ஹைதராபாத் சாலைக்கு டொனால்ட் டிரம்ப் பெயர்.. காங்கிரஸ் அரசு அறிவிப்பு.. பின்னணி என்ன?

ஹைதராபாத்: ஹைதராபாத்தில் உள்ள சாலைக்கு அமெரிக்க அதிபர் டொனால்ட் டிரம்பின் பெயரை சூட்ட காங்கிரஸ் முதல்வர் ரேவந்த் ரெட்டி முடிவு செய்துள்ளார். அதுமட்டுமின்றி உலகளாவிய நிறுவனங்களை பெருமைப்படுத்தும் வகையில் அதன் பெயர்களும் சாலைகளுக்கு சூட்டப்படும் என்று அதிகாரப்பூர்வமான அறிவிப்பை தெலுங்கானா அரசு அறிவித்துள்ளது.

தெலுங்கானாவில் காங்கிரஸ் கட்சியின் ஆட்சி நடக்கிறது. முதல்வராக ரேவந்த் ரெட்டி உள்ளார். இந்நிலையில் தான் இந்நிலையில் தான் இன்று தெலுங்கானா அரசு முக்கிய அறிவிப்புகளை வெளியிட்டுள்ளது.

அதாவது தலைநகர் ஹைதராபாத்தில் உள்ள சாலைகளுக்கு டொனால்ட் டிரம்ப் மற்றும் கூகுள் நிறுவனத்தின் பெயர்கள் சூட்டப்பட உள்ளதாக தெரிவிக்கப்பட்டுள்ளது. இதுதொடர்பாக தெலுங்கானா அரசு இன்று வெளியிட்டுள்ள அறிவிப்பில் கூறப்பட்டுள்ளதாவது:

தெலுங்கானா தலைநகர் ஹைதரபாாத்தில் போக்குவரத்து நெரிசலை சரிசெய்யும் வகையில் அமைக்கப்படும் ஆர்ஆர்ஆர் (Regional Ring Road) எனப்படும் பசுமை வழி சாலைக்கு மறைந்த தொழிலதிபர் ரத்தன் டாடாவின் நினைவாக அவரது பெயர் சூட்ட முடிவு செய்யப்பட்டுள்ளது.

அதேபோல் ஹைதராபாத்தில் உள்ள அமெரிக்க துணைத் தூதரகத்தை ஒட்டிய உயர்மட்ட சாலைக்கு அமெரிக்க அதிபர் டொனால்ட் டிரம்பின் பெயர் வைக்க முடிவு செய்யப்பட்டுள்ளது.அதாவது டொனால்ட் டிரம்ப் அவென்யூ என்று பெயர் சூட்டப்படும் என்று தெரிவிக்கப்பட்டுள்ளது. இதற்கு அனுமதி கேட்டு தெலுங்கானா அரசு மத்திய வெளியுறவுத்துறை அமைச்சகம் மற்றும் அமெரிக்க தூதரகத்துக்கு கடிதம் எழுத உள்ளது.

மேலும் தற்போது ‛கூகுள் மேப்' பலருக்கும் வழிகாட்டி வருகிறது. அதனை பாராட்டும் வகையில் ஹைதராபாத்தில் உள்ள சாலைக்கு ‛கூகுள் ஸ்ட்ரீட்' என பெயர் சூட்டப்படும் என்றும் கூறப்பட்டுள்ளது. அமெரிக்காவுக்கு வெளியே விரைவில் கூகுளின் பெரிய வளாகமாக வர உள்ள இடத்தில் அமையும் சாலைக்கு இந்த பெயர் வைக்கப்படும்'' என தெரிவிக்கப்பட்டுள்ளது.

முன்னதாக இந்த ஆண்டின் தொடக்கத்தில் டெல்லியில் அமெரிக்க-இந்தியா ஸ்ரேட்டிஜிக் க பார்ட்னர்ஷிப் மன்றத்தின்(USISPF) ஆண்டு மாநாடு நடந்தது. இதில் தெலுங்கனா முதல்வர் ரேவந்த் ரெட்டி பங்கேற்று பேசினார். அப்போது ஹைதராபாத்தில் உள்ள முக்கியமான சாலைகளுக்கு உலகளாவிய நிறுவனங்களின் பெயர்களை சூட்ட வேண்டும் என்று அவர் முன்மொழிந்தார். அதன்படி ரேவந்த் ரெட்டி இந்த அறிவிப்பை வெளியிட்டுள்ளது.

இந்த அறிவிப்பை தொடர்ந்து விரைவில் அங்கு செயல்பட்டு வரும் உலகளாவிய நிறுவனங்கள் அமைந்துள்ள இடங்களுக்கு செல்லும் சாலைகளின் பெயர்களும் மாற்றம் செய்யப்பட வாய்ப்புள்ளதாக சொல்லப்படுகிறது.

அதன்படி விரைவில் மைக்ரோசாப்ட், விப்ரோ உள்ளிட்ட அலுவலகங்கள் இருக்கும் இடங்களின் சாலைகளுக்கும் அந்த நிறுவனத்தின் பெயர்கள் சூட்டப்படும் என்று எதிர்பார்க்கப்படுகிறது. மைக்ரோசாப்ட் நிறுவன பகுதியில் உள்ள சாலைக்கு மைக்ரோசாப்ட் ரோடு என்றும், விப்ரோ அலுவலகத்தில் உள்ள ரோட்டுக்கு விப்ரோ சந்திப்பு என்றும் பெயர் வைக்கப்படலாம் என்ற தகவல் வெளியாகி உள்ளது.

பொதுவாக இப்படியான உலகளாவிய நிறுவனங்களின் பெயர்களை ஒவ்வொரு இடத்துக்கு சூட்டும்போது வெளிநாட்டு நிறுவனங்கள் தொழில் தொடங்க ஹைதராபாத் மற்றும் தெலுங்கானாவுக்கு முன்னுரிமை கொடுக்கும். இதன்மூலம் முதலீடுகளை ஈர்த்து வேலைவாய்ப்புகளை அதிகப்படுத்த முடியும் என்று ரேவந்த் ரெட்டி நம்புகிறார்.

English summary

The Telangana government proposal, a high-profile road along the United States Consulate General in Hyderabad will be named ‘Donald Trump Avenue'.