மோடி எப்டி பேசி இருக்காரு பாருங்க.. “சர்வாதிகாரம்” - பழைய வீடியோவை காட்டி சந்திரசேகர் ராவ் கேள்வி
ஐதராபாத்: டாலருக்கு நிகரான இந்திய ரூபாய் மதிப்பு குறைந்துள்ளதை விமர்சித்த தெலுங்கானா முதலமைச்சர் சந்திரசேகர் ராவ், பிரதமர் நரேந்திர மோடியின் பழைய வீடியோவை போட்டுக்காட்டி இதையே நாங்களும் சொல்கிறோம் என்று கூறியுள்ளார்.
டாலருக்கு நிகரான இந்திய ரூபாயின் மதிப்பு கடுமையாக வீழ்ச்சியடைந்துள்ள நிலையில், தெலுங்கானா ராஷ்ட்ரிய சமிதி கட்சியின் தலைவரும் முதலமைச்சருமான சந்திரசேகர் ராவ் செய்தியாளர்களை சந்தித்தார்.
அப்போது பேசிய அவர், "இந்திய ரூபாயின் மதிப்பு இதுவரை எந்த பிரதமரின் ஆட்சிகாலத்திலும் இல்லாத அளவுக்கு நரேந்திர மோடியின் ஆட்சியின் கீழ் வேகமாக சரிந்திருக்கிறது. என்றார்."
மோடியின் பழைய வீடியோ
அப்போது அங்கிருந்த தொலைக்காட்சி ஒன்றில் காங்கிரஸ் ஆட்சியில் இருந்தபோது பிரதமர் நரேந்திர மோடி பேசிய வீடியோவை செய்தியாளர்கள் முன் அவர் போட்டுக்காட்டினார். அதில் பேசும் பிரதமர் நரேந்திர மோடி, "நேபாளம், வங்கதேசம், இலங்கை ஆகிய நாடுகளின் நாணயங்களின் மதிப்பு சரியவில்லை. பின்னர் ஏன் இந்திய ரூபாயின் மதிப்பு சரிகிறது? அரசாங்கம் இதற்கு பதில் சொல்ல வேண்டும். நாட்டுக்கு அரசின் பதில் தேவைப்படுகிறது." என்று கூறினார்.
நேர்மையானவரா?
உடனே வீடியோவை நிறுத்திய சந்திரசேகர் ராவ், "நாங்களும் இதையேதான் பாஜக ஆளும் மத்திய அரசிடம் கேட்கிறோம். நீங்கள் பதில் சொல்ல வேண்டும். இந்திய ரூபாயின் மதிப்பு இதுவரை இல்லாத அளவு மோசமாகி இருக்கிறது. பிரதமர் நரேந்திர மோடி ஒருவேளை தன்னை பற்றி தான் சொல்லிக்கொள்வதைபோல நேர்மையானவராக இருந்தால், இதுகுறித்து ஏன் தற்போது பேச மறுக்கிறார்? நீங்கள் கேள்வி கேட்டால் மற்றவர்களும் கேட்பார்கள்.
சர்வாதிகாரம்
நரேந்திர மோடி அரசாங்கத்துக்கு ஜனநாயகத்தின் மீது நம்பிக்கை இல்லை. இது ஜனநாயகமா அல்லது சர்வாதிகாரமா? இந்த நாட்டில் நீங்கள் என்ன செய்துகொண்டிருக்கிறீர்கள்? ஜனநாயகத்தின் மீது நம்பிக்கை இழந்த நரேந்திர மோடி அரசு சர்வாதிகாரம் செய்து வருகிறது. நாட்டின் ஒவ்வொருவரின் கண்முன்பாகவும் இது நடந்துகொண்டிருக்கிறது." என்றார்.
இந்திய ரூபாய் மதிப்பு
கடந்த வெள்ளிக்கிழமை டாலருக்கு நிகரான இந்திய ரூபாயின் மதிப்பு தொடர்ந்து சரிவை சந்தித்து வருகிறது. அண்மையில் 18 காசுகள் சரிவடைந்த இந்திய ரூபாய் மதிப்பு, 79.26 ஆக உயர்ந்தது. கடந்த செவ்வாய் கிழமை இதுவரை இல்லாத அளவுக்கு இந்திய ரூபாயின் மதிப்பு 42 காசுகள் சரிவடைந்தது. கடந்த ஜூன் மாதம் இந்தியாவின் வர்த்தக பற்றாக்குறையும் கடுமையாக அதிகரித்தது.
Click it and Unblock the Notifications
Sign in with Google