‛‛அந்த 3 பேர்’’.. மோடிக்கு பின் பாஜகவில் பிரதமராக தகுதியானவர் யார்? இந்தியா டுடே சர்வே ரிசல்ட் இதோ

டெல்லி: நரேந்திர மோடிக்கு பிறகு பாஜகவில் பிரதமர் வேட்பாளராக யாரை முன்னிறுத்தலாம் என்ற கேள்வியின் அடிப்படையில் இந்தியா டுடே கருத்து கணிப்பு மேற்கொண்டது. இந்த கருத்து கணிப்பின் முடிவுகள் தற்போது வெளியாகி உள்ள நிலையில் டாப் 3 லிஸ்ட்டில் 3 முக்கிய தலைவர்களின் பெயர்கள் இடம் பெற்றுள்ளன.

விரைவில் நாடாளுமன்ற தேர்தல் நடைபெற உள்ளது. 2014, 2019 ஆகிய 2 நாடாளுமன்ற தேர்தல்களில் அமோக வெற்றி பெற்ற பாஜக ஹாட்ரிக் வெற்றியை பெறும் முனைப்பில் செயல்பட்டு வருகிறது. இந்த 2 முறையும் பாஜக சார்பில் பிரதமராக நரேந்திர மோடி தான் பொறுப்பு வகித்து வருகிறார்.

வரும் நாடாளுமன்ற தேர்தலிலும் பாஜக வெற்றி பெறும் பட்சத்தில் மீண்டும் பிரதமராக மோடி தான் பதவியேற்க அதிக வாய்ப்புள்ளது. அதேவேளையில் பாஜகவின் வெற்றியை தடுக்கும் முனைப்பில் எதிர்க்கட்சிகள் ஒன்றிணைந்துள்ளன. காங்கிரஸ், திமுக, திரிணாமுல் காங்கிரஸ் உள்பட 27 கட்சிகள் இணைந்து ‛இந்தியா' கூட்டணியை உருவாக்கி உள்ளன.

இதற்கிடையே தான் நாடாளுமன்ற தேர்தலையொட்டி மக்களின் மனநிலை என்ன? என்பது குறித்து இந்தியா டுடே செய்தி நிறுவனம் சார்பில் ‛Mood of the Nation 2024' என்ற பெயரில் சர்வே நடத்தி மக்களிடம் கருத்துகள் கேட்கப்பட்டது. நாடு முழுவதும் 2023 டிசம்பர் மாதம் 15ம் தேதி முதல் 2024 ஜனவரி மாதம் 28 ம் தேதி வரை 35,801 பேரிடம் கருத்துகள் கேட்கப்பட்டன.

இந்த சர்வேயில் நரேந்திர மோடிக்கு பிறகு பாஜகவில் யாரை பிரதமர் வேட்பாளராக முன்னிருத்தலாம்? என்ற வகையில் கேள்வி எழுப்பபட்டது. பிரதமர் மோடிக்கு தற்போது 73 வயது ஆகிறது. பாஜகவை பொறுத்தமட்டில் 75 வயதுக்கு பிறகு தலைவர்களுக்கு ஓய்வு வழங்கப்பட்டு வருகிறது. இருப்பினும் பிரதமர் மோடிக்கு இந்த விஷயத்தில் விலக்கு அளிக்கப்படலாம். ஆனாலும் கூட அடுத்து பாஜகவில் பிரதமராக இன்னொருவரை முன்னிறுத்த வேண்டியது அவசியம் என்பதால் தான் இந்த கேள்வி முன்வைக்கப்பட்டது.

இதில் பிரதமர் மோடிக்கு பிறகு அமித்ஷா பிரதமர் பொறுப்புக்கு பொருத்தமானவர் என அதிகமானவர்கள் கருத்து தெரிவித்துள்ளனர். அதன்படி அமித்ஷா என்று 29 சதவீதம் பேர் தெரிவித்துள்ளனர். அமித்ஷா தற்போது மத்திய உள்துறை அமைச்சராக உள்ளார். பாஜக கடந்த 10 ஆண்டுகளில் மாபெரும் வெற்றி பெற முக்கிய காரணமே அமித்ஷாவின் தேர்தல் வியூகங்கள் தான். பாஜகவில் அரசியல் சாணக்கியர் என அமித்ஷா அழைக்கப்பட்டு வருகிறார்.

இதற்கு அடுத்தபடியாக 2வது இடத்தில் உத்தர பிரதேச முதல்வர் யோகி ஆதித்யநாத் இருக்கிறார். இவருக்கு 25 சதவீதம் பேர் ஆதரவு தெரிவித்துள்ளனர். எம்பியாக இருந்த யோகி ஆதித்யநாத் உத்தர பிரதேச முதல்ரவராக்கப்பட்டார். தற்போது 2வது முறையாக உத்தர பிரதேச முதல்வராக உள்ளார். குற்றம் செய்வோரின் வீடுகளை புல்டோசரால் இடித்து தள்ள உத்தரவிட்டது உள்ளிட்ட தனது அதிரடி நடவடிக்கையின் மூலம் உத்தர பிரதேச முதல்வரான பிறகு பாஜகவில் குறுகிய காலத்தில் மிகுந்த செல்வாக்கு மிக்க தலைவராக உயர்ந்துள்ளார்.

அதற்கு அடுத்தபடியாக 3வது இடத்தில் பாஜகவின் மூத்த தலைவரும், மத்திய நெடுஞ்சாலைத்துறை அமைச்சருமான நிதின் கட்காரி உள்ளார். நிதின் கட்காரி தான் பிரதமர் பொறுப்பு ஏற்றவர் என 16 சதவீதம் பேர் தெரிவித்துள்ளனர். நாக்பூர் எம்பியாக உள்ள நிதின் கட்காரி பாஜகவின் மிகவும் மூத்த தலைவர்களில் ஒருவர். ஆர்எஸ்எஸ் பின்புலத்தை சேர்ந்தவர் என்றாலும் இவர் மீது அனைத்து கட்சி தலைவர்களும் மரியாதை கொண்டுள்ளனர் என்பது குறிப்பிடத்தக்கது.

English summary

India Today conducted an ‛Mood of the Nation 2024’ opinion poll on the question of who should be nominated as Prime Minister candidate of BJP after Narendra Modi. The results of this poll are now out. Amit Shah is on the first place, Yogi Adityanath is on the 2nd place and Nitin Gadkari is on the 3rd place.