"மோட்டோ"வை விஞ்சிய கேஜ்ரிவால் அண்ட் கோ... சமோசாவுக்கு மட்டும் ரூ1 கோடி செலவு!! #kejriwal #samosa

டெல்லி: டெல்லியில் 18 மாதங்களில் முதல்வர் கேஜ்ரிவால் மற்றும் ஆம் ஆத்மி அமைச்சர்கள் ரூ1 கோடிக்கு சமோசா மற்றும் டீக்கு செலவு செய்திருக்கின்றனர்.

அரவிந்த் கேஜ்ரிவால் தலைமையில் ஆம் ஆத்மி கட்சியின் ஆட்சி நடைபெற்று வருகிறது. கடந்த 18 மாதங்களில் கேஜ்ரிவால் மற்றும் அமைச்சர்களுக்காக சமோசா, டீ குடிக்க ரூ.1 கோடி செலவு செய்யப்பட்டு இருப்பது தெரிய வந்துள்ளது.

டெல்லியை சேர்ந்த விவேக் கர்க் என்பவர் அந்த மாநில அமைச்சர்கள், டீ மற்றும் சமோசாவுக்கு செய்துள்ள செலவு விவரங்களை தெரிவிக்குமாறு தகவல் உரிமை சட்டத்தின் மூலம் விண்ணப்பித்து இருந்தார்.

கேஜ்ரிவால் ரூ.47.29 லட்சம்

அவருக்கு டெல்லி அரசின் பொது நிர்வாக துறை துணை செயலாளர் கிருஷ்ணலால் அளித்த பதில்: டெல்லி முதல்வர் கெஜ்ரிவால் தன்னை பார்க்க வந்த விருந்தினர்களுக்கு சமோசா, தேனீருக்காக மொத்தம் ரூ.47.29 லட்சம் செலவு செய்து இருக்கிறார்கள்.

மணிஷ் சிசோடியா

துணை முதல்வர் மணிஷ்சிசோடியா ரூ.11.28 லட்சமும், டிஸ்மிஸ் செய்யப்பட்ட கோபால்ராய் ரூ.11.06 லட்சமும், சந்தீப் குமார் ரூ.9.11 லட்சமும் சுகாதாரதுறை அமைச்சர் சத்யேந்திர ஜெயின் ரூ.9.10 லட்சமும் சுற்றுலா துறை அமைச்சர் மிஸ்ரா ரூ.6.30 லட்சமும் செலவு செய்து இருக்கிறார்கள்.

ரூ.5.89 லட்சம்

குறைந்த பட்சமாக உணவு துறை அமைச்சர் இம்ரான் உசேன் மட்டும் ரூ.5.89 லட்சம் செலவு செய்து இருக்கிறார் என்று அந்த பதிலில் தெரிவிக்கப்பட்டுள்ளது.

ரூ1 கோடி

கேஜ்ரிவால் மற்றும் அவரது கேபினட் அமைச்சர்கள் 6 பேர் சமோசா, டீக்காக மொத்தமாக ரூ.1 கோடி செலவு செய்துள்ளனர். இவ்வாறு அந்த பதிலில் தெரிவிக்கப்பட்டுள்ளது.

படா மோட்டோவாக இருக்காங்களே!

English summary

Chief Minister Arvind Kejriwal and his six-member cabinet have spent over Rs 1 crore on tea and snacks for their guests in the past 18 months