9 லட்சம் கோடி பஸ்பம்.. இந்திய பங்குச்சந்தையில் ரத்த வெள்ளம்! சென்செக்ஸ் 1,000 புள்ளிகள் வீழ்ச்சி

Updated: Thursday, October 1, 2026, 16:07 [IST]

Subscribe to Oneindia Tamil

டெல்லி: இந்திய பங்குச்சந்தையில் இன்று வர்த்தகம் முதலீட்டாளர்களுக்கு பெரும் அதிர்ச்சியை ஏற்படுத்தியுள்ளது. சந்தை தொடங்கிய சில மணி நேரங்களிலேயே மும்பை பங்குச்சந்தை குறியீடான சென்செக்ஸ் 1,000 புள்ளிகளுக்கும் அதிகமாக சரிந்தது. தேசிய பங்குச்சந்தை குறியீடான நிஃப்டி 22,300 புள்ளிகளுக்கு கீழே இறங்கியது.

பங்குச்சந்தையின் ஒட்டுமொத்த மதிப்பு காலை வர்த்தக தொடக்கத்தில் சுமார் 471.86 லட்சம் கோடி ரூபாயாக இருந்தது. ஆனால் மதியம் 1:45 மணி அளவில் அது 462.71 லட்சம் கோடி ரூபாயாக குறைந்தது. இதன் மூலம் சில மணி நேரங்களிலேயே முதலீட்டாளர்களின் சுமார் 9 லட்சம் கோடி ரூபாய் பணம் கரைந்துபோனது.

பங்குச்சந்தை சரிவுக்கு முக்கிய 5 காரணங்கள்

சந்தை திடீரென இவ்வளவு பெரிய சரிவை சந்திக்க உலகளாவிய மற்றும் உள்நாட்டு காரணிகள் காரணமாக அமைந்துள்ளன:

1. வெளிநாட்டு முதலீட்டாளர்களின் விற்பனை:

வெளிநாட்டு நிறுவன முதலீட்டாளர்கள் இந்திய சந்தையில் இருந்து தங்கள் முதலீடுகளை தொடர்ந்து வெளியே எடுத்து வருகின்றனர். செப்டம்பர் 30 அன்று மட்டுமே 10,000 கோடி ரூபாய்க்கும் அதிகமான பங்குகளை விற்றுள்ளனர். கடந்த இரண்டு நாட்களில் மட்டும் 20,000 கோடி ரூபாய்க்கும் மேல் விற்பனை செய்யப்பட்டுள்ளது.

2.அமெரிக்க பாண்ட் ஈல்ட் உயர்வு:

அமெரிக்காவில் 10 ஆண்டு அரசு கடன் பத்திரங்களுக்கான வட்டி விகிதம் 5.3 சதவீதத்திற்கும் மேலாக உயர்ந்துள்ளது. அங்கு பாதுகாப்பான முறையில் அதிக வட்டி கிடைக்கும்போது, இந்தியா போன்ற வளரும் நாடுகளில் அதிக ரிஸ்க் எடுத்து முதலீடு செய்வதை வெளிநாட்டு நிறுவனங்கள் குறைக்கின்றன.

3. ரூபாயின் மதிப்பு தொடர்ந்து வீழ்ச்சி:

அமெரிக்க டாலருக்கு நிகரான இந்திய ரூபாயின் மதிப்பு ரூ.96 என்ற அளவுக்கு மேல் சரிந்துள்ளது. ரூபாய் மதிப்பு குறையும் போது, வெளிநாட்டு முதலீட்டாளர்களுக்கு டாலர் அடிப்படையில் கிடைக்கும் லாபம் குறையும். இதனால் அவர்கள் பங்குகளை விற்றுவிட்டு வெளியேறுகின்றனர்.

4. கச்சா எண்ணெய் விலை உயர்வு மற்றும் போர் பதற்றம்:

ஈரான் தொடர்பான உலகளாவிய மோதல்கள் மற்றும் பதற்றங்கள் காரணமாக கச்சா எண்ணெய் விநியோகத்தில் சிக்கல் எழுந்துள்ளது. இந்தியா தனது தேவையின் பெரும்பகுதி கச்சா எண்ணெயை வெளிநாடுகளில் இருந்து இறக்குமதி செய்கிறது. எனவே, எண்ணெய் விலை உயரும் போது இந்தியாவின் இறக்குமதி செலவு அதிகரித்து நாட்டின் பொருளாதாரத்தை பாதிக்கிறது.

