நட்சத்திரப் பேச்சாளர்கள் பட்டியல்... சிதம்பரம் பெயரை தவிர்த்த காங்கிரஸ் தலைமை
டெல்லி: டெல்லி சட்டமன்றத் தேர்தலுக்கான காங்கிரஸ் நட்சத்திரப் பேச்சாளர்கள் பட்டியலில் முன்னாள் மத்திய அமைச்சர் ப.சிதம்பரத்தின் பெயர் தவிர்க்கப்பட்டிருக்கிறது.
ஆனால் அதேசமயம் புதுச்சேரி முதல்வர் நாராயணசாமி, தேசிய செய்தித்தொடர்பாளர் குஷ்பூ ஆகியோரின் பெயர்கள் அந்த நட்சத்திரப் பேச்சாளர்கள் பட்டியலில் இடம்பெற்றுள்ளன.
நட்சத்திரப் பேச்சாளர்கள் பட்டியலில் பெயர் இருந்தால் அவர்கள் பிரச்சாரத்துக்கான செலவு வேட்பாளர் செலவுத்தொகையில் வராது என்பது குறிப்பிடத்தக்கது.
பிப்ரவரி 8-ம் தேதி
வரும் பிப்ரவரி 8-ம் தேதி டெல்லியில் சட்டமன்ற தேர்தல் நடைபெறவுள்ளதால் அங்கு அரசியல் களம் சூடுபிடித்துள்ளன. மீண்டும் ஆட்சியை தக்கவைக்க அரவிந்த் கெஜ்ரிவாலின் ஆம் ஆத்மி தீவிரமாக களப்பணியாற்றி வரும் நிலையில், பாஜக, காங்கிரஸ் ஆகிய கட்சிகளும் ஆட்சியை கைப்பற்ற மல்லுகட்டி வருகின்றன.
நட்சத்திரப் பேச்சாளர்
ஒவ்வொரு அரசியல் கட்சியும் தேர்தல் ஆணையத்திற்கு தங்கள் கட்சி சார்பில் பிரச்சாரம் செய்ய உள்ள நட்சத்திரப் பேச்சாளர்கள் அடங்கிய பட்டியலை அளித்து வருகிறது. அதன்படி காங்கிரஸ் தயாரித்த நட்சத்திரப் பேச்சாளர்கள் பட்டியலில் குஷ்பு, நக்மா, நாராயணசாமி ஆகியோர்கள் அடங்கிய 40 பேர்கள் உள்ளன.
காங். தலைமை
மத்திய அரசை கடுமையாக எதிர்த்து வரும் முன்னாள் மத்திய அமைச்சர் ப.சிதம்பரத்தின் பெயர் அந்த பட்டியலில் இடம்பெறாதது பலரது புருவத்தையும் உயர்த்தச் செய்துள்ளது. நக்மாவுக்கு அளிக்கும் முக்கியத்துவத்தை சிதம்பரத்துக்கு காங்கிரஸ் அளிக்காதது ஏன் என்ற கேள்வியும் எழுகிறது.
உள்நோக்கம்
இது தொடர்பாக தமிழக காங்கிரஸ் கமிட்டியின் முன்னணி நிர்வாகியும், ப.சி. ஆதரவாளருமாகிய ஒருவரிடம் கேட்ட போது, ப.சி. திஹார் சிறையில் இருந்து வந்ததில் இருந்தே அவர் உடல் சோர்வுடன் காணப்படுகிறார். அதனால் அவருக்கு ஓய்வு தேவைப்படுவதால் காங்கிரஸ் தலைமை பெயரை சேர்க்கவில்லை. மற்றபடி நீங்கள் நினைப்பது போல் உள்நோக்கம் எல்லாம் இல்லை என பதில் கிடைத்தது.
Click it and Unblock the Notifications
Sign in with Google