காமராஜரின் தொடர்ச்சி இது.. தமிழக சட்டசபை தேர்தலுக்கு முன்பாக ராகுல் காந்தி போட்ட வீடியோ

Updated: Thursday, April 23, 2026, 9:38 [IST]

Subscribe to Oneindia Tamil

டெல்லி: தமிழக சட்டசபை தேர்தல் நாளை நடைபெற உள்ளது. இந்நிலையில் தான் ராகுல் காந்தி தமிழக வாக்காளர்களுக்காக தனது எக்ஸ் வலைதள பக்கத்தில் முக்கிய வீடியோவை வெளியிட்டுள்ளார். அதில், ''இந்த தேர்தல் திமுக - காங்கிரஸ் கூட்டணிக்கும், அதிமுக - பாஜக கூட்டணிக்கும் இடையேயான சித்தாந்த ரிதீயிலான தேர்தல். பாஜக, அதிமுகவை கட்டுப்படுத்தி தமிழ் கலாசாரம், பண்பாடு, மொழியை அழித்து தமிழகத்துக்குள் நுழைய முயல்கிறது. காங்கிரஸ் கட்சியின் மறைந்த காமராஜ் சமூகநீதிக்கான அடிக்கல்லை தமிழ்நாட்டில் நாட்டினார். அதனை திமுக - காங்கிரஸ் கட்சி தொடர்ந்து பின்பற்றி வருகிறது. இதனால் தேர்தலில் திமுக - காங்கிரஸ் கூட்டணிக்கு வாக்களிக்க வேண்டும்'' என்று கூறியுள்ளார்.

தமிழக சட்டசபை தேர்தல் நாளை நடைபெற உள்ளது. காலை 7 மணிக்கு வாக்குப்பதிவு தொடங்கி மாலை 6 மணிக்கு முடிவடைய உள்ளது. இந்நிலையில் தான், தமிழக சட்டசபை தேர்தலையொட்டி காங்கிரஸ் கட்சியின் ராகுல் காந்தி முக்கிய வீடியோவை வெளியிட்டுள்ளார்.

அந்த வீடியோவில் மறைந்த முதல்வர் காமராஜரின் பெயரை கூறி தமிழக மக்களுக்கு முக்கிய கோரிக்கையை முன்வைத்துள்ளார். இதுதொடர்பாக ராகுல் காந்தி கூறியுள்ளதாவது:

''தமிழ்நாட்டில் உள்ள அனைவருக்கும் வணக்கம். இந்த தேர்தல் என்பது திமுக - காங்கிரஸ் கூட்டணிக்கும், அதிமுக - பாஜக கூட்டணிக்கும் இடையேயான சித்தாந்த ரிதீயிலான தேர்தல். பாஜக, அதிமுகவை கட்டுப்படுத்தி தமிழ் கலாசாரம், பண்பாடு, மொழியை அழித்து தமிழகத்துக்குள் நுழைய முயல்கிறது. அதிமுக தலைவர்கள் மீதான ஊழல் வழக்குகளால் அவர்கள் பாஜகவுடன் சமசரம் செய்துள்ளனர்.

டிரம்பிடம் எப்படி மோடி சமரசம் செய்து உள்ளாரோ.. அதேபோல் அதிமுக தலைவர்கள் மோடியுடன் சமசரம் செய்துள்ளனர். டெல்லியில் இருந்து அதிமுக வழியாக தமிழகத்தை ஆள பாஜக நினைக்கிறது. எங்களை பொறுத்தவரை தமிழ்நாட்டை தமிழக மக்கள் ஆள வேண்டும். தமிழக பஞ்சாயத்துகள் ஆள வேண்டும். தமிழ்நாடு சட்டசபையால் தமிழக முதல்வர் ஆள வேண்டும்.

தமிழகத்தை எடுத்து கொண்டால் சமூக நீதிக்கான மரபை காலம் காலமாக கொண்டுள்ளது. காங்கிரஸ் கட்சியின் மறைந்த காமராஜ் சமூகநீதிக்கான அடிக்கல்லை தமிழ்நாட்டில் நாட்டினார். அதனை திமுக - காங்கிரஸ் கட்சி தொடர்ந்து பின்பற்றி வருகிறது. தமிழக அரசு பெண்கள், இளைஞர்கள், முதியவர்களுக்கு ஆதரவாக உள்ளது.

தயவுசெய்து மக்கள் திமுக - காங்கிரஸ் கூட்டணிக்கு வாக்களிக்க வேண்டும். காங்கிரஸ் வேட்பாளர்களுக்கு மக்கள் ஓட்டளிக்க வேண்டும். மொத்த காங்கிரஸ் கட்சியினரும், திமுக உள்பட பிற கூட்டணி கட்சியினருக்கு வாக்களிக்க வேண்டும். உதவி செய்ய வேண்டும். அதேபோல் பிற கூட்டணி கட்சியினர் காங்கிரஸ் வேட்பாளர்களுக்கு ஆதரவாக வாக்களித்து உதவ வேண்டும். வணக்கம்'' என்று கூறியுள்ளார்.