விளம்பரத்துக்கு மட்டும் பாஜக இவ்ளோ செலவா? மணிப்பூரின் வளர்ச்சி நிதி அளவுக்கு செலவு.. ஷாக் ரிப்போர்ட்

டெல்லி: கடந்த 5 ஆண்டுகளில் மத்திய அரசு விளம்பரத்திற்காக எவ்வளவு செலவு செய்திருக்கிறதோ அந்த அளவுக்குத்தான் 2022ம் ஆண்டு ஒட்டுமொத்த 8 வடகிழக்கு மாநிலங்களின் வளர்ச்சிக்கும் நிதி ஒதுக்கீடு செய்யப்பட்டுள்ளது என்கிற விவரம் தற்போது வெளி வந்துள்ளது.

தற்போது நாடாளுமன்ற மழைக்கால கூட்டத்தொடர் நடைபெற்று வருகிறது. நேற்று தொடங்கிய இந்த கூட்டத்தொடர் ஆகஸ்ட் மாதம் 11ம் தேதி வரை நடைபெற இருக்கிறது. 23 நாட்கள் 11 அமர்வுகள் என நடைபெறும் இந்த கூட்டத்தொடரில் மத்திய அரசு 32 மசோதாக்களை நிறைவேற்ற திட்டமிட்டிருக்கிறது. ஆனால் வடகிழக்கு மாநிலமான மணிப்பூரில் ஏற்பட்டுள்ள வன்முறை சம்பவங்களுக்கு பிரதமர் விளக்கமளிக்க வேண்டும் என்று எதிர்க்கட்சிகள் வலியுறுத்தி வருவதால் நேற்றும், இன்று பிற்பகல் வரையும் நாடாளுமன்றம் முடங்கியுள்ளது.

இந்நிலையில் எதிர்க்கட்சி உறுப்பினர்கள் சில முக்கியமான கேள்விகளை மத்திய அரசுக்கு முன்வைத்திருந்தனர். அதற்கு பதில்களும் வழங்கப்பட்டன. அந்த வகையில் கடந்த 5 ஆண்டுகளில் மத்திய அரசு விளம்பரத்திற்காக எவ்வளவு செலவு செய்திருக்கிறது என்பது குறித்து எதிர்க்கட்சிகள் கேள்வியெழுப்பினர். இதற்கு பதிலளித்த பாஜக அமைச்சர், கடந்த 5 ஆண்டுகளில் மத்திய அரசின் விளம்பர செலவு ரூ.2,700 கோடி செலவிட்டதாக கூறியுள்ளார்.

அதாவது, கடந்த 2014 - 2015ம் நிதியாண்டில் அச்சு ஊடகங்களுக்கு ரூ.424.84 கோடியும், மின்னணு ஊடகங்களுக்கு ரூ.473.67 கோடியும் செலவிடப்பட்டுள்ளது. அதேபோல, 2015 - 2016ம் நிதியாண்டில் அச்சு ஊடகங்களுக்கு ரூ.508.22 கோடி, மின்னணு ஊடகங்களுக்கு ரூ.531.60 கோடி, 2016 - 2017ம் நிதியாண்டில் அச்சு ஊடகங்களுக்கு ரூ.468.53 கோடி, மின்னணு ஊடகங்களுக்கு ரூ.609.15 கோடி, 2017 - 2018ம் நிதியாண்டில் அச்சு ஊடகங்களுக்கு ரூ.636.09 கோடி, மின்னணு ஊடகங்களுக்கு ரூ.468.92 கோடி, 2018 - 2019ம் நிதியாண்டில் அச்சு ஊடகங்களுக்கு ரூ.429.55 கோடி, மின்னணு ஊடகங்களுக்கு ரூ.514.28 கோடியும் செலவிடப்பட்டுள்ளது.

அதேபோல கடந்த 2019 - 2020ம் நிதியாண்டில் அச்சு ஊடகங்களுக்கு ரூ.295.05 கோடி, மின்னணு ஊடகங்களுக்கு ரூ.317.11 கோடி, 2020 - 2021ம் நிதியாண்டில் ரூ.179.04 அச்சு ஊடகங்களுக்கு கோடி, மின்னணு ஊடகங்களுக்கு ரூ.101.24 கோடி என செலவிடப்பட்டுள்ளது. ஆக மொத்தமாக அச்சு மற்றும் மின்னணு ஊடகங்கள் என சேர்த்து கடந்த 5 ஆண்டுகளில் ரூ.2,700 கோடி செலவாகியுள்ளது. இதில் வெளிநாட்டு ஊடகங்களில் ஏதும் அரசு விளம்பரம் செய்யவில்லை என்று மத்திய அரசு கூறியுள்ளது.

ஆனால் இங்குதான் பஞ்சாயத்தே வெடித்திருக்கிறது. அதாவது, கடந்த 5 ஆண்டுகளில் மத்திய அரசு விளம்பரத்திற்கு எவ்வளவு செலவு செய்திருக்கிறதோ, அதே அளவு தொகைதான் கடந்த 2022ம் ஆண்டு வடகிழக்கு மாநிலங்களின் வளர்ச்சிக்கு ஒதுக்கியுள்ளது. அதாவது 8 மாநிலங்களின் வளர்ச்சிக்கு சேர்த்தே ரூ.2,755 கோடி ஒதுக்கப்பட்டுள்ளது.

அப்படியெனில் ஒவ்வொரு மாநிலத்திற்கும் சராசரியாக ரூ.344.3 கோடிதான் ஒதுக்கீடு செய்யப்பட்டுள்ளது. இது ஓராண்டு விளம்பரத்திற்கு மத்திய அரசு செய்யும் தொகையை விட குறைவு என சமூக ஆர்வலர்கள் விமர்சித்துள்ளனர்.

English summary

It has now come out that as much as the central government has spent on advertising in the last 5 years, funds have been allocated for the development of the entire 8 North-Eastern states in 2022.