6 வயது மகளின் 2 கிட்னியையும் காணோம்... எய்ம்ஸ் டாக்டர் மீது தந்தை பரபரப்புப் புகார்

டெல்லி: அறுவைச் சிகிச்சை மூலம் தனது 6 வயது மகளின் இரண்டு சிறுநீரகங்களையும் அகற்றி விட்டதாக எய்ம்ஸ் டாக்டர் மீது தந்தை ஒருவர் போலீசில் பரபரப்புப் புகார் அளித்துள்ளார்.

உத்திரப்பிரதேசம் பரேலி பகுதியைச் சேர்ந்தவர் பவன்குமார். இவரது 6 வயது மகள் கடந்த சில ஆண்டுகளாக சிறுநீரகக் கோளாறால் அவதிப் பட்டு வந்துள்ளார். எனவே, கடந்தாண்டு சிகிச்சைக்காக மகளை டெல்லி எய்ம்ஸ் மருத்துவமனைக்கு அழைத்துச் சென்றார் பவன்குமார்.

அங்கு அச்சிறுமியைப் பரிசோதித்துப் பார்த்த மருத்துவர்கள், அவரது இடது பக்க சிறுநீரகம் கடுமையாக பாதிக்கப் பட்டுள்ளதாகவும், வலது பக்க சிறுநீரகம் ஆரோக்கியமாக இருப்பதாகவும் தெரிவித்துள்ளனர்.

மேலும், பாதிப்படைந்துள்ள சிறுநீரகத்தை நீக்கி விடுவது நல்லது என குழந்தைகள் சிறப்பு மருத்துவர் ஒருவர் தெரிவித்துள்ளார். அதன்படி, அச்சிறுமியின் சிறுநீரகம் அறுவைச் சிகிச்சை மூலம் நீக்கப் பட்டது.

அறுவைச் சிகிச்சை முடிந்த சில தினங்களிலேயே சிறுமி கடுமையான வலியால் அவதிப்பட்டுள்ளார். அப்போது எடுக்கப் பட்ட ஸ்கேன் ரிப்போர்ட்டில் சிறுமியின் வயிற்றுப் பகுதியில் சிறுநீரகங்களே இல்லை எனக் கூறப்பட்டிருந்தது. இதனைக் கண்டு அதிர்ச்சி அடைந்த பவன்குமார், இது தொடர்பாக மருத்துவர்களிடம் விசாரித்துள்ளார்.

ஆனால், பவன்குமாரின் கேள்விகளுக்கு மருத்துவர்கள் சரிவர பதிலளிக்கவில்லை எனக் கூறப்படுகிறது. எனவே, இது தொடர்பாக ஹவுஸ் காஸ் போலீசில் புகார் அளித்துள்ளார் பவன்குமார்.

இந்த புகாரின் பேரில் மூத்த மருத்துவ பேராசிரியர் தலைமையில் விசாரணை நடத்த கமிட்டி ஒன்றை எய்ம்ஸ் நிர்வாகம் அமைத்துள்ளது. இந்த கமிட்டி நடத்திய விசாரணைக்கு பின் ஏற்கனவே கடந்த 20ம் தேதி கூட்டம் ஒன்றை கூட்டியது. பின்னர் மீண்டும் இந்த வாரத்தில் விசாரணையை இறுதி செய்து அறிக்கையை தாக்கல் செய்ய உள்ளது.

இந்தியாவின் தரம் உயர்ந்த அரசு மருத்துவமனைகளில் முதன்மையானதாகக் கருதப்படும் எய்ம்ஸ் மருத்துவமனையில் நடந்துள்ள இந்த சம்பவம் பரபரப்பை ஏற்படுத்தியுள்ளது. அதிலும் இரண்டு சிறுநீரகங்களும் திருடப் பட்டுள்ளதாக போலீசில் அளிக்கப் பட்டுள்ள புகாரால் மக்கள் மத்தியில் குழப்பம் ஏற்பட்டுள்ளது.

English summary

The father of a six-year-old girl has alleged that a doctor at Delhi's AIIMS hospital removed both her kidneys during surgery.