பற்றி எரியும் பெட்ரோல் விலை.. ஓராண்டில் இல்லாத புது உச்சம்.. வெங்காயம் விலையும் விர்ர்!

டெல்லி: நாடு முழுவதும் வெங்காய விலை விண்ணைத் தொடுகிறது. நாட்டின் அனைத்து நகரங்களிலும் வெங்காயத்தின் விலை போட்டிபோட்டு ஏறிக்கொண்டு உள்ளது.

சில தினங்கள் முன்பு வெங்காயம் கிலோ ரூ .15 க்கு விற்கப்பட்டது, இப்போது அதே வெங்காயம் ரூ.80 ஐ எட்டியுள்ளது. இன்று மும்பையில் ஒரு கிலோ 75 முதல் 80 ரூபாய்க்கு விற்பனை செய்யப்படுகிறது.

சில நாட்களுக்கு முன்பு, வெங்காயம் டெல்லியில் ஒரு கிலோ ரூ .30 முதல் ரூ .40 வரை விற்கப்பட்டது. ஆனால் அங்கும் இப்போது ரூ.80 ஐ எட்டியுள்ளது.

டெல்லியில் ஒரு கிலோ 80 ரூபாய், மும்பையில் 80 ரூபாய், குருகிராமில் 80 ரூபாய், பாட்னாவில் சுமார் 70 ரூபாய், கொல்கத்தாவில் 70 முதல் 75 ரூபாய் மற்றும் சென்னையில் 60 ரூபாய்க்கு வெங்காயம் விற்பனையாகிறது.

நாசிக் நகர வர்த்தகர்கள் சிலர் அளித்த பேட்டியில், வெங்காயத்தின் விலை இப்போதைக்கு, குறையப்போவதில்லை. நாசிக் மொத்த விலை மையத்தில், குவிண்டால் ஒன்றுக்கு 4400க்கு வெங்காயம் விற்பனையாகிறது என்கிறார்கள்.

வெங்காய விலை பெரிய அரசியல் மாற்றங்களுக்கே காரணமாகியுள்ளது. அதிலும் டெல்லி மக்கள் இந்த விஷயத்தில் ரொம்பவே கோபக்காரர்கள். இந்த நிலையில், 80 ரூபாய்க்கு விற்கப்படும் வெங்காயத்தை 24 ரூபாய்க்கு வழங்குவதாக டெல்லி முதல்வர் அரவிந்த் கெஜ்ரிவால் அறிவித்துள்ளார்.

இதேபோல பெட்ரோல், டீசல் விலை ஒரு வருடத்தில் இல்லாத உச்சத்தை எட்டியுள்ளது, கடந்த இரண்டு மாதங்களில் டீசல் விலை அதிகரித்தபடியே உள்ளது. பெட்ரோல் விலை 29 பைசா உயர்ந்துள்ளது, டீசல் திங்களன்று 19 பைசா அதிகரித்துள்ளது. டெல்லியில், பெட்ரோல் லிட்டருக்கு ரூ .73.91 ஆகவும், டீசல் ரூ .66.93 ஆகவும் விற்பனை செய்யப்பட்டது.

சென்னையில் இன்று பெட்ரோல் விலை, லிட்டருக்கு ரூ.77.06 காசுகள், டீசல் விலை, லிட்டருக்கு ரூ.70.91 காசுகள் என நிர்ணயம் செய்யப்பட்டுள்ளது.

எரிபொருள் விலைகள் செப்டம்பர் 17 முதல் தொடர்ச்சியாக 7வது நாளாக உயர்ந்துள்ளன. 2018, நவம்பர் மாதத்திற்கு பிறகு முதல் முறையாக பெட்ரோல் விலை இவ்வளவு உச்சம் தொட்டது இதுதான் முதல் முறை.

English summary

Price of basic commodities like fuel and onions have skyrocketed in India.