முந்தும் நாம் தமிழர் கட்சி.. ஆஹா! இளம் வாக்காளர்கள் மத்தியில் சீமானுக்கு அமோக ஆதரவாம்! சர்வே ரிசல்ட்
ஈரோடு கிழக்கு தொகுதியில், இளம் வாக்காளர்கள் மத்தியில் காங்கிரஸுக்கும் நாம் தமிழர் கட்சிக்கும் இடையே முதலிடத்திற்கு கடும் போட்டி நிலவுகிறது.
ஈரோடு : ஈரோடு கிழக்கு தொகுதியில் 21 வயதுக்குக் கீழ் உள்ள இளம் வாக்காளர்களிடையே நடத்தப்பட்ட கருத்துக்கணிப்பில் நாம் தமிழர் கட்சி வேட்பாளர் மேனகா நவநீதனுக்கு பெருவாரியாக ஆதரவு கிடைத்துள்ளது. நாம் தமிழர் கட்சி 29.5 சதவிகிதம் ஆதரவும், காங்கிரஸ் வேட்பாளருக்கு 28.5 சதவிகித ஆதரவும் உள்ளது.
அதாவது, இளம் வாக்காளர்கள் மத்தியில் காங்கிரஸ் வேட்பாளரை விட நாம் தமிழர் கட்சிக்கே அதிக ஆதரவு இருப்பதாக கருத்துக்கணிப்பில் கூறப்பட்டுள்ளது.
ஈரோடு கிழக்கு தொகுதி இடைத்தேர்தலுக்கான பிரச்சாரம் இறுதி கட்டத்தை எட்டியுள்ள நிலையில், பேராசிரியர் டாக்டர் ச.ராஜநாயகம் வழிகாட்டுதலில் நடத்தப்பட்ட மக்கள் ஆய்வு கருத்துக்கணிப்பின் முடிவுகள் வெளியாகியுள்ளன.
அதன்படி, காங்கிரஸ் கட்சி வேட்பாளர் வெற்றி பெறுவார் எனத் தெரிவிக்கப்பட்டுள்ளது.
இளங்கோவனுக்கு வெற்றி வாய்ப்பு
அதன்படி ஈரோடு கிழக்கு தொகுதி இடைத்தேர்தலில் காங்கிரஸ் கட்சி வேட்பாளர் ஈவிகேஎஸ் இளங்கோவனுக்கு 39.5 சதவிகிதம் ஆதரவும், அதிமுக வேட்பாளர் கே.எஸ்.தென்னரசுவுக்கு 24.5 சதவிகித ஆதரவும், நாம் தமிழர் கட்சி வேட்பாளர் மேனகா நவநீதனுக்கு 9.5 சதவிகித ஆதரவும், தேமுதிக வேட்பாளர் எஸ்.ஆனந்த்துக்கு 2 சதவிகித ஆதரவும் கிடைக்கும் என தெரிவிக்கப்பட்டுள்ளது.
சாத்தியமுள்ள உச்சம்
திமுக கூட்டணி சார்பில் போட்டியிடும் காங்கிரஸ் வேட்பாளர் ஈவிகேஎஸ் இளங்கோவன் 39.5 முதல் 65 சதவீத வாக்குகளைப் பெறுவார் என்று கூறப்பட்டுள்ளது. அதிமுக வேட்பாளர் தென்னரசு 24.5 முதல் 41 சதவீத வாக்குகளைப் பெற வாய்ப்புள்ளதாகவும், நாம் தமிழர் கட்சியின் மேனகா நவநீதன் 9.5 முதல் 17 சதவீத வாக்குகளைப் பெறுவார் என்றும் கூறப்பட்டுள்ளது. மேலும், தேமுதிக 4 சதவீத வாக்குகள் வரை பெறக்கூடும் என கருத்துக்கணிப்பு முடிவுகள் தெரிவிக்கின்றன.
முந்தும் நாம் தமிழர் கட்சி
மேலும், முதல் வாக்காளர் உள்ளிட்ட 21 வயதுக்குப்பட்ட இளம் வாக்காளர்கள் மத்தியில் நாம் தமிழர் கட்சிக்கு அமோக ஆதரவு வெளிப்படுவதாக இந்த கருத்துக்கணிப்பின் மூலம் தெரியவந்துள்ளது. 21 வயதிற்குள்ளான வாக்காளர்களிடையே நடத்திய கருத்துக்கணிப்பில், நாம் தமிழர் கட்சி 29.5 சதவிகிதம் ஆதரவும், காங்கிரஸ் வேட்பாளருக்கு 28.5 சதவிகித ஆதரவும் உள்ளது. அதாவது, காங்கிரஸை முந்தி, இளம் வாக்காளர்கள் மத்தியில் செல்வாக்கு பெற்றுள்ளது நாம் தமிழர் கட்சி. அதிமுகவுக்கு 17 சதவிகிதம், தேமுதிகவுக்கு 3 சதவிகித ஆதரவு கிடைத்துள்ளது.
காங்கிரஸ் முன்னிலை
மேலும் கல்வி, தொழில், சாதி, மதம், பாலினம் ஆகிய பிற அனைத்துக் காரணிகளைப் பொறுத்தவரை காங்கிரஸ் வேட்பாளர் முதலிடத்திலும் அதிமுக, நாம் தமிழர் கட்சிகளின் வேட்பாளர்கள் இரண்டாம் மற்றும் மூன்றாம் இடங்களில் உள்ளதாகவும் தெரிவிக்கப்பட்டுள்ளது. இந்த ஆய்வுகளுக்காக ஈரோடு கிழக்கு தொகுதிக்கு உட்பட்ட 135 வாக்குச்சாவடிகளில் மொத்தமாக 1590 பேரிடம் கருத்துக்கணிப்பு நடத்தப்பட்டுள்ளது.
Click it and Unblock the Notifications
Sign in with Google