பொது சிவில் சட்டம்.. இப்போ என்ன அவசரம்.. நிலைக்குழு கூட்டத்தில் வரிந்து கட்டிய எதிர்க்கட்சிகள்!
டெல்லி: இன்று நடந்த நாடாளுமன்ற நிலைக்குழு கூட்டத்தில் பொது சிவில் சட்டம் குறித்து ஆலோசனை மேற்கொள்ளப்பட்டது. அப்போது எதிர்க்கட்சிகள் பொது சிவில் சட்டத்திற்கு கடுமையான எதிர்ப்பை பதிவு செய்துள்ளது. பொது சிவில் சட்டத்தில் அவசரம் ஏன்? என திமுக, காங்கிரஸ் உள்ளிட்ட கட்சிகள் கேள்வி எழுப்பியிருக்கின்றன.
இந்தியா பல்வேறு மதங்கள், இனங்கள், மொழிகள் கொண்ட பன்முகத்தன்மை கொண்ட ஒரு நாடாகும். இந்தியாவில் கிரிமினல் சட்டங்களை பொறுத்தவரை நாடு முழுவதும் ஒரே மாதிரியாக உள்ளன. ஆனால், சிவில் விவகாரங்களில் ஒரே மாதிரியான சட்டம் இல்லை. சிவில் சட்டங்கள் என்பது மதங்களைப் பொறுத்து மாறுகிறது. இத்தகைய சூழலை மாற்றி நாடு முழுக்க ஒரே பொது சிவில் சட்டத்தைக் கொண்டு வர வேண்டும் என்பது பாஜகவின் எண்ணமாகும்.
2024 ஆம் ஆண்டு தேர்தல் நெருங்கும் இந்த சூழலில் நாட்டில் பொது சிவில் சட்ட விவகாரத்தை பாஜக கையில் எடுத்துள்ளது. பிரதமர் மோடியே அண்மையில் மத்திய பிரதேசத்தில் நடைபெற்ற பொதுக்கூட்டம் ஒன்றில் பொது சிவில் சட்டத்திற்கு ஆதரவாக பேசினார். இரண்டு வகையான சட்டங்களை கொண்டு நாட்டை நடத்த முடியாது. இந்திய அரசியலமைப்பு சட்டத்தின்படி அனைவரும் சமம் என்றும் பேசினார்.
பொது சிவில் சட்டத்தை அப்பட்டமாக ஆதரித்து பேசிய பிரதமர் மோடிக்கு எதிர்க்கட்சிகள் கடும் கண்டனத்தை தெரிவித்தன. மத்தியில் ஆளும் பாஜக இந்த விவகாரத்தை தற்போது கையில் எடுத்து இருப்பதால் தற்போது பொது சிவில் சட்டம் குறித்த விவாதம் அதிகரித்துள்ளது. வரும் நாடாளுமன்ற மழைக்கால கூட்டத்தொடரிலேயே பொது சிவில் சட்டம் தொடர்பான மசோதாவை நாடாளுமன்றத்தில் அறிமுகம் செய்ய பாஜக அரசு திட்டமிட்டுள்ளதாகவும் தகவல்கள் கூறுகின்றன.
இந்த நிலையில், நாடாளுமன்ற நிலைக்குழு கூட்டம் இன்று கூடியது. இந்தக் கூட்டத்தில் பொது சிவில் சட்டம் குறித்து ஆலோசனை மேற்கொள்ளப்பட்டது. அப்போது எதிர்க்கட்சிகள் பொது சிவில் சட்டத்திற்கு கடுமையான எதிர்ப்பை பதிவு செய்துள்ளது. தேர்தலுக்கு 300 நாட்களே இருக்கும் நிலையில் பொது சிவில் சட்டத்தில் அவசரம் ஏன்? என திமுக, காங்கிரஸ் உள்ளிட்ட கட்சிகள் கேள்வி எழுப்பியிருக்கின்றன.மேலும் தற்போதைய நிலையில், பொது சிவில் சட்டம் தொடர்பாக விவாதமே தேவையில்லை எனவும் பொதுசிவில் சட்ட விவகாரத்தில் பல்வேறு விளக்கங்கள் தேவைப்படுகின்றன என்று எதிர்க்கட்சிகள் தெரிவித்துள்ளன.
பொது சிவில் சட்டத்திற்கு கடும் எதிர்ப்பு தெரிவித்து திமுக சார்பில் மாநிலங்களவை எம்.பி வில்சன் எழுதிய கடிதத்தில், 2024- பொதுத்தேர்தலை மனதில் கொண்டு பொது சிவில் சட்டத்தை மத்திய பாஜக அரசு அணுகுவதை ஏற்க முடியாது. பொது சிவில் சட்டம் தொடர்பான விவாதம், கருத்து கேட்பு போன்றவற்றை நிறுத்தக் கோரி சட்டத்துறைக்கான நாடாளுமன்ற நிலைக்குழு தலைவருக்கு திமுக மாநிலங்களவை எம்.பி வில்சன் கடிதம் எழுதியுள்ளார்.
பொது சிவில் சட்டத்திற்கு எதிர்க்கட்சிகள் கடும் எதிர்ப்பு தெரிவித்து வந்தாலும் எதிர்க்கட்சிகள் முகாமில் இருக்கும் சில கட்சிகள் அதற்கு ஆதரவான நிலைபாட்டை எடுப்பதை சூசகமாக கூறிவருவதையும் பார்க்க முடிகிறது. குறிப்பாக ஆம் ஆத்மி, உத்தவ் தாக்கரேவின் சிவசேனா உள்ளிட்ட கட்சிகள் பொது சிவில் சட்டத்தை ஆதரிப்பதாக கூறியுள்ளன.
Click it and Unblock the Notifications
Sign in with Google