122 டிகிரி பாரன்ஹீட்.. வெளியே கால் வைத்தால் பொசுங்கிடுவோம்.. அமீரகத்தில் உச்சத்திற்கு போன வெப்ப அலை!

Updated: Monday, June 22, 2026, 11:42 [IST]

Subscribe to Oneindia Tamil

துபாய்: ஐக்கிய அமீரகத்தில் இப்போது வெப்பம் உச்சக்கட்டத்தில் இருக்கிறது. எல் நினோ நிகழ்வு காரணமாக அமீரகத்தில் முன்பு எப்போதும் இல்லாத அளவுக்கு வெப்பம் உச்சத்தில் இருக்கிறது. நீச்சல் குளமே சூடாகி, குளிக்க முடியாத அளவுக்கு நிலைமை மோசமாக இருக்கிறது. இதனால் அமீரக மக்கள் பெரும் சிரமத்தைச் சந்தித்து வருகிறார்கள்.

ஐக்கிய அமீரகத்தில் கோடைக் காலம் அதன் உக்கிரத்தைக் காட்டத் தொடங்கியுள்ளது. கடந்த சனிக்கிழமை, ஜூன் 20ம் தேதி அங்கு வெப்பநிலை கிட்டத்தட்ட 50 டிகிரி செல்சியஸை நெருங்கி மக்களை நிலைகுலையச் செய்தது. 50 டிகிரி செல்சியஸ் என்பது 122 டிகிரி பாரன்ஹீட் வெப்பமாகும்.

வெப்பம் உச்சம்

அல் அய்ன் பகுதியில் உள்ள சுவைஹான் (Sweihan) என்ற இடத்தில் அதிகபட்சமாக 49.4 டிகிரி செல்சிஸ் வெப்பநிலை பதிவானதாக அந்நாட்டின் தேசிய வானிலை ஆய்வு மையம் தெரிவித்துள்ளது. அன்றைய தினம் மதியம் 12.45 மணியளவில் இந்த உச்சக்கட்ட வெப்பம் பதிவாகியுள்ளது. அன்றைய தினம் அமீரகத்தில் பதிவான அதிகபட்ச வெப்பம் இதுவாகும்.

இந்த ஆண்டு தொடக்கத்தில் இருந்த வெப்பநிலையுடன் ஒப்பிடும்போது, தற்போது அங்கு வெப்பம் தாறுமாறாக அதிகரித்துள்ளது. உதாரணமாகக் கடந்த ஏப்ரல் 21ம் தேதி அல் தஃப்ரா பிராந்தியத்தில் உள்ள ஒவைத்தைடில் (Owtaid) என்ற இடத்தில் 42.9 டிகிரி செல்சிஸ் மட்டுமே பதிவாகியிருந்தது. அதற்கு சில நாட்களுக்கு முன்பு, ஏப்ரல் 15ம் தேதி அல் அய்னின் உம் அசிமுல் பகுதியில் வெறும் 35 டிகிரி செல்சிஸ் வெப்பநிலையே நிலவியது. ஆனால், இப்போது வெறும் இரண்டு மாத இடைவெளியில் வெப்பநிலை இவ்வளவு வேகமாக உயர்ந்திருப்பது பொதுமக்களிடையே பெரும் கவலையை ஏற்படுத்தியுள்ளது.

நீச்சல் குளம் கூட!

இந்த அதீத வெப்பத்தை அமீரகத்தில் வசிக்கும் மக்கள் நேரடியாக உணரத் தொடங்கியுள்ளனர். துபாயில் வசிக்கும் சாமுவேல் என்ற டேட்டா சயின்டிஸ்ட், மதிய வேளையில் ஒரு சிறிய நடைப்பயணமாக மளிகைக் கடைக்குச் சென்றபோது வெப்பத்தின் தாக்கம் மிகக் கடுமையாக இருந்ததாக கூறுகிறார். வெளியே கால் வைத்தாலே ரொம்ப அசவுகரியமாக இருப்பதாக அவர் குறிப்பிடுகிறார். அதேபோல் அர்ஜன் பகுதியில் வசிக்கும் ராமோஸ் என்பவர், வழக்கமாக மதிய வேளையில் நீச்சல் குளத்தில் குளிப்பதை வழக்கமாகக் கொண்டவர். ஆனால் இப்போது நீச்சல் குளமே சூடாக இருப்பதாகப் புலம்புகிறார்.

வெப்பத்தின் கொடுமை தாங்காமல் பலர் பகல் நேரங்களில் வெளியில் செல்வதை தவிர்த்து, மாலை நேரங்களில் மட்டுமே வெளியே வருகிறார்கள். இந்தளவுக்கு வெப்பம் மோசமாக இருக்கிறது. இந்த ஆண்டு கோடை காலம் வழக்கத்தை விட அதிக வெப்பமாக இருக்கும் என்று வானிலை நிபுணர்கள் ஏற்கனவே எச்சரித்திருந்தனர். தேசிய வானிலை ஆய்வு மையத்தின் நிபுணர் டாக்டர் அகமது ஹபீப் இது குறித்துக் கூறுகையில், "முந்தைய ஆண்டுகளை விட இந்த ஆண்டு கோடை வெப்பம் அதிகமாக இருக்கும். இந்த வெப்ப உயர்வுக்கு உலகளாவிய ரீதியில் பேசப்படும் எல் நினோ காலநிலை மாற்றமே காரணம்" என்றார்.

எல் நினோ

'எல் நினோ' என்பது பசிபிக் பெருங்கடலின் வெப்பமண்டலப் பகுதியில் கடல் நீர் வழக்கத்திற்கு மாறாக வெப்பமடைவதால் ஏற்படும் ஒரு இயற்கை நிகழ்வாகும். இது உலகெங்கிலும் உள்ள மழைப்பொழிவு மற்றும் வெப்பநிலை முறைகளை மாற்றியமைக்கும் திறன் கொண்டது. இதனால் ஐக்கிய அமீரகம் மற்றும் வளைகுடா பிராந்தியத்தில் அதிக வெப்பம் மற்றும் ஈரப்பதம் உருவாகும். இது நிலைமை மேலும் மோசமாக்கும்!

பொதுவாக இரண்டு முதல் ஏழு ஆண்டுகளுக்கு ஒருமுறை உருவாகும் எல் நினோ, 9 முதல் 12 மாதங்கள் வரை நீடிக்கக்கூடியது. எல் நினோ மற்றும் அதற்கு எதிரான லா நினா (La Nina) ஆகிய இரண்டு நிலைகளுக்கும் இடையே உலக வானிலை மாறிக்கொண்டே இருக்கும். இது வறட்சி, வெப்ப அலைகளை உருவாக்கும் அபாயத்தை உருவாக்கும் என்று உலக வானிலை ஆய்வு அமைப்பின் தலைவர் செலஸ்டி சாவ்லோ எச்சரித்துள்ளார்.

வெப்பம் மேலும் உயரும்

இதற்கு முன்பு கடந்த 2023ல் எல் நினோ ஏற்பட்டது. அந்த ஆண்டு வரலாற்றிலேயே இரண்டாவது வெப்பமான ஆண்டாகப் பதிவானது. அதன் தொடர்ச்சியாக 2024ஆம் ஆண்டு, தொழில் மயமாக்கலுக்கு முந்தைய காலத்தை விட 1.55 டிகிரி செல்சியஸ் கூடுதல் வெப்பத்துடன் மிக வெப்பமான ஆண்டாக உருவெடுத்துள்ளது. இதன் தாக்கத்தையே தற்போது ஐக்கிய அரபு அமீரகம் அனுபவித்து வருகிறது. ஏற்கனவே 50 டிகிரி வெப்பத்தால் மக்கள் சிரமப்பட்டு வரும் சூழலில், வெப்பம் மேலும் அதிகரிக்கும் என்று தெரிகிறது. இதனால் மக்கள் தகுந்த பாதுகாப்பு நடவடிக்கைகளை மேற்கொள்ள வேண்டியது அவசியமாகிறது.