திமுக முன்னாள் அமைச்சர் ரகுபதி வெற்றிக்கு எதிரான வழக்கு உச்சநீதிமன்றத்திலும் தள்ளுபடி!
டெல்லி: திமுக முன்னாள் அமைச்சர் ரகுபதி திருமயம் சட்டமன்றத் தொகுதியில் வெற்றி பெற்றதை எதிர்த்து தாக்கல் செய்யப்பட்ட மேல்முறையீட்டு வழக்கை உச்ச நீதிமன்றம் தள்ளுபடி செய்து உத்தரவிட்டுள்ளது.
சென்னை: திருமயம் சட்டமன்றத் தொகுதி திமுக எம்எல்ஏ ரகுபதியின் வெற்றியை எதிர்த்து தவெக வேட்பாளர் சிந்தாமணி தாக்கல் செய்திருந்த தேர்தல் வழக்கை நிராகரித்து சென்னை உயர் நீதிமன்றம் உத்தரவிட்டுள்ளது.
கடந்த ஏப்ரல் மாதம் நடைபெற்ற சட்டமன்ற தேர்தலில், புதுக்கோட்டை மாவட்டம், திருமயம் சட்டமன்றத் தொகுதியில் திமுக சார்பில் போட்டியிட்ட முன்னாள் அமைச்சர் எஸ்.ரகுபதி 1,492 வாக்குகள் வித்தியாசத்தில் வெற்றி பெற்றார்.
அவரது வெற்றியை எதிர்த்து, தவெக வேட்பாளர் சி.சிந்தாமணி, திருமயம் தொகுதி வாக்காளர் பொன்.பன்னீர்செல்வம் ஆகியோர், சென்னை உயர் நீதிமன்றத்தில் தேர்தல் வழக்குகளை தாக்கல் செய்திருந்தனர்.
இவர்களில், பொன்.பன்னீர்செல்வம் நேரில் ஆஜராகி தேர்தல் வழக்கை தாக்கல் செய்யாமல், வழக்கறிஞர் மூலமாக மனுவை தாக்கல் செய்திருந்ததால், அந்த வழக்கு விசாரணைக்கு உகந்ததல்ல எனக் கூறி, அந்த வழக்கை நீதிபதி ஜி.கே.இளந்திரையன் ஏற்கனவே தள்ளுபடி செய்து உத்தரவிட்டிருந்தார்.
இதையடுத்து, தவெக வேட்பாளர் சிந்தாமணியின் தேர்தல் வழக்கை நீதிபதி விசாரணைக்கு எடுத்துக் கொண்டார். அப்போது அவருடைய மனுவை நிராகரிக்கக் கோரி திமுக எம்எல்ஏ ரகுபதி மனு தாக்கல் செய்திருந்தார்.
இந்த மனுவை விசாரித்த நீதிபதி ஜி.கே.இளந்திரையன், ரகுபதியின் மனுவை ஏற்றுக் கொண்டு, தவெக வேட்பாளர் சிந்தாமணியின் தேர்தல் வழக்கை நிராகரித்து அண்மையில் உத்தரவிட்டார்.
இந்த உத்தரவை எதிர்த்து உச்ச நீதிமன்றத்தில் தொடரப்பட்ட மேல்முறையீட்டு மனுவை இன்று நீதிபதிகள் பிரசாந்த்குமார் மற்றும் ஸ்ரீசந்திரசேகர் அடங்கிய அமர்வு விசாரித்து தள்ளுபடி செய்துள்ளது.
Click it and Unblock the Notifications
Sign in with Google
