மொத்தமாக முடங்கிய ‛எக்ஸ்'வலைதளம்.. ஒரே வாரத்தில் 2வது முறை.. கொதிக்கும் நெட்டிசன்கள்

Updated: Friday, January 16, 2026, 22:15 [IST]

Subscribe to Oneindia Tamil

டெல்லி: இந்தியா, அமெரிக்கா உள்பட உலகம் முழுவதும் எக்ஸ் (முன்பு ட்விட்டர்)என அழைக்கப்படும் எலான் மஸ்க்கின் சமூக வலைதளம் முடங்கியது. ஒரே வாரத்தில் 2வது முறையாக இந்த வலைதளம் முடங்கி உள்ளதால் நெட்டிசன்கள் கொந்தளித்துள்ளனர்.

உலகின் நம்பர் ஒன் பணக்காரராக இருப்பவர் எலான் மஸ்க். ட்விட்டர் நிறுவனத்தை வாங்கி ‛எக்ஸ்' என்ற பெயரில் மக்களுக்கு வழங்கி உள்ளார். எக்ஸ் வலைதள பக்கத்தை உலகம் முழுவதும் பொதுமக்கள் பயன்படுத்தி வருகின்றனர்.

இந்நிலையில் தான் இன்று திடீரென்று எக்ஸ் வலைதள பக்கம் முடங்கி உள்ளது. இந்தியா, அமெரிக்கா, ஐரோப்பா உள்ளிட்ட பல நாடுகளில் எக்ஸ் வலைதள பக்கம் முடங்கி உள்ளது.

எக்ஸ் வலைதள பக்கத்தை திறந்து புதிய பதிவுகளை பார்க்க Refresh செய்தால் ஏற்கனவே பதிவிட்டு நாம் பார்க்காத பதிவுகளை கொண்டு வருகிறது. புதிய பதிவுகளை காட்ட மறுக்கிறது. மேலும் பதிவுகள் செய்ய முடியாமல் உள்ளது. இன்னும் சிலருக்கு திடீரென எக்ஸ் வலைதள பக்கம் லாக்அவுட் ஆகி வெளியே வருகிறது. மீண்டும் லாக்இன் செய்ய முடியவில்லை.

இதனை Downdetector வலைதளம் உறுதி செய்துள்ளது. வலைதளங்களின் செயல்பாட்டை கண்காணித்து வரும் இந்த வலைதளத்தில் முதல் சில நிமிடங்களிலேயே 65,000க்கும் அதிகமானவர்களின் புகார்கள் பதிவாகி உள்ளது. இதில், 50% பேர் எக்ஸ் செயலியில், 39% பேர் இணையதளத்தில் புகாரளித்துள்ளனர். பல நாடுகளில் இருந்து ஒரே நேரத்தில் நெட்டிசன்கள் புகார் அளித்துள்ளனர். இதன்மூலம் எக்ஸ் வலைதள உலகம் முழுவதும் முடங்கியது உறுதி செய்யப்பட்டுள்ளது.

எக்ஸ் நிறுவனத்தின் தொழில்நுட்ப கோளாறால் இந்த பிரச்சனை வந்து இருக்கலாம் என்று கூறப்படுகிறது. இருப்பினும் எக்ஸ் வலைதளம் சார்பில் இன்னும் பிரச்சனை பற்றி விளக்கம் அளிக்கவில்லை. இதனால் திடீர் பிரச்சனையின் பின்னணி, எப்போது பிரச்சனை சரியாகும் என்பது தெரியாமல் உள்ளது.

இதனால் நெட்டிசன்கள் எலான் மஸ்க்கை விமர்சனம் செய்ய தொடங்கி உள்ளனர். ஏனென்றால் இந்த வாரத்தில் எக்ஸ் வலைதளம் முடங்குவது இது 2வது முறையாகும். முன்னதாக கடந்த நேற்று முன்தினம் மாலையில் எக்ஸ் வலைதள பக்கம் பிரச்சனையை சந்தித்தது. அப்போதும் வலைதள பக்கம் லோட் ஆகாமல் நின்றது. அதன்பிறகு பிரச்சனை சரிசெய்யப்பட்டது. ஆனால் நேற்று சரியாக இயங்கிய எக்ஸ் வலைதள பக்கம் இன்று மீண்டும் முடங்கி உள்ளது. இதனால் நெட்டிசன்கள் கடும் கோபமடைந்துள்ளனர்.