பாலியல் பலாத்காரம் செய்ததற்கு ஆதாரம் இருக்கா! 21 வயது பெண்ணிடம் கேட்கும் ஜானி மாஸ்டரின் மனைவி

Updated: Saturday, September 21, 2024, 11:14 [IST]

Subscribe to Oneindia Tamil

ஹைதராபாத்: என் கணவர் மீதான பாலியல் குற்றச்சாட்டு நிரூபிக்கப்பட்டால் அவரை விட்டு விலகத் தயார் என ஜானி மாஸ்டரின் மனைவி சுமலதா பேட்டியளித்துள்ளார். தன்னிடம் உதவி நடன இயக்குநராக பணியாற்றிய 21 வயது இளம் பெண்ணை பாலியல் பலாத்காரம் செய்ததாக ஜானி மீது குற்றச்சாட்டு ஏற்பட்டு அவர் தற்போது சிறையில் உள்ளார்.

இதுகுறித்து நடன இயக்குநர் ஜானியின் மனைவி சுமலதா என்கிற ஆயிஷா கூறியிருப்பதாவது: புகார் அளித்திருக்கும் அந்த பெண் சிறுமியாக இருந்த போது மேடை நிகழ்ச்சிகளில் நடனமாடி வந்தார். பிறகு சினிமா வாழ்க்கையை பார்த்து சொகுசாக இருக்க ஆசைப்பட்டு இந்த துறைக்கு வந்தார்.

என் கணவரிடம் வேலைக்கு சேர்ந்தார். ஹைதராபாத்தில் உள்ள திரைப்பட அசோசியேஷனில் உறுப்பினராக சேரக் கூட பணம் இல்லாமல் இருந்த அவருக்கு உதவியது என் கணவர்தான். நடன இயக்குநர் அல்லது கதாநாயகியாக வர வேண்டும் என அந்த பெண் ஆசைப்பட்டார்.

மும்பையில் வைத்து எனது கணவர் அவரை பலாத்காரம் செய்தார் என சொல்கிறாரே இதை ஏன் அப்போதே சொல்லவில்லை. இதற்கு என்ன ஆதாரம் இருக்கிறது? அந்த பெண் சொன்னது போல் பாலியல் பலாத்காரத்திற்குள்ளாகி இருந்தால் எதற்காக தொடர்ந்து என் கணவரிடம் வேலை பார்க்க வேண்டும் ? அவரிடம் பணிபுரிவது தனது அதிர்ஷடம் என ஏன் சொல்ல வேண்டும்?

என் கணவர் மீதான குற்றச்சாட்டு நிரூபிக்கப்பட்டால் அவரை விட்டு விலக நான் தயார் என ஆயிஷா தெரிவித்துள்ளார். 21 வயது பெண் 16 வயதாக இருக்கும் போதிலிருந்தே தன்னை பாலியல் பலாத்காரம் செய்ததாக புகார் அளித்திருந்தார். இந்த நிலையில் ஜானி மாஸ்டர் தலைமறைவானார்.

பின்னர் அவரை போலீஸார் தேடி வந்த நிலையில் அவரை பெங்களூரில் வைத்து கைது செய்தனர். இதையடுத்து அவரை நேற்று ஹைதராபாத் உப்பரப்பள்ளி நீதிமன்றத்தில் ஆஜர்படுத்தியதில் அவரை 14 நாட்கள் சிறையில் அடைக்க நீதிபதி உத்தரவிட்டார்.

அதாவது அந்த பெண் ஜானி மாஸ்டருடன் பணியாற்றிய போது சென்னை, ஊட்டி, பெங்களூர், ஹைதராபாத், மும்பை உள்ளிட்ட பல்வேறு சூட்டிங் ஸ்பாட்டுகளுக்கு தன்னை அழைத்து சென்று பாலியல் பலாத்காரம் செய்ததாக புகார் கூறியுள்ளார்.

தெலுங்கு திரையுலகில் அல்லு அர்ஜுன், ராம் சரண், ரவி தேஜா உள்ளிட்டோருக்கு நடனத்தை இயக்கி புகழ் பெற்றவர் ஜானி. தமிழிலும் நடிகர்கள் விஜய், தனுஷ் உள்ளிட்டோருக்கு இவர் நடன இயக்குநராக இருந்துள்ளார். காந்த கண்ணழகி, ரவுடி பேபி, செல்லம்மா, ரஞ்சிதமே, அரபிக் குத்து, ஜாலியோ ஜிம்கானா, ஜெயிலர் படத்தில் காவாலா, மேகம் கருக்காதா, புஷ்பா படத்தில் ஸ்ரீவல்லி உள்ளிட்ட சூப்பர் ஹிட் பாடல்களுக்கு நடனத்தை அமைத்துள்ளார். மேகம் கருக்காதா பாடலுக்கு ஜானி மாஸ்டருக்கு தேசிய விருது கிடைத்தது.