43% அதிகரித்த முஸ்லிம்கள்..இந்திய மக்கள் தொகையில் 8% குறைந்த இந்துக்கள்.. EAC - PM ஆய்வில் தகவல்

டெல்லி: இந்தியாவில் 1950 முதல் 2015 காலக்கட்டத்தில் இந்துக்களின் மக்கள் தொகை என்பது 8 சதவீதம் வரை குறைந்துள்ளது எனவும், முஸ்லிம்களின் மக்கள்தொகை 43 சதவீதம் வரையும், கிறிஸ்தவர்களின் மக்கள்தொகை என்பது 5.38 சதவீதம் வரை அதிகரித்துள்ளதாகவும் பிரதமருக்கான பொருளாதார ஆலோசனை குழுவின் ஆய்வில் தெரிவிக்கப்பட்டுள்ளது.

உலகளவில் மக்கள்தொகை அடிப்படையில் சீனா முதலிடத்தில் உள்ளது. நம் நாடு 2வது இடத்தில் உள்ளது. நம் நாட்டின் மக்கள்தொகை என்பது தற்போது 140 கோடியை தாண்டி உள்ளதாக கூறப்படுகிறது. இதனால் மக்கள்தொகையில் சீனாவை விட இந்தியா முந்தியிருக்கலாம் என கூறப்படுகிறது.

இருப்பினும் இந்தியா தான் மக்கள்தொகையில் முதலிடம் பிடித்துள்ளது என்ற அதிகாரப்பூர்வ அறிவிப்பு என்பது வெளியாகவில்லை. இந்நிலையில் தான் பிரதமருக்கான பொருளாதார ஆலோசசனை குழு (Economic Advisory Council to the Prime minister அல்லது EAC-PM) சார்பில் மக்கள்தொகை குறித்த ஆய்வு மேற்கொள்ளப்பட்டது. மொத்தம் 167 நாடுகள் அடிப்படையில் இந்த ஆய்வு மேற்கொள்ளப்பட்டுள்ள நிலையில் அதன் முடிவுகள் தற்போது வெளியிடப்பட்டுள்ளன.

குறிப்பாக நம் நாட்டில் 1950 முதல் 2015ம் ஆண்டுக்கு இடையே மக்கள்தொகை நிலவரம் பற்றி விரிவாக ஆய்வு மேற்கொள்ளப்பட்டது. அதில் 1950ம் ஆண்டை ஒப்பிடும்போது 2015ம் ஆண்டில் இந்தியாவின் மக்கள்தொகையில் இந்துக்களின் எண்ணிக்கை என்பது சரிந்துள்ளது எனவும், அதேவேளையில் முஸ்லிம்கள் மற்றும் கிறிஸ்தவர்களின் மக்கள்தொகை என்பது அதிகரித்துள்ளதும் தெரியவந்துள்ளது.

அதன்படி கடந்த 1950-2015 வரையிலான காலக்கட்டத்தில் நம் நாட்டில் இந்து மக்கள்தொகை என்பது 7.8 சதவீதம் வரை குறைந்துள்ளது. அதாவது கடந்த 1950ல் இந்திய மக்கள் தொகையில் 84 சதவீதம் பேர் இந்துக்களாக இருந்த நிலையில் 2015ல் இந்துக்களின் எண்ணிக்கை 78 சதவீதமாக சரிந்துள்ளது.

அதேவேளையில் சிறுபான்மையினராக உள்ள முஸ்லிம்கள், கிறிஸ்தவர்கள், பவுத்தர்கள், சீக்கியர்களின் எண்ணிக்கை என்பது அதிகரித்துள்ளது. ஆனாலும் ஜெயின் மற்றும் பார்சிகளின் எண்ணிக்கை சரிந்துள்ளது. இதில் முஸ்லிம் மக்கள்தொகை என்பது 1950-2015 இடைப்பட்ட காலத்தில் 43.15 சதவீதம் வரை அதிகரித்துள்ளது. அதன்படி 1950ல் இந்திய மக்கள்தொகையில் 9.48 சதவீதம் பேர் முஸ்லிம்களாக இருந்தனர். ஆனால் 2015ல் மொத்த மக்கள்தொகையில் முஸ்லிம்களின் எண்ணிக்கை 14.09 சதவீதமாக உயர்ந்துள்ளது. இது 43.15 சதவீத வளர்ச்சியாகும்.

அதேபோல் கிறிஸ்தவர்களின் எண்ணிக்கை 5.38 சதவீதம் வரை உயர்ந்துள்ளது. சீக்கியர்களின் எண்ணிக்கை 6.58 சதவீதமும், பவுத்தர்களின் எண்ணிக்கை சிறிதளவும் அதிகரித்துள்ளதாக தெரிவிக்கப்பட்டுள்ளது. மேலும் நம் அண்டை நாடான பாகிஸ்தான், வங்கசேத்தில் பெரும்பான்மையான மக்கள் முஸ்லிம்களாக உள்ளனர். ஆனால் இந்த காலக்கட்டத்தில் அங்கு முஸ்லிம்களின் மக்கள்தொகை என்பது அதிகரித்துள்ளது.

னால் இந்தியாவை பொறுத்தமட்டில் பெரும்பான்மை சமூகமாக உள்ள இந்துக்களின் மக்கள்தொகை 8 சதவீதம் வரை சரிந்துள்ளது என தெரிவிக்கப்பட்டுள்ளது. இந்தியா மட்டுமின்றி நேபாளம் நாட்டில் பெரும்பான்மையாக இந்துக்கள் உள்ளன. அங்கும் இந்துக்களின் மக்கள்தொகை என்பது 3.6 சதவீதம் வரை சரிந்துள்ளது என தெரிவிக்கப்பட்டுள்ளது.

English summary

A study by the PM's economic council (EAC-PM) has found that Hindus declined sharply by 7.8% between 1950 and 2015. But the Muslim population share in India surged by 43.15%, Christians saw a 5.38% increased.