5. சந்தையில் நிலவும் பயம்:

பங்குச்சந்தை எந்த அளவுக்கு நிலையற்றதாக இருக்கிறது என்பதைக் காட்டும் 'இந்தியா விக்ஸ்' குறியீடு மளமளவென உயர்ந்துள்ளது. இது வர்த்தகர்களிடையே உள்ள பதற்றத்தை காட்டுகிறது.

சில்லறை முதலீட்டாளர்கள் சந்தையிலிருந்து வெளியேற வேண்டுமா?

சென்செக்ஸ் மற்றும் நிஃப்டி சரிந்தது என்பதற்காக சந்தையில் உள்ள அனைத்து பங்குகளும் அதே அளவு சரிந்துவிட்டன என்று அர்த்தமில்லை.

நிஃப்டி 50 என்பது ஒட்டுமொத்த சந்தையின் கதையையும் முழுமையாகக் கூறாது. ஏனென்றால், பெரும்பாலான சில்லறை முதலீட்டாளர்கள் இப்போது நடுத்தர மற்றும் சிறிய நிறுவனப் பங்குகளில்தான் அதிக முதலீடு செய்துள்ளனர். கடந்த ஐந்து ஆண்டுகளில் சிப் முதலீடுகள் பெருமளவில் மிட்கேப், ஸ்மால்கேப் பக்கமே திரும்பியுள்ளன. நடுத்தர நிறுவனங்களின் குறியீடு அதன் உச்சத்தில் இருந்து வெறும் 5 முதல் 6 சதவீதம் மட்டுமே குறைந்துள்ளது.

சென்செக்ஸ் மற்றும் நிஃப்டி ஆகியவை நாட்டின் முன்னணி 30 மற்றும் 50 பெரிய நிறுவனங்களை மட்டுமே அடிப்படையாகக் கொண்டவை. எனவே, இந்த குறியீடுகள் விழுந்தவுடன் ஒரு சாதாரண முதலீட்டாளரின் ஒட்டுமொத்த போர்ட்ஃபோலியோவும் பாழாகிவிட்டது என்று நினைக்கத் தேவையில்லை.

புதிய முதலீட்டாளர்களின் எதிர்பார்ப்பும் எதார்த்தமும்

2020 முதல் 2025 வரை பங்குச்சந்தைக்கு வந்த புதிய முதலீட்டாளர்களின் எண்ணிக்கை மும்மடங்காக உயர்ந்துள்ளது. கொரோனா காலத்திற்குப் பிறகு சந்தை மிக வேகமாக ஏறிய நேரத்தில் பலர் உள்ளே வந்தனர். ஆண்டுக்கு 20 முதல் 30 சதவீதம் லாபம் மட்டுமே பார்த்துப் பழகிய புதிய முதலீட்டாளர்களுக்கு, சந்தை இறங்குவதும் ஒற்றை இலக்க லாபம் கிடைப்பதும் பெரும் ஏமாற்றமாகத் தெரிகிறது. ஆனால் பங்குச்சந்தையில் ஏற்ற இறக்கங்கள் மிகவும் இயல்பானவை என்பதைப் புரிந்து கொள்ள வேண்டும்.

முதலீட்டாளர்கள் அடுத்து என்ன செய்ய வேண்டும்?

சந்தை இன்று இறங்கிவிட்டது என்ற ஒரே காரணத்திற்காக பங்குகளை அவசரப்பட்டு நஷ்டத்தில் விற்க வேண்டாம். குறுகிய கால சவால்கள் கடந்துபோகும். நல்ல நிறுவனங்களின் பங்குகள் நீண்ட காலத்தில் மீண்டும் வளர்ச்சியைத் தரும்.

சந்தை வீழ்ச்சியடையும் நேரத்தில் தான் குறைந்த விலையில் அதிக யூனிட்களை வாங்க முடியும். மியூச்சுவல் ஃபண்ட் முதலீடுகளைத் தொடர்வது நீண்ட காலத்தில் நல்ல பலன் தரும்.

பங்குச்சந்தை இறங்கும்போது அமைதியாக இருந்து, தரமான பங்குகளை கவனிப்பதே ஒரு புத்திசாலி முதலீட்டாளருக்கு அழகு. குறுகிய கால சரிவுகளை கண்டு அஞ்சாமல் பொறுமை காப்பதே முதலீட்டைப் பாதுகாக்கும் வழி.