200 சீட்களை தவெக வெல்லும்.. விஜய் தான் தமிழ்நாட்டை ஆளப்போகிறார்.. செங்கோட்டையன் உறுதி!

Updated: Thursday, April 30, 2026, 9:11 [IST]

Subscribe to Oneindia Tamil

ஈரோடு: தமிழ்நாட்டில் தவெக 200 தொகுதிகளில் வென்று, விஜய் முதலமைச்சராக பொறுப்பேற்பார் என்று அக்கட்சியின் மூத்த நிர்வாகி செங்கோட்டையன் தெரிவித்துள்ளார். மக்கள் அலை அதிகமாக இருப்பதாக கூறிய செங்கோட்டையன், மே 4ஆம் தேதி நடக்கப் போகும் விசில் புரட்சியை உலகமே வியந்து பார்க்கும் என்றும் நம்பிக்கை தெரிவித்துள்ளார்.

தமிழ்நாட்டில் 234 தொகுதிகளுக்கும் ஒரே கட்டமாக ஏப்ரல் 23ஆம் தேதி வாக்குப்பதிவு நடைபெற்றது. மொத்தமாக 4.88 கோடி வாக்களித்த நிலையில், 85.15% வாக்குகள் பதிவாகியது. இந்த நிலையில் தேர்தலுக்கு பிந்தைய கருத்துக்கணிப்புகள் வெளியாகி இருக்கிறது. அதில் எந்த எக்ஸிட் போல்-ம் தவெக 20 இடங்களுக்கு மேல் கைப்பற்றும் என்று சொல்லவில்லை.

ஆனால் ஆக்சிஸ் மை இந்தியா நிறுவனம் மட்டும் தவெக 98 இடங்கள் முதல் 120 இடங்கள் வரை செல்லும் என்று எக்ஸிட் போல் முடிவில் கூறி இருக்கிறது. இது தவெகவினர் மத்தியில் நம்பிக்கையை அதிகரித்துள்ளது. ஏற்கனவே தேர்தலுக்கு பின் யாரை கேட்டாலும் விசில் சின்னத்திற்கு வாக்களித்ததாக கூறி வருவது விவாதமாகி இருக்கிறது.

இந்த நிலையில் எக்ஸிட் போல் முடிவுகள் தொடர்பாக தவெக மூத்த நிர்வாகி செங்கோட்டையன் செய்தியாளர்களை சந்தித்து பேசுகையில், எக்ஸிட் போல் தொடர்பாக தெளிவுபடுத்த விரும்புகிறேன். நிச்சயமாக தவெக 120 சீட்டுகளுக்கு மேல் வெற்றி பெறும். இலங்கை, வங்கதேசம், நேபாளம், பஞ்சாப் உள்ளிட்ட தேர்தல்களில் வந்த கருத்துக்கணிப்புகள் பொய்யாகியது. அதில் மாற்றம் ஏற்பட்டது.

மக்களின் அலை அதிகமாக இருக்கிறது. இதுவரை தமிழ்நாடு மட்டுமல்ல இந்தியாவின் வரலாற்றிலேயே இப்படியொரு புரட்சியை யாரும் பார்த்திருக்க மாட்டார்கள். விஜய்யின் விசில் புரட்சியை மே 4ஆம் தேதி உலகமே பார்க்க போகிறது. 200 தொகுதிகளில் தவெக கட்டாயம் வெல்லும். தமிழ்நாட்டை விஜய் தான் ஆளப் போகிறார். இது மக்களால் தீர்மானிக்கப்பட்டுள்ள ஒன்று என்று தெரிவித்துள்ளார்.

கோபிசெட்டிப்பாளையம் தொகுதியில் செங்கோட்டையன் மீண்டும் போட்டியிட்டுள்ளார். தொடர்ச்சியாக 8 முறை அந்த தொகுதியில் வென்ற செங்கோட்டையன், இம்முறையும் தவெக சார்பாக போட்டியிட்டு வெல்வார் என்று சொல்லப்படுகிறது. அதிமுகவின் வாக்குகளும் அந்த தொகுதியில் செங்கோட்டையன் கைப்பற்றுவதோடு, இளைஞர்கள் மற்றும் பெண்களின் வாக்குகளையும் எடுப்பதாக தெரிகிறது.