இந்தியாவில் இப்போதுள்ள இஸ்லாமிய மக்கள் தொகை எவ்வளவு? லோக்சபாவில் அமைச்சர் ஸ்மிருதி இரானி பதில்

டெல்லி: இந்தியாவில் 2023 ஆம் ஆண்டில் இஸ்லாமியர்கள் மக்கள் தொகை 19.75 கோடியாக இருக்கும் என்று மத்திய சிறுபான்மை நலத்துறை அமைச்சர் ஸ்மிருதி இரானி மக்களவையில் தெரிவித்துள்ளார்.

மணிப்பூரில் தொடர்ந்து வரும் இனவாத வன்முறை சம்பவத்தில் குகி பழங்குடி இனத்தை சேர்ந்த கிறிஸ்துவர்கள் கொல்லப்பட்டு, பெண்கள் பாலியல் பலாத்காரம் செய்யப்பட்ட சம்பவம் உலகையே உலுக்கி உள்ளது. இந்த நிலையில், திரிணாமூல் காங்கிரஸ் எம்.பி. மாலா ராய் மணிப்பூரில் வாழும் பஸ்மண்டா முஸ்லிம்களின் எண்ணிக்கை மற்றும் அவர்களின் சமூக - பொருளாதார நிலைமை குறித்தும், 2023 மே 30 ஆம் தேதி நிலவரப்படி நாட்டில் வாழும் முஸ்லிம்களின் மக்கள் தொகை பற்றிய தரவு உள்ளதா என கேள்வி எழுப்பினார்.

இதற்கு மத்திய சிறுபான்மையினர் நலத்துறை அமைச்சர் ஸ்மிருதி இரானி எழுத்துப்பூர்வமாக பதிலளித்து உள்ளார். 2011 ஆம் ஆண்டு மக்கள் தொகை கணக்கெடுப்பின்படி, இஸ்லாமியர்கள் மக்கள் தொகை 17.22 கோடி. இது மொத்த மக்கள் தொகையில் 14.2 சதவீதமாகும்.

"2020 ஜூலையில் தேசிய மக்கள்தொகை ஆணையத்தின் தொழில்நுட்ப குழு வெளியிட்ட மக்கள் தொகை மதிப்பீட்டு அறிக்கையின்படி, 2023 ஆம் ஆண்டில் நாட்டின் மொத்த மக்கள் தொகை 138.82 கோடியாக இருக்கும். அதன்படி, 2011 மக்கள் தொகை கணக்கெடுப்பில் இருந்த அதே விகிதமான 14.2 சதவீதத்தை வைத்து கணக்கிட்டால், 2023 ஆம் ஆண்டில் நாட்டில் முஸ்லிம்கள் மக்கள் தொகை 19.75 கோடியாக இருக்கும்," என்று ஸ்மிருதி இரானி தெரிவித்து இருக்கிறார்.

மத்திய புள்ளியியல் மற்றும் திட்ட அமலாக்க அமைச்சகம் நடத்திய காலமுறை தொழிலாளர் கணக்கெடுப்பில் 2021 - 22 காலகட்டத்தில், 7 வயதுக்கு மேற்பட்ட முஸ்லிம்களின் படிப்பறிவு விகிதம் 77.7 சதவீதமாகவும், அனைத்து வயதினரை எடுத்துக்கொண்டால் பணிபுரியும் விகிதம் 35.1 சதவீதமாகவும் உள்ளது.

அதேபோல் மத்திய புள்ளியியல் மற்றும் திட்ட அமலாக்க அமைச்சகம் 2020-21ல் நடத்திய ஆய்வில் முஸ்லீம்களில் 94.9 சதவீதம் பேர் மேம்பட்ட குடிநீர் ஆதாரத்தைப் பெற்று உள்ளனர். மேலும் 97.2 சதவீதம் பேருக்கு மேம்பட்ட கழிப்பறை வசதி உள்ளது என்று அமைச்சர் தெரிவித்து உள்ளார். 2014 ஆம் ஆண்டு மார்ச் 31 ஆம் தேதிக்குப் பிறகு புதிய வீடு அல்லது அபார்ட்மெண்ட் வாங்கிய அல்லது கட்டிய முஸ்லீம் குடும்பங்களின் சதவீதம் 50.2 சதவீதம் என்று அவர் கூறினார்.

English summary

Union Minister for Minority Affairs Smriti Irani said in the Lok Sabha that the population of Muslims in India will be 19.75 crore by 2023.