தமிழகத்திலும் ஆம் ஆத்மி போட்டியிடும்- பிரஷாந்த் பூஷன்

இடிந்தகரை: தமிழகத்தில் நாடாளுமன்றத் தேர்தலில் ஆம் ஆத்மி கட்சி போட்டியிடும் என்று அக்கட்சியைச் சேர்ந்த பிரபல வழக்கறிஞர் பிரஷாந்த் பூஷன் தெரிவித்துள்ளார்.

பூஷன், ஆம் ஆத்மி கட்சியின் அரசியல் விவகாரக் குழுத் தலைவராக இருக்கிறார். அவருக்கு கேரளாவில் சிபிஎம் வக்கீல்கள் சங்கம் சார்பி்ல் பாராட்டு விழா நடத்தி விருதும் வழங்கப்பட்டது.

இதற்காக வந்த அவர் பின்னர் இடிந்தகரைக்கு வந்தார். அங்கு கூடங்குளம் அணு மின் நிலைய எதிர்ப்புக் குழுவினரைச் சந்தித்து ஆலோசனை நடத்தினார். அப்போது ஆம் ஆத்மி கட்சியில் இணையுமாறு உதயகுமாரனுக்கு அவர் அழைப்பு விடுத்ததாக தெரிகிறது.

பின்னர் செய்தியாளர்களிடம் பூஷன் பேசுகையில், காங்கிரஸ் ஆதரவுடன் டெல்லியில் ஆட்சி அமைத்துள்ளோம். அவர்கள் எங்களது ஆட்சிக்கு எதிராக முடிவு எடுப்பதற்கு முன், மக்களுக்கு நல்லது செய்வோம்.

மக்களுக்கு அடிப்படையான முற்போக்கு அரசியல் மாற்றங்களை கொண்டு வருவோம். வரும் லோக்சபா தேர்தலில் தமிழகம் உட்பட அனைத்து மாநிலங்களிலும் அதிக தொகுதிகளