UAE அமைச்சர்கள் உடன் சந்திப்பு.. 'Karunanidhi A Life' புத்தகத்தை பரிசாக தந்த முதல்வர் ஸ்டாலின்!
துபாய்: அரசு முறை பயணமாகத் துபாய் சென்றுள்ள தமிழக முதல்வர் ஸ்டாலின், ஐக்கிய அரபு நாடுகளின் அமைச்சர்களுடன் முதலீடு தொடர்பாக முக்கிய ஆலோசனையில் ஈடுபட்டார்.
உலக எக்ஸ்போ கண்காட்சி துபாயில் கடந்த ஆண்டு அக்டோபர் 1ஆம் தேதி முதல் நடைபெற்று வருகிறது. இந்த கண்காட்சி வரும் மார்ச் 31ஆம் தேதி வரை நடைபெறும் என அறிவிக்கப்பட்டுள்ளது..
இந்தக் கண்காட்சியில் இன்று (மார்ச் 25) முதல் மார்ச் 31ஆம் தேதி வரை தமிழ்நாடு வாரமாக அனுசரிக்கப்படவுள்ளது.
உலக எக்ஸ்போ கண்காட்சி
இந்த உலக எக்ஸ்போ கண்காட்சியில் தமிழ்நாட்டிற்கான அரங்கைத் திறந்து வைக்க முதல்வர் ஸ்டாலின் நேற்றைய தினம் துபாய் புறப்பட்டுச் சென்றார். தமிழ்நாட்டில் தற்போது உள்ள தொழிற்சாலைகள், உட்கட்டமைப்பு காற்றாலைகள் உட்பட பல்வேறு துறைகளில் உற்பத்தி செய்யப்படும் பொருட்களின் உருவகங்களும் இந்த அரங்கில் காட்சிப்படுத்தப்படவுள்ளன. அதாவது தமிழ்நாட்டிற்கான அனைத்து சிறப்புகளையும் ஒரே இடத்தில் அறிந்து கொள்ளும் வகையில் இந்த அரங்கு வடிவமைக்கப்பட்டுள்ளது.
ஐக்கிய அமீரகத்தில் முதல்வர் ஸ்டாலின்
192 நாடுகள் பங்கேற்றுள்ள இந்த உலக எக்ஸ்போ கண்காட்சியில் ஒவ்வொரு நாட்டிற்கும், பிரத்தியேகமாக அரங்குகள் அமைக்கப்பட்டுள்ளன. இந்த கண்காட்சியை சுமார் 2.50 கோடி பேர் பார்வையிடுவார்கள் என எதிர்பார்க்கப்படுகிறது. இந்த எக்ஸ்போ கண்காட்சிக்காகவும் சர்வதேச முதலீடுகளை ஈர்க்கவும் முதல்வர் ஸ்டாலின் இப்போது ஐக்கிய அமீரகம் சென்றுள்ளார். முதல்வரின் இந்த 4 நாள் பயணத்தில், ஐக்கிய அமீரகத்தின் முன்னணி வணிக மற்றும் தொழில் நிறுவனங்களின் தலைமை நிர்வாக அதிகாரிகளையும் முதல்வர் ஸ்டாலின் சந்திக்க உள்ளார்.
முக்கிய சந்திப்பு
இந்நிலையில், இன்றைய தினம் ஐக்கிய அமீரகத்தின் பொருளாதார துறை அமைச்சர் மற்றும் வெளியுறவுத் துறை அமைச்சரைச் சந்தித்து அவர்களுடன் முதல்வர் ஸ்டாலின் ஆலோசனை நடத்தினார். ஐக்கிய அமீரகத்தில் உள்ள குறு, சிறு மற்றும் நடுத்தர நிறுவனங்களுக்கும் தமிழ்நாட்டிற்கும் இடையே உள்ள வர்த்தக உறவுகள் குறித்தும் முதலீடு, பொருளாதாரம் தொடர்பாகவும் ஆலோசனை மேற்கொள்ளப்பட்டது.
Recommended Video
Karunanidhi A Life
அப்போது தமிழ்நாட்டில் தொழில் தொடங்க சாதகமான சூழ்நிலை குறித்து இரு அமைச்சர்களிடம் முதல்வர் ஸ்டாலின் எடுத்துரைத்தார். மேலும், இரு அமைச்சர்களையும் அவர் தமிழகம் வருமாறும் அழைப்புவிடுத்தார். இது மட்டுமின்றி முதலீட்டாளர்கள் குழு அனுப்பி வைக்க அழைப்பு விடுத்தார். அப்போது ஐக்கிய அமீரக அமைச்சர்களுக்கு முதல்வர் ஸ்டாலின் நினைவுப் பரிசு வழங்கினார். ஐக்கிய அரபு நாடுகளின் அமைச்சர்களுக்கு 'Karunanidhi A Life', 'Journey of a Civilization Indus to Vaigai' ஆகிய நூல்களை முதலமைச்சர் மு.க.ஸ்டாலின் பரிசாக வழங்கினார். இந்த நிகழ்ச்சியில் தங்கம் தென்னரசு உள்ளிட்ட முக்கிய அதிகாரிகள் கலந்து கொண்டனர்.
Click it and Unblock the Notifications
Sign in with Google