மோடியும் நானும்...ரகசியத்தை பகிர்ந்த கிரில்ஸ்...2 ஆண்டுகளுக்கு பின் வைரலாகும் போட்டோ

டெல்லி : மேன் வெர்சஸ் வைல்ட் நிகழ்ச்சியில் பிரதமர் மோடியுடன் எடுத்துக் கொண்ட போட்டோ ஒன்றை தற்போது பகிர்ந்து கொண்டுள்ள பியர் கிரில்ஸ், அதன் பின்னணியில் உள்ள ரகசியத்தை பகிர்ந்துள்ளார். இந்த போட்டோ 2 ஆண்டுகளுக்கு பின் தற்போது வைரலாகி வருகிறது.

2019 ம் ஆண்டு ஆகஸ்ட் மாதம், டிஸ்கவரி சேனலில் ஒளிபரப்பாகும் மேன் வித் வைல்ட் நிகழ்ச்சியில் பிரதமர் மோடி பங்கேற்றார். அதில் நிகழ்ச்சி தொகுப்பாளர் பியர் கிரில்ஸ் உடன் பிரதமர் மோடி வனப்பகுதியில் சுற்றிய அனுபவங்கள் இடம்பெற்றன. இந்த நிகழ்ச்சியில் மோடியுடன் எடுத்துக் கொண்ட, தனக்கு பிடித்த போட்டோக்களை கிரில்ஸ் தற்போது சமூக வலைதளங்களில் பகிர்ந்துள்ளார்.

இதில், ஈரமான உடையுடன், ஆற்றங்கரையில் அமர்ந்து மோடியும், கிரில்சும் டீ குடிப்பது போன்ற போட்டோ அதிக நபர்களால் பகிரப்பட்டு, வைரலாகி வருகிறது. இந்த போட்டோவிற்கு பின் உள்ள கதையை கிரில்ஸ் சமூக வலைதளத்தில் பதிவிட்டுள்ளார்.

அந்த பதிவில், எனக்கு பிடித்த போட்டோக்களில் ஒன்று : ஈரத்துடன், இருவரும் டிஸ்கவரி ஜங்கிளில் பங்கேற்ற பிறகு பிரதமர் மோடியும் நானும் டீ குடித்த தருணம். இந்த போட்டோவின் பின்னணியில் மிதவை ஒன்று உள்ளது. அதை பிடித்துக் கொண்டு இருவரும் இருந்தோம். அவர் அதன் மீது ஏறிக் கொண்டார். நான் அவருடன் நீந்தி இருவரும் கரை சேர்ந்தோம். அவரது பாதங்கள் ஈரம் ஆகாது என இந்திய ரகசிய சேவை பிரிவினருக்கு நான் வாக்களித்திருந்தேன். ஆனால் அப்படி சரியாக நடக்க முடியவில்லை என குறிப்பிட்டிருந்தார்.

வாழ்க்கையில் மறக்காத இந்த நிகழ்ச்சி, இது போன்ற பல கதைகளையும் நான் தவறாமல் எனது சுயசரிதையில் குறிப்பிடுவேன் எனவும் கிரில்ஸ் அந்த பதிவில் குறிப்பிட்டுள்ளார். மேலும், தலைப்புக்கள் மற்றும் முகமூடிகளுக்கு பின் நாம் அனைவரும் ஒன்று தான். வனத்தில் நாம் அனைவரும் ஒன்று தான் என்பதை இந்த தருணம் நினைவூட்டுகிறது. 2 பேர் டீ குடித்து கொண்டிருப்பது மட்டும் தான் இந்த போட்டோவில் தெரியும். இதன் பின்னணியில் இருக்கும் இது போன்ற பல கதைகளை வரவிருக்கும் எனது சுயசரிதையில் மறக்காமல் குறிப்பிடுவேன் எனவும் அவர் தெரிவித்துள்ளார்.

பியர் கிரில்ஸ் உடன் உத்திரகாண்ட் தேசிய பூங்காவில் சுற்றிய அனுபவம் பற்றி மோடி கூறுகையில், நாம் இயற்கையுடன் சார்ந்து வாழ்ந்தால் எதுவும் தவறாகாது என கூறி இருந்தார். இவர்களின் இந்த அனுபவத்துடனான போட்டோ, இப்போது சமூக வலைதளங்களில் வைரலாகி வருகிறது.

English summary

Acclaimed television adventurist Bear Grylls shared one of his favourite pictures on social media and it features Prime Minister Narendra Modi.