திண்டுக்கல் சீனிவாசனுக்கு செக்.. மகனுக்காக இறங்கிய ஐ.பெரியசாமி.. கரை சேர்வாரா ஐ.பி.செந்தில்குமார்?

Updated: Saturday, April 11, 2026, 11:17 [IST]

Subscribe to Oneindia Tamil

திண்டுக்கல்: சட்டசபைத் தேர்தலுக்கு இன்னும் 11 நாட்கள் மட்டுமே இருக்கிறது. இதனால் திமுக மற்றும் அதிமுக ஆகிய வேட்பாளர்களின் பிரச்சாரமும், தேர்தல் செயல்பாடுகளும் உச்சத்தில் இருக்கின்றன. அந்த வகையில் தமிழ்நாடே எதிர்பார்த்து காத்திருக்கும் தேர்தல் முடிவாக திண்டுக்கல் தொகுதி மாறி இருக்கிறது. ஏனென்றால் அதிமுக முன்னாள் அமைச்சர் திண்டுக்கல் சீனிவாசன் மீண்டும் களமிறங்கி இருக்கிறார்.

மறுபக்கம் திமுகவின் அடையாளமாக இருக்கும் ஐ.பெரியசாமியின் மகன் ஐ.பி.செந்தில்குமார் களமிறக்கப்பட்டுள்ளார். கடந்த முறை பழனி தொகுதியில் போட்டியிட்டு வென்ற ஐ.பி.செந்தில்குமாரை இம்முறை முதல்வர் ஸ்டாலின் திட்டமிட்டே திண்டுக்கல் தொகுதிக்கு மாற்றி இருக்கிறார். அதேபோல் பழனி தொகுதியை சிபிஎம் கட்சிக்கு கொடுத்துள்ளார்.

இது திண்டுக்கல் மாவட்டத்தையே அதிர்ச்சிக்குள்ளாக்கி இருக்கிறது. ஏனென்றால் 2021 சட்டசபைத் தேர்தலில் திண்டுக்கல் சீனிவாசன் சுமார் 18,600 வாக்குகள் வித்தியாசத்தில் வென்ற தொகுதி அது. அதேபோல் திண்டுக்கல் மாவட்டத்தில் திண்டுக்கல் சீனிவாசன் தான் அதிமுகவுக்கு அடையாளமாக இருக்கிறார். நத்தம் விஸ்வநாதனின் அரசியல் செயல்பாடுகள் குறைந்துவிட்டன.

இதன் காரணமாகவே திண்டுக்கல் சீனிவாசனை வீழ்த்திவிட்டால், திமுக கைகளுக்கு மொத்த மாவட்டமும் வந்துவிடும் என்று கணக்கு போடப்பட்டுள்ளது. அதேபோல் ஐ.பெரியசாமிக்கு வயதாகிவிட்டதால், அவரின் இடத்தில் அவரது மகனை கொண்டு வர திமுக தலைமை கருதுவதாக தெரிகிறது. அதற்கேற்ப பலமான வேட்பாளரை வீழ்த்திவிட்டு வந்தால், அமைச்சர் பதவி அளிக்கப்படும் என்ற உத்தரவாதமும் அளிக்கப்பட்டுள்ளது.

இதனால் திண்டுக்கல் களத்தில் திமுகவினர் உற்சாகத்துடன் வலம் வருகின்றனர். மறுபக்கம் திண்டுக்கல் சீனிவாசன் இந்த தேர்தலில் தோல்வி அடைந்தால், அவரின் அரசியல் எதிர்காலமே சிக்கலாகும். இதனை கணக்கில் கொண்டு திண்டுக்கல் தொகுதியில் கோலோச்சிட வேண்டும் என்பதில் கவனமாக இருக்கிறார் திண்டுக்கல் சீனிவாசன்.

ஐ.பி.செந்தில்குமாருக்காக அவரது ஒட்டுமொத்த குடும்பமும் களமிறங்கி இருக்கிறது. 2016 மற்றும் 2021 ஆகிய தேர்தலில் திண்டுக்கல் சீனிவாசன் 90 ஆயிரம் வாக்குகளுக்கு மேல் பெற்றுள்ளார். ஆனால் இம்முறை திமுகவின் பவர் சென்டரான ஐ.பெரியசாமி குடும்பம் நேரடியாக களமிறங்கி இருக்கிறது. அதேபோல் தவெக பிரிக்கும் வாக்குகளும், திமுகவுக்கு சாதகமாக மாறும் என்று பார்க்கப்படுகிறது.