பரபரப்பு! டெல்லி ஏர்போர்டில் மின் கம்பத்தில் மோதிய ஸ்பைஸ்ஜெட் விமானம்!

Updated: Monday, March 28, 2022, 22:03 [IST]

Subscribe to Oneindia Tamil

டெல்லி: டெல்லி விமான நிலையத்தில் இருந்து புறப்படும் போது, ஸ்பைஸ்ஜெட் நிறுவனத்திற்குச் சொந்தமான விமானம் சிறிய விபத்தில் சிக்கிய சம்பவம் சலசலப்பை ஏற்படுத்தி உள்ளது.

உலகில் மிக முக்கிய விமான நிலையங்களில் ஒன்று டெல்லி சர்வதேச விமான நிலையம். இந்தியாவில் ஒவ்வொரு ஆண்டும் அதிகப்படியான பயணிகளைக் கையாளும் விமான நிலையமாக டெல்லி விமான நிலையம் உள்ளது.

அமெரிக்கா, ஜப்பான், ஐரோப்பிய நாடுகள் என உலகின் பல்வேறு நாடுகளுக்கும் டெல்லியில் இருந்து விமானங்கள் இயக்கப்படுகின்றன. இன்று இந்த விமான நிலையத்தில் சிறிய விபத்து ஏற்பட்டுள்ளது சலசலப்பை ஏற்படுத்தியது.

விபத்து

டெல்லி இந்திரா காந்தி விமான நிலையத்தில் இருந்து இன்று வழக்கம் போல ஸ்பைஸ்ஜெட் நிறுவனத்திற்குச் சொந்தமான விமானம் புறப்படத் தயாரானது. பயணிகள் அனைவரும் விமானத்தில் ஏற்றப்பட்டு, விமானம் புறப்பட ஆயத்தமானது. அப்போது ஓடுதளத்திற்கு புஷ்பேக் செய்யும் போது, திடீரென அந்த விமானம் அங்கிருந்த மின்கம்பத்தில் மோதி விபத்தில் சிக்கியுள்ளது.

என்ன நடந்தது

இந்தச் சம்பவம் நடந்தபோது அனைத்து பயணிகளும் விமானத்தில் ஏற்றப்பட்டு விமானம் புறப்படத் தயாராக இருந்ததாகக் கூறப்படுகிறது. டெல்லி விமான நிலையத்தில் பயணிகள் முனையத்தில் இருந்து ஸ்பைஸ்ஜெட் விமானம் ஓடுபாதைக்குச் செல்லும்போது மின்கம்பத்தில் அந்த விமானம் மோதியுள்ளது. இதையடுத்து மாற்று விமானம் ஏற்பாடு செய்யப்பட்டு, பயணிகள் அனைவரும் அதில் புறப்பட்டுச் சென்றனர்.

விளக்கம்

இந்த சம்பவம் குறித்து ஸ்பைஸ்ஜெட் செய்தித் தொடர்பாளர் கூறுகையில், "இன்று டெல்லியில் இருந்து ஜம்முவுக்கு ஸ்பைஸ்ஜெட் விமானம் எஸ்ஜி 160 புறப்படத் தயாராக இருந்தது. விமானம் புஷ் பேக் செய்யும்போது, விமானத்தின் வலதுபுற இறக்கை பின்னால் இருந்து மின்கம்பத்தில் லேசாக மோதியது. இந்த சம்பவத்தில் விமானத்தின் அய்லிரான் சேதமடைந்தது" என்று தெரிவித்தார்.

பாதிப்பு இல்லை

இதைத் தவிர விமானத்திற்கோ அல்லது பயணிகளுக்கோ காயம் எதுவும் ஏற்படவில்லை. அதேபோல விமானத்திற்கும் மோசமான பாதிப்பு எதுவும் ஏற்படவில்லை. இதையடுத்து மாற்று விமானம் மூலம் அவர்கள் ஜம்மு புறப்பட்டுச் சென்றனர். பயணிகள் யாரும் காயமடையவில்லை என்ற போதிலும், இந்தச் சம்பவம் குறித்து உரிய விசாரணை நடத்தி அறிக்கை தாக்கல் செய்ய சிவில் விமானப் போக்குவரத்து இயக்குநரகம் (டிஜிசிஏ) உத்தரவிட்டுள்ளது.