ஐக்கிய அரபு அமீரக அமைச்சர்களுடன் முதல்வர் ஸ்டாலின் ஆலோசனை! ராஜமரியாதை அளித்து வரும் துபாய் அரசு!

Updated: Friday, March 25, 2022, 14:47 [IST]

Subscribe to Oneindia Tamil

துபாய்: அரசு முறை பயணமாக துபாய் சென்றுள்ள முதலமைச்சர் ஸ்டாலின், அங்கு ஐக்கிய அரபு அமீரக அமைச்சர்கள் மற்றும் முக்கியத் தொழிலதிபர்களை சந்தித்து பேசி வருகிறார்.

துபாய் பயணம்

முதலமைச்சராக பொறுப்பேற்ற பிறகு மு.க.ஸ்டாலின் செல்லும் முதல் வெளிநாட்டுப் பயணம் துபாய் என்பதால், இது பெரியளவில் கவனத்தை ஈர்த்துள்ளது. துபாய் எக்ஸ்போவில் பங்கேற்று தமிழகம் சார்பில் அமைக்கப்பட்டுள்ள அரங்கை திறந்து வைக்கும் முதல்வர் ஸ்டாலின் முன்னதாக ஐக்கிய அரபு அமீரக அமைச்சர்களுடன் இன்று காலை ஆலோசனை நடத்தியிருக்கிறார். இதில் ஐக்கிய அரபு அமீரகத்தின் பொருளாதாரம் மற்றும் வர்த்தக துறைகளின் அமைச்சர்கள் கலந்துகொண்டனர்.

தொழில் வளர்ச்சி

தமிழகத்தில் தொழில்வளர்ச்சியை பெருக்க தமிழக அரசிடம் உள்ள திட்டங்கள் குறித்தும் தமிழகத்தில் புதிய தொழில் நிறுவனங்களை தொடங்குவது பற்றியும் இந்தச் சந்திப்பின் போது முதலமைச்சர் ஸ்டாலின் விரிவாக ஆலோசனை நடத்தியதாக தகவல் வெளியாகியுள்ளது. இந்தக் கூட்டத்தில் தொழில்துறை அமைச்சர் தங்கம் தென்னரசு மற்றும் முதலமைச்சரின் தனிச் செயலாளர்களான உதயசந்திரனும், அனு ஜார்ஜும் உடன் இருந்துள்ளனர்.

தொழிலதிபர்கள்

கேரளத்தை பூர்வீகமாக கொண்டு துபாயில் மிகப்பெரிய ஷாப்பிங் மால் நடத்தி வரக்கூடிய லூலூ குழுமங்களின் தலைவரும், தொழிலதிபருமான யூசுஃப் அலி முதலமைச்சர் ஸ்டாலினை சந்தித்து பேசியிருக்கிறார். இதேபோல் ஐக்கிய அரபு அமீரகத்தை சேர்ந்த மேலும் சில முக்கியத் தொழிலதிபர்கள் சிலரையும் முதலவர் ஸ்டாலின் சந்தித்து பேசியதாக தகவல் வெளியாகியுள்ளது.

டிப்டாப் உடை

துபாயில் டிப் டாப்பாக கோட் சூட் அணிந்து அனைத்து நிகழ்ச்சிகளிலும் முதல்வர் ஸ்டாலின் கலந்துகொண்டு வருகிறார். இதேபோல் அவருக்கு துபாய் அரசு சார்பில் முழு மரியாதை கொடுக்கப்படுவதும் குறிப்பிடத்தக்கது. இதனிடையே இது தொடர்பான புகைப்படங்கள் அவ்வப்போது வெளியிடப்படுவதால் அது சமூக வலைதளங்களில் வைரலாகி வருகிறது.