்சலடிக்க மலை மீதெல்லாம் ஏற வேண்டிய அவசியம் இல்லை. காரில் உட்கார்ந்து கொண்டே செய்யலாம் என்கிறார்.