சந்திரபாபு நாயுடுவுக்கு ஷாக்-தெலுங்கானா தெலுங்குதேசம் கட்சி மாஜி தலைவர் பிஆர்எஸ் கட்சிக்கு தாவினார்!
ஹைதராபாத்: தெலுங்கானா மாநில தெலுங்குதேசம் கட்சியின் முன்னாள் தலைவர் கசானி ஞானேஷ்வர் இன்று முதல்வர் கே.சந்திரசேரக ராவ் முன்னிலையில் பிஆர்எஸ் கட்சியில் இணைந்தார்.
ஆந்திரா மாநில அரசியல் கட்சியான தெலுங்குதேசம், தெலுங்கானாவில் செல்வாக்கு பெற முடியவில்லை. தெலுங்கானாவில் 2014-ம் ஆண்டு சட்டசபை தேர்தலில் 14.5% வாக்குகளைப் பெற்று 15 இடங்களைக் கைப்பற்றியது தெலுங்கு தேசம் கட்சி. ஆனால் 2018-ம் ஆண்டு சட்டசபை தேர்தலில் வெறும் 2 இடங்களில்தான் அக்கட்சியால் வெல்ல முடிந்தது. தெலுங்கு தேசம் கட்சியின் வாக்கு சதவீதம் வெறும் 3.5% ஆகவும் வீழ்ந்தது. அன்று முதல் இன்று வரை தெலுங்கானாவில் தெலுங்குதேசம் கட்சியால் எழவே முடியவில்லை.
இந்த நிலையில் தற்போதைய சட்டசபை தேர்தலில் தெலுங்குதேசம், ஜனசேனா, பாஜக இணைந்து போட்டியிடக் கூடும் என்கிற எதிர்பார்ப்பு அக்கட்சியினரிடம் இருந்து வந்தது. ஆனால் சந்திரபாபு நாயுடு சிறையில் அடைக்கப்பட்ட நிலையில் தெலுங்கானா தேர்தலில் தெலுங்குதேசம் கட்சி போட்டியிடவே செய்யாது என அறிவிக்கப்பட்டது. இதனால் தெலுங்கானா தெலுங்குதேசம் கட்சியினர் அதிர்ச்சி அடைந்தனர்.
மேலும் தெலுங்கு தேசம் கட்சி தலைமையின் இந்த முடிவுக்கு எதிர்ப்பு தெரிவித்து தெலுங்கானா மாநில தலைவர் கசானி ஞானேஷ்வர் தமது பதவியை மட்டுமல்ல ஒட்டுமொத்த கட்சிக்கே குட்பை சொல்லிவிட்டார். அவரைப் போல தெலுங்குதேசம் கட்சியின் பலரும் விரக்தி அடைந்துவிட்டனர்.
இந்நிலையில் தெலுங்கானா முதல்வர் கே.சந்திரசேகர ராவ் முன்னிலையில் கசானி ஞானேஷ்வர் இன்று பி.ஆர்.எஸ். கட்சியில் இணைந்தார். அவருக்கு பிஆர்எஸ் கட்சி துண்டை அணிவித்து அரவணைத்துக் கொண்டார் முதல்வர் சந்திரசேகர ராவ். மேலும் கசானி ஞானேஷ்வருக்கும் அவரது ஆதரவாளர்களுக்கும் உரிய கவுரவத்தையும் எதிர்காலத்தையும் பிஆர்எஸ் கட்சி வழங்கும் எனவும் முதல்வர் சந்திரசேகர ராவ் உறுதியளித்தார்.
முன்னதாக தெலுங்குதேசம் கட்சியை போல ஆந்திரா முதல்வர் ஜெகன் மோகன் ரெட்டியின் சகோதரி ஒய்.எஸ்.ஷர்மிளாவின் ஒய்.எஸ்.ஆர்.டி.பி. கட்சியும் தேர்தலில் போட்டியிடவில்லை என அறிவித்தது. அத்துடன் தெலுங்கானா சட்டசபை தேர்தலில் காங்கிரஸ் கட்சியை ஆதரிப்பதாகவும் அறிவித்தார் ஒய்.எஸ்.ஷர்மிளா. காங்கிரஸ் கட்சியுடன் கூட்டணி பேச்சுவார்த்தை நடத்தியும் கை கொடுக்காத நிலையில் ஒய்.எஸ்.ஷர்மிளா இந்த முடிவை அறிவித்திருந்தது குறிப்பிடத்தக்கது.
Click it and Unblock the Notifications
Sign in with Google