கொத்தமல்லி தழையை கொண்டு சென்ற விவசாயி.. திடீர்னு தாளவாடி சாலையை கடந்து போன உருவம்.. ஸ்டன் ஆன ஈரோடு

Updated: Tuesday, March 4, 2025, 11:50 [IST]

Subscribe to Oneindia Tamil

ஈரோடு: ஈரோடு மாவட்டம், தாளவாடியில் புலி நடமாட்டம் இருப்பதாக தெரியவந்துள்ளது. இதனால் அங்குள்ள பொதுமக்கள் கதிகலங்கி போயிருக்கிறார்கள்.. இதனிடையே, சாலையில் புலி நடமாடும் போட்டோ ஒன்று இணையத்தில் வெளியாகி கடும் அதிர்ச்சியை ஏற்படுத்தி வருகிறது.

ஈரோடு மாவட்டம் சத்தியமங்கலம் புலிகள் காப்பகத்தில் மொத்தம் 10 வனச்சரகங்கள் உள்ளன. இங்கு புலி, சிறுத்தை, யானை, மான், கரடி, காட்டெருமை உள்பட பல்வேறு வனவிலங்குகள் வசிக்கின்றன.

இந்த வனப்பகுதி வழியாக அமைந்துள்ள சத்தியமங்கலம்-மைசூர் தேசிய நெடுஞ்சாலையில் பண்ணாரி அம்மன் கோவிலை அடுத்துள்ள அடர்ந்த வனப்பகுதியில் 27 கொண்டை ஊசி வளைவுகளுடன் கூடிய திம்பம் மலைப்பாதை அமைந்துள்ளது.

தமிழக - கர்நாடகா இடையே மிக முக்கிய போக்குவரத்து பகுதியாக திம்பம் மலைப்பாதை அமைந்துள்ளது. இந்த பகுதியில் தினமும் ஆயிரக்கணக்கான வாகனங்கள் சென்று கொண்டிருக்கும். எனினும், இரவு நேரங்களில் இந்த பாதைகளில் புலி, சிறுத்தைகள் நடமாடுவதும் வழக்கமாகும். இதனால் அங்குள்ள மக்கள் அச்சப்பட்டு வருகின்றனர்.

கடந்த மாதம்கூட, 65 வயது முதியவர் ஒருவர் காட்டு யானை தாக்கி உயிரிழந்தார்.. புலிகள் காப்பகத்தில் உள்ள பசுவேஸ்வரர் கோயில் அருகே விறகு சேகரிக்கச் சென்றபோது, முதியவரை காட்டு யானை தாக்கி, சம்பவ இடத்திலேயே உயிரிழந்த சோகம் நடந்தது..

இந்நிலையில், ஈரோடு மாவட்டம், தாளவாடியில் புலி நடமாட்டம் இருப்பது தெரியவந்து, பொதுமக்கள் அச்சமடைந்துள்ளனர்.. ஈரோடு மாவட்டம், தாளவாடி வட்டம் அருள்வாடி அருகே உள்ள கர்நாடகா மாநிலம் அரக்கலவாடி கிராமத்தில், விவசாயி ஒருவர் மல்லித் தழைகளை கொண்டு சென்று கொண்டிருந்தார். வியாபாரத்துக்காக இன்று காலை மல்லித்தழைகளை கொண்டு சென்றார்... அப்போது புலி ஒன்று சாலையில் உலா வந்ததை கண்டு அதிர்ச்சி அடைந்தார்.

விவசாயி உடனே தன்னுடைய செல்போனை எடுத்து, சாலையை கடக்கும் புலியை போட்டோ எடுத்து, அதை சோஷியல் மீடியாவிலும் பகிர்ந்துள்ளார்.. ஈரோடு சுற்றுவட்டார பகுதி மக்கள், புலி நடமாட்டத்தை பார்த்ததுமே பீதியில் உறைந்துள்ளனர்.. வனத்துறையினரும் புலியை பிடிக்கும் நடவடிக்கையில் இறங்கியிருப்பதாக தெரிகிறது.