பாகிஸ்தானின் 12வது பெரிய நகரத்திற்குள் ஏவுகணையை வீசிய இந்தியா! அங்கு என்ன இருந்தது தெரியுமா?
டெல்லி: பஹல்காம் பயங்கரவாத தாக்குதலுக்குப் பதிலடியாக இந்திய ராணுவம் நடத்திய 'ஆபரேஷன் சிந்தூர்' நடவடிக்கையில், பாகிஸ்தானின் பஹாவல்பூரில் உள்ள ஜெய்ஷ்-இ-முகமது பயங்கரவாத அமைப்பின் முக்கியத் தலைமையகம் குறிவைக்கப்பட்டு தகர்க்கப்பட்டது. பல்லாண்டுகளாக இந்தியாவிற்கு அச்சுறுத்தலாக விளங்கும் பயங்கரவாத அமைப்புகளின் வேர்களைத் தகர்க்கும் இந்தியாவின் இந்தத் தீரமான நடவடிக்கை, தேசிய பாதுகாப்பிற்கு ஒரு மிக முக்கிய வெற்றியாகப் பார்க்கப்படுகிறது.
ஏன் பஹாவல்பூர்? ஜெய்ஷ்-இ-முகமதுவின் கோட்டை
பாகிஸ்தானின் 12-வது பெரிய நகரமான பஹாவல்பூர், வெறும் ஒரு நகரம் மட்டுமல்ல; இது ஜெய்ஷ்-இ-முகமது பயங்கரவாத அமைப்பின் அதிகாரப்பூர்வ தலைமையகமாகவும், அதன் நிறுவனர் மசூத் அஸாரின் சொந்த இடமாகவும் திகழ்கிறது.
இங்குள்ள 'ஜமியா மஸ்ஜித் சுபான் அல்லாஹ்' வளாகம், உஸ்மான்-ஓ-அலி வளாகம் எனவும் அழைக்கப்படுகிறது. சுமார் 18 ஏக்கர் பரப்பளவிலான இந்த வளாகம், ஜெய்ஷ் அமைப்பிற்குப் பயங்கரவாதிகளைச் சேர்ப்பதற்கும், அவர்களுக்கு மதவெறிப் பிரச்சாரம் செய்வதற்கும், முழுமையான பயிற்சி அளிப்பதற்கும் பயன்படுத்தப்பட்டு வந்துள்ளது.
ராணுவப் பாசறைக்குச் சற்றும் குறைவில்லாமல், நீச்சல் குளம், குதிரைப் பண்ணை, உடற்பயிற்சி கூடம் என அனைத்து வசதிகளும் இங்கு இருந்தன. இந்திய உளவுத் தகவல்களின்படி, பயங்கரவாதத் தாக்குதல்களுக்கான சதித் திட்டங்கள் இங்குதான் தீட்டப்பட்டன.
மசூத் அஸார் மற்றும் ஜெய்ஷ் அமைப்பின் பின்னணி
ஜெய்ஷ்-இ-முகமது அமைப்பின் நிறுவனர் மௌலானா மசூத் அஸார், பஹாவல்பூரில் பிறந்தவர். 1999 ஆம் ஆண்டு இந்தியன் ஏர்லைன்ஸ் விமானத்தைக் கடத்தி, அதற்குப் பிணையாக விடுவிக்கப்பட்ட மூன்று பயங்கரவாதிகளில் இவனும் ஒருவன். விடுதலையான சில மாதங்களிலேயே, தீவிரவாத தியோபந்தி சிந்தனையால் ஈர்க்கப்பட்டு, ஜெய்ஷ்-இ-முகமது அமைப்பை உருவாக்கினான்.
காஷ்மீரை ஷரியா சட்டத்தின் கீழ் பாகிஸ்தானுடன் இணைப்பதை தனது முக்கிய நோக்கமாகக் கொண்ட இந்த அமைப்பு, பாகிஸ்தானின் உளவு அமைப்பான ஐஎஸ்ஐ-யின் ஆதரவுடனும், நிதியுடனும் செயல்படுவதாகப் பரவலாக நம்பப்படுகிறது.
இந்தியாவிற்கு எதிரான ஜெய்ஷ் தாக்குதல்கள்
கடந்த மூன்று தசாப்தங்களாக இந்தியாவில் நடத்தப்பட்ட பல கோரமான பயங்கரவாதத் தாக்குதல்களுக்கு ஜெய்ஷ்-இ-முகமதுவே நேரடியாகவோ மறைமுகமாகவோ பொறுப்பு:
- ஏப்ரல் 2000: ஜம்மு காஷ்மீரில் ஜெய்ஷ் நடத்திய முதல் தற்கொலைப் படைத் தாக்குதலில் நான்கு இந்திய ராணுவ வீரர்கள் கொல்லப்பட்டனர்.
- அக்டோபர் 2001: ஸ்ரீநகரில் ஜம்மு காஷ்மீர் சட்டமன்றம் மீது நடத்தப்பட்ட தற்கொலைப் படைத் தாக்குதலில் 30-க்கும் மேற்பட்டோர் கொல்லப்பட்டனர்.
- டிசம்பர் 2001: லஷ்கர்-இ-தொய்பாவுடன் இணைந்து இந்திய நாடாளுமன்றம் மீது நடத்தப்பட்ட தாக்குதல்.
- ஜனவரி 2016: பதான்கோட் விமானப் படைத் தளத் தாக்குதல்.
- செப்டம்பர் 2016: யூரி பிரிகேட் தலைமையகம் மீதான தாக்குதலில் 19 வீரர்கள் கொல்லப்பட்டனர். இதற்குப் பதிலடியாகவே இந்தியா முதன்முறையாக பாகிஸ்தான் ஆக்கிரமிப்பு காஷ்மீரில் "surgical strikes" நடத்தியது.
- பிப்ரவரி 2019: புல்வாமாவில் சிஆர்பிஎஃப் வீரர்கள் மீது நடத்தப்பட்ட தற்கொலைப் படைத் தாக்குதலில் 40 வீரர்கள் வீரமரணம் அடைந்தனர்.
- சமீபத்திய பஹல்காம் தாக்குதல்: இதுவும் ஜெய்ஷ் அமைப்பின் தொடர்புடைய குழுக்களால், லஷ்கர் அமைப்பின் உதவியுடன் நடத்தப்பட்டதாகத் தெரிய வந்துள்ளது.
பாகிஸ்தானின் கண்துடைப்பும் இந்தியாவின் பதிலடியும்
2019 புல்வாமா தாக்குதலுக்குப் பிறகு, சர்வதேச அழுத்தத்தின் காரணமாக, பாகிஸ்தான் அரசு பஹாவல்பூர் தலைமையகத்தை நிர்வாகக் கட்டுப்பாட்டில் எடுத்ததாக அறிவித்தது. ஆனால், இது வெறும் கண்துடைப்பு நாடகமே எனவும், மசூத் அஸார் பாகிஸ்தான் ராணுவத்தின் பாதுகாப்பில் அங்கேயே சுதந்திரமாக நடமாடுகிறார் எனவும் இந்திய உளவு அமைப்புகள் தொடர்ச்சியாகத் தெரிவித்து வந்தன.
பயங்கரவாதத்தின் மையப்புள்ளியாகத் தொடர்ந்து செயல்பட்டதாலேயே, பஹாவல்பூர் 'ஆபரேஷன் சிந்துர்'-இன் முக்கிய இலக்காகத் தேர்ந்தெடுக்கப்பட்டது. 4 லஷ்கர்-இ-தொய்பாவின் முரித்கே போன்ற பிற பயங்கரவாதத் தளங்களும் இத்தாக்குதலில் குறிவைக்கப்பட்டன.
இந்தியாவின் அசைக்க முடியாத உறுதி
பஹாவல்பூரில் ஜெய்ஷ் முகமதுவின் கோட்டையைத் தகர்த்ததன் மூலம், பயங்கரவாதத்திற்கு எதிரான தனது போரில் இந்தியா எந்த எல்லைக்கும் செல்லத் தயங்காது என்ற வலுவான செய்தியை உலகிற்கு அனுப்பியுள்ளது. தேசப் பாதுகாப்பு மற்றும் குடிமக்களின் நலன் காப்பதில் இந்தியா எப்போதும் பின்வாங்காது என்பதையும், பயங்கரவாதம் முற்றிலுமாக ஒழிக்கப்படும் வரை நடவடிக்கை தொடரும் என்பதையும் இந்தத் துணிச்சலான தாக்குதல் உறுதிப்படுத்தியுள்ளது.
Click it and Unblock the Notifications
Sign in with Google