வில் யூ மேரி மீ.. நடுவானில் லவ் ப்ரொபோஸ் செய்த பெண்.. அசந்துபோன காதலன்

டெல்லி: விமானத்தில் சென்று கொண்டிருந்தபோது தூங்கிக் கொண்டு வந்த தனது ஆண் நண்பரிடம் வித்தியாசமாக லவ் ப்ரொபோஸ் செய்த இளம்பெண்ணின் அசத்தல் வீடியோ சமூக வலைதளங்களில் வைரலாகி வருகிறது.

காதலிப்பதே கடினமான காரியம். அந்தக் காதலை உரிய பெண்ணிடமோ, ஆணிடமோ சொல்வது என்பது அதைவிட சவாலான காரியம். லெட்டர், மெயில், மெசேஜ், இன்ஸ்டா, பேஸ்புக் போன்றவை மூலம் எல்லாம் காதலைச் சொல்லி வந்த காலம் எல்லாம் காணாமல் போய்விட்டது. டிசைன் டிசைனாக யோசித்து மெனக்கெட்டு வித்தியாசமான முறையில் தங்களது காதலை ப்ரொபோஸ் செய்து வருகின்றனர் இன்றைய இளைஞர்கள்.

காதலிப்பதில் உள்ள சுவாரஸ்யமே அதில் உள்ள மெனக்கெடல்கள்தான். அந்த வகையில், விமானத்தில் உறங்கிக் கொண்டு வந்த தனது நண்பரிடம் காதலைச் சொல்ல இளம்பெண் என்னவெல்லாம் செய்திருக்கிறார் என்று பார்க்கலாம் வாங்க..

ஐஸ்வர்யா பன்சால் என்ற இளம்பெண் தனது ஆண் நண்பரான அமுல்யா கோயல் என்பவருடன் விமானத்தில் சென்றுள்ளார். அப்போது, தனது ஆண் நண்பரிடம் எப்படியாவது இன்று காதலைச் சொல்லி அசத்திவிட வேண்டும் என்று முடிவு செய்திருக்கிறார் ஐஸ்வர்யா. இதற்காக விமான ஊழியர்களிடம் முன்னரே கூறிய ஐஸ்வர்யா சில சர்ப்ரைஸான ஏற்பாடுகளையும் செய்ய வேண்டும் என வேண்டுகோள் விடுத்துள்ளார்.

இதைத்தொடர்ந்து, இருவரும் விமானத்தில் ஏறி தங்களது இருக்கைகளில் அமர்ந்துள்ளனர். விமானம் புறப்பட்ட சிறிது நேரத்தில் அமுல்யா கோயல் உறங்கத் தொடங்கியுள்ளார். இதையடுத்து, அவசர அவசரமாக ஐஸ்வர்யா தனது ஆண் நண்பர் உறங்கியது குறித்து ஊழியர்களிடம் தெரிவித்துள்ளார். அடுத்த சில விநாடிகளில் விமானத்தில் உள்ள ஒலிபெருக்கியில் இருந்து அமுல்யா கோயலுக்கு ஒரு முக்கியமான அறிவிப்பு காத்திருக்கிறது என்று அறிவிக்கப்பட்டுள்ளது.

திடுக்கிட்ட அமுல்யா கோயல் தனது பெயரைக் கூப்பிடுவது தெரிந்ததும் தூக்க கலக்கத்தில் எழுந்து செல்கிறார். ஐஸ்வர்யா அவரது எதிரே நடந்து வந்து மண்டியிட்டு தனது காதல் குறித்து ப்ரொபோஸ் செய்து திருமணம் செய்து கொள்ளுமாறு கேட்கிறார். பின்பு, தான் மறைத்து வைத்திருந்த மோதிரம் ஒன்றையும் அவரது விரலில் மாட்டிவிட்டு அசத்தியுள்ளார்.

இதற்கிடையே இருக்கைகளில் அமர்ந்திருந்த நான்கு பேர் வில் யூ மேரி மீ என்ற வாசகங்கள் கொண்ட பேப்பரை பிடித்தபடி திரும்பியதுதான் ஹைலைட். விமானம் முழுவதும் சிரிப்பும், சந்தோஷமும் பொங்கியது. ஐஸ்வர்யாவும், அமுல்யா கோயல் இருவரும் கட்டிப்பிடித்து தங்கள் அன்பை பரிமாறிக் கொண்டனர். பின்னர், ஐஸ்வர்யா பன்சால், அமுல்யா கோயல் இருவருக்கும் விமான ஊழியர்கள் பரிசு கொடுத்து மகிழ்வித்தனர்.

இந்த லவ் ப்ரொபோஸல் வீடியோவை ஐஸ்வர்யா பன்சால் சமூக வலைதளத்தில் வெளியிட்டிருந்த நிலையில், ஏராளமானோர் வாழ்த்து தெரிவித்து வருகின்றனர்.

English summary

A strange video of a young woman proposing love to her boyfriend who fell asleep on a flight is going viral on social media.