இந்திய குடியுரிமை வேண்டாம்! 2011 முதல் கைவிட்ட 16 லட்சம் பேர்! 2022ல் 2 லட்சம்! “டபுள்” ஆன எண்ணிக்கை

2011 முதல் 2022 ஆம் ஆண்டு வரை 16.65 லட்சம் பேர் இந்திய குடியரிமையை கைவிட்டதாக மத்திய வெளியுறவுத் துறை அமைச்சர் ஜெய்சங்கர் தெரிவித்துள்ளார்.

டெல்லி: கடந்த 2011 ஆம் ஆண்டு முதல் 2022 ஆம் ஆண்டு வரை 16 லட்சத்துக்கும் அதிகமான மக்கள் இந்திய குடியரிமையை கைவிட்டதாக மத்திய வெளியுறவுத் துறை அமைச்சர் ஜெய்சங்கர் நாடாளுமன்ற மாநிலங்களவையில் தெரிவித்து இருக்கிறார். கடந்த 2022 ஆம் ஆண்டில் மட்டும் 2 லட்சத்து 25 ஆயிரம் பேர் இந்த குடியுரிமையை கைவிட்டு இருக்கிறார்கள்.

நாடாளுமன்றத்தில் பட்ஜெட் கூட்டத்தொடர் நடைபெற்று வரும் நிலையில் இந்திய குடியுரிமையை கைவிட்டவர்கள் எண்ணிக்கை குறித்து கேள்வி எழுப்பப்பட்டது. இதற்கு மத்திய வெளியுறவுத் துறை அமைச்சர் ஜெய்ஷங்கர் பதிலளித்து இருக்கிறார்.

அதில், கடந்த 2011 ஆம் ஆண்டு முதல் 2022 ஆம் ஆண்டு வரை 16,63,440 பேர் இந்திய குடியுரிமையை துறந்து இருப்பதாக அவர் கூறியுள்ளார். அத்துடன் அவர்கள் எந்தெந்த நாடுகளுக்கு குடியுரிமை மாறுதலாகி உள்ளனர் என்ற விளக்கத்தையும் வழங்கியுள்ளார்.

2011 - 2014

அதன்படி, 2015 ஆம் ஆண்டுக்கு முந்தைய தரவுகளை எடுத்துக் கொண்டால், 2011 ஆம் ஆண்டில் 1,22,819 பேர் இந்திய குடியுரிமையை துறந்து உள்ளார்கள். 2021 ஆம் ஆண்டில் 1,20,923 பேரும், 2013 ஆம் ஆண்டில் 1,31,405 பேரும் தங்கள் குடியுரிமையை துறந்துள்ளனர். இந்த எண்ணிக்கை 2014 ஆம் ஆண்டில் சற்று குறைந்து 1,29,328 இந்தியர்கள் குடியுரிமையை துறந்து உள்ளார்கள்.

2015 - 2019

கடந்த 2015 ஆம் ஆண்டில் மட்டும் 1,31,489 பேர் இந்திய குடியுரிமையை கைவிட்டு உள்ளனர். 2016 ஆம் ஆண்டில் 1,41,603 பேரும், 2017 ஆம் ஆண்டில் 1,33,049 பேரும் குடியுரிமையை துறந்து இருக்கிறார்கள். அதேபோல் 2018 ஆம் ஆண்டில் 1,34,561 ஆக இருந்த இந்த எண்ணிக்கை 2019 ஆம் ஆண்டில் 1,44,017 ஆக அதிகரித்து இருக்கிறது.

2020ல் குறைவு

அடுத்து 2020 ஆம் ஆண்டில் இந்த எண்ணிக்கை கணிசமான அளவு குறைந்து உள்ளது. அந்த ஆண்டில் 85,256 பேர் மட்டுமே இந்திய குடியுரிமையை துறந்து உள்ளார்கள். அந்த ஆண்டில் இந்தியா உட்பட உலக நாடுகளில் ஏற்பட்ட கொரோனா பாதிப்பும் அதனால் பிறப்பிக்கப்பட்ட ஊரங்கும் இதற்கு காரணமாக இருக்கலாம்.

இரட்டிப்பான எண்ணிக்கை

ஆனால், கடந்த 2021 மற்றும் 2022 ஆகிய ஆண்டுகள் இந்த எண்ணிக்கை இரட்டிப்பாகி இருக்கிறது. 2021 ஆம் ஆண்டில் 1,63,370 பேர் இந்திய குடியுரிமையை துறந்து உள்ளார்கள். கடந்த 2022 ஆம் ஆண்டில் இது வரை இல்லாத அளவுக்கு 2,25,620 இந்தியர்கள் தங்கள் குடியுரிமையை கைவிட்டு பிறநாடுகளுக்கு குடிபெயர்ந்து உள்ளனர்.

16.65 லட்சம் பேர்

கடந்த 12 ஆண்டுகளில் மட்டும் 16 லட்சத்து 63 ஆயிரத்து 440 பேர் இந்திய குடியுரிமையை துறந்துள்ளதாக அறிவித்து இருக்கும் வெளியுறவுத்துறை அமைச்சர் ஜெய்சங்கர் 5 இந்தியர்கள் ஐக்கிய அரபு அமீரகத்தின் குடியுரிமையை கடந்த 3 ஆண்டுகளில் பெற்று உள்ளனர் என்றார். அத்துடன் இந்த 16.65 லட்சம் பேரும் குடியுரிமை பெற்று சென்ற 135 நாடுகளின் பட்டியலையும் அவர் வழங்கி இருக்கிறார்.

குடியுரிமை பெற்ற நாடுகள்

இதில் அதிகபட்சமாக கனடா, ஆஸ்திரேலியா, பிரிட்டன், இத்தாலி, நியூசிலாந்து ஆகிய நாடுகளுக்கே கடந்த 3 ஆண்டுகளில் இந்தியர்கள் குடியுரிமை பெற்று இருப்பதாக கடந்த ஆண்டு ஜூலை மாதம் மத்திய இணை அமைச்சர் நித்யானந்த் ராய் வெளியிட்ட தகவலில் தெரிவிக்கப்பட்டு இருந்தது குறிப்பிடத்தக்கது.

English summary

Union External Affairs Minister Jaishankar said that between 2011 and 2022, 16.65 lakh people have renounced Indian citizenship.