இஸ்லாத்தில் இது மிக கொடூரமான குற்றம்... தலித் இளைஞர் படுகொலைக்கு அசதுத்தீன் ஒவைசி கடும் கண்டனம்

ஐதராபாத்: இஸ்லாமிய பெண்ணை காதல் திருமணம் செய்துகொண்ட தலித் இளைஞர் கொலை செய்யப்பட்டது இஸ்லாத்தில் மிக மோசமான குற்றம் என ஏ.ஐ.எம்.ஐ.எம். கட்சித் தலைவர் அசதுத்தீன் ஒவைசி தெரிவித்துள்ளார்.

தெலுங்கானா தலைநகர் ஐதராபாத்தின் சரூர் நகரில் நாகராஜு என்ற தலித் இளைஞர் இஸ்லாமிய பெண்ணை காதலித்து திருமணம் செய்துகொண்டார். இதற்கு பெண்ணின் குடும்பத்தினர் சம்மதம் தெரிவிக்கவில்லை என்று கூறப்படுகிறது.

இந்த நிலையில் கடந்த புதன்கிழமை தனது மனைவியுடன் பைக்கில் சென்றுகொண்டிருந்த நாகராஜுவை பெண்ணின் சகோதரர் சையது மொபின் அஹ்மத் தனது நண்பர் மசூத் அஹமதுவுடன் சேர்ந்து குத்திக் கொலை செய்தார்.

பரபரப்பான சாலையில் பொதுமக்கள் மத்தியில் நிகழ்ந்த கொடூர கொலை சம்பவம் அம்மாநிலம் முழுவதும் பெரும் பரபரப்பை ஏற்படுத்தியது. இதற்கு ஐதராபாத் எம்.பியும், ஏ.ஐ.எம்.ஐ.எம். கட்சியின் தலைவருமான அசதுத்தீன் ஒவைசி கடும் கண்டனம் தெரிவித்துள்ளார். "குற்றம்சாட்டப்பட்டவர்கள் உடனடியாக கைது செய்யப்பட்டு உள்ளனர்.

ஆனால், சில சுயநலவாத கட்சிகள் இந்த சம்பவத்துக்கு வேறு நிறத்தை பூச முயல்கின்றனர். ஐதராபாத்தில் நாகராஜு கொல்லப்பட்டது இஸ்லாத்துக்கே எதிரானது. அந்த பெண் தனது விருப்பத்தின்பேரிலேயே இந்ததிருமணத்தை செய்திருக்கிறார். சட்டமும் அதற்கு அனுமதி அளித்துள்ளது.

இதற்காக அவரது கணவரை கொலை செய்ய பெண்ணின் சகோதரருக்கு எந்த விதமான உரிமையும் கிடையாது. இது மிகப்பெரிய குற்றம். இஸ்லாமிய சட்டத்தின் அடிப்படையிலும் இது மாபெரும் குற்றமாக பார்க்கப்படுகிறது. குற்றம்சாட்டப்பட்ட பெண்ணின் சகோதரரை உடனடியாக தண்டிக்க வேண்டும்." என வலியுறுத்தி இருக்கிறார்.

English summary

This is biggest crime in Islam - Asaduddin owaisi condemn Dalit youth murdered for marring muslim girl: இஸ்லாமிய பெண்ணை காதல் திருமணம் செய்துகொண்ட தலித் இளைஞர் கொலை செய்யப்பட்டது இஸ்லாத்தில் மிக மோசமான குற்றம் என ஏ.ஐ.எம்.ஐ.எம். கட்சித் தலைவர் அசதுத்தீன் ஒவைசி தெரிவித்துள்ளார்.