சைதை துரைசாமி மகன் வெற்றியை தேடும் பணிகள் திடீர் நிறுத்தம்! கைவிரித்த மீட்பு படை.. நடந்தது என்ன?

டெல்லி: இமாச்சல பிரதேசத்தில் விபத்தில் சிக்கிய அதிமுக முன்னாள் மேயர் சைதை துரைசாமியின் மகன் வெற்றி துரைசாமியை தேடும் பணிகள் திடீரென நிறுத்தப்பட்டுள்ளது.

அதிமுகவை சேர்ந்தவர் சைதை துரைசாமி. இவர் சென்னையின் முன்னாள் மேயராகவும் சைதாப்பேட்டை தொகுதியின் முன்னாள் எம்எல்ஏவாகவும் இருந்தார்.

தற்போது அதிமுகவில் இருந்து ஒதுங்கியே இருந்து வருகிறார். இவர் மனிதநேயம் ஐஏஎஸ் அகாதெமியை நடத்தி வருகிறார். இதன் மூலம் இலவசமாக மாணவர்களுக்கு ஐஏஎஸ் பயிற்சியை அளித்து வருகிறார்.

இவருடைய மகன் வெற்றி துரைசாமி (45). இவர் என்றாவது ஒரு நாள் எனும் படத்தை இயக்கியுள்ளார். தனது தந்தையின் போட்டித் தேர்வுக்கு பயிற்சி அளிக்கும் மனித நேய அறக்கட்டளையையும் கவனித்து வருகிறார். இந்த நிலையில் தனது அடுத்த திரில்லர் படத்திற்கு லொகேஷன் பார்க்க இமாச்சல் பிரதேசத்திற்கு தனது உதவியாளர் திருப்பூரை சேர்ந்த கோபிநாத்துடன் வெற்றி சென்றார்.

அங்கு ஒரு காரை வாடகைக்கு அமர்த்தி கடந்த ஞாயிற்றுக்கிழமை அன்று லாஹல் மற்றும் ஸ்பிதியின் காசா பகுதியிலிருந்து சிம்லாவுக்கு சென்று கொண்டிருந்தனர். வண்டியை டென்சின் என்பவர் இயக்கினார். கின்னார் மாவட்டம் கஸாங் நலா தேசிய நெடுஞ்சாலையில் கார் சென்று கொண்டிருந்தது.

திடீரென காரின் ஓட்டுநருக்கு மாரடைப்பு ஏற்பட்டது. இதையடுத்து ஓட்டுநரின் கட்டுப்பாட்டை இழந்த கார் தாறுமாறாக ஓடியது. அங்கிருந்த பள்ளத்தில் கவிழ்ந்து சட்லஜ் ஆற்றங்கரையில் கவிழ்ந்தது. ஆற்றில் காரின் சக்கரம் தெரிந்ததை அடுத்து அவ்வழியாக சென்ற சுற்றுலா பயணிகள் போலீஸுக்கு தகவல் கொடுத்தனர்.

இதையடுத்து தகவலறிந்த போலீஸார் தீயணைப்புத் துறையினர், தேசிய பேரிடர் மீட்பு படையினர் விரைந்து போய் தேடுதல் பணிகளை தொடர்ந்தனர். ஆற்றில் மூழ்கிய காரை மீட்ட போது அதில் டென்சின் சடலமாக காணப்பட்டார். வெற்றியின் உதவியாளர், அங்கிருந்த பாறைகளில் காயங்களுடன் மீட்கப்பட்டு தனியார் மருத்துவமனையில் அனுமதிக்கப்பட்டுள்ளார்.

இந்த நிலையில் ஆற்றில் மாயமான வெற்றியை தேடும் பணிகள் தீவிரமாக நடந்து வருகிறது. சில இடங்களில் பனி மூட்டம் காரணமாக மீட்பு பணியில் சிக்கல் நிலவுகிறது. எனவே தற்போது மீட்பு பணிகள் நிறுத்தி வைக்கப்பட்டுள்ளன. சைதை துரைசாமி மகன் வெற்றி குறித்து தகவலறிய 2 நாட்கள் ஆகும் என காவல் துறை சார்பில் தெரிவிக்கப்பட்டது.

English summary

Rescue Operations in Sutlej river stopped to search Saidai Duraisamy's son Vetri as heavy snow fall.