"நான் திராவிடன்.." லோக்சபாவில் அண்ணா பேசியதை, ஆவேசமாக நினைவுபடுத்திய டி.ஆர். பாலு!

Published: Thursday, February 3, 2022, 19:17 [IST]

Subscribe to Oneindia Tamil

டெல்லி: நான் ஒரு திராவிட நாட்டிலிருந்து வருகிறேன், நான் ஒரு திராவிடன் என கூறி கொள்வதில் பெருமை கொள்கிறேன் என முன்னாள் முதல்வர் அண்ணா கூறியதை ஸ்ரீபெரும்புதூர் எம்பி டி.ஆர்.பாலு நாடாளுமன்றத்தில் நினைவுகூர்ந்து பேசியிருந்தார்.

நாடாளுமன்றத்தில் பட்ஜெட் கூட்டத் தொடரில் ஜனாதிபதி உரைக்கு நன்றி தெரிவிக்கும் தீர்மானம் நேற்று நடைபெற்றது. இதில் மக்களவையில் காங்கிரஸ் முன்னாள் தலைவர் ராகுல் காந்தி பேசினார். அப்போது கூறுகையில், வாழ்க்கையில் எப்போதும், ஒருபோதும் தமிழ்நாட்டு மக்கள் மீது உங்களுடைய ஆளுகையை செலுத்த முடியாது.

நீங்கள் எந்தவொரு கற்பனையில் இருந்தாலும் உங்களால் இந்திய மக்கள் மீது எப்போதும் ஒருபோதும் ஆளுகையை செலுத்த முடியாது. தமிழ்நாட்டு மக்களுக்கு அவர்களின் மனங்களில் தமிழ்நாட்டுச் சிந்தனை உள்ளது. தமிழ் மொழி பற்றிய சிந்தனை உள்ளது. பிறகு அவர்களுக்கு இந்தியா பற்றிய சிந்தனையும் உள்ளது.

கேரளா

இதில் நீங்கள் குழப்பம் அடைய வேண்டாம். கேரளா மக்களுக்கும் ஒரு கலாசாரம் உண்டு. நானும் கேரளாவில் இருந்து மக்களவைக்கு தேர்வானவன். அதனால் அதை உணர்கிறேன். தமிழ்நாடு, ராஜஸ்தான் போன்றவற்றின் மக்களிடம் இருந்தும் உங்களிடம் இருந்தும் கூட இதை நான் கற்றுக் கொண்டிருக்கிறேன் என பேசியிருந்தார்.

திராவிடன்

இதையடுத்து திமுக எம்பி டி.ஆர். பாலு கூறுகையில் நாளை (பிப்.3) அண்ணா நினைவு தினம் வரும் வேளையில் அவர் மாநிலங்களவையில் உறுப்பினராக இருந்த போது பேசியதை இங்கே பதிவு செய்கிறேன். "நான் ஒரு திராவிட நாட்டில் இருந்து வருகிறேன். நான் ஒரு திராவிடன் என கூறிக் கொள்வதில் பெருமை கொள்கிறேன்.

மராத்தியர்

இப்படி சொல்வதால் நான் குஜராத்திற்கோ மராத்தியருக்கோ வங்காளருக்கோ எதிரானவன் இல்லை. திராவிடன் என நான் ஏன் சொல்கிறேன் என்றால் அதனுள் ஏதோ ஒன்று வித்தியாசமாக, தனித்துவமாக உறுதியாக உள்ளது." இதை கூறிய முன்னாள் முதல்வர் அண்ணாவை எப்போதும் மறக்க முடியாது" என்றார் டி.ஆர். பாலு.

முதல்வர் ஸ்டாலின்

திராவிடம் என்றால் என்ன என்பது முதல்வர் ஸ்டாலின் கூறுகையில் திராவிடம் என்றால் என்ன என்று சில கோமாளிகள் பேசி வருகிறார்கள் என தெரிவித்திருந்தார். அது போல் தனது ட்விட்டர் பக்கத்திலும் திரவீடியன் ஸ்டாக் என முதல்வர் ஸ்டாலின் குறிப்பிட்டிருந்தது குறிப்பிடத்தக்கது.

Published On February 3, 2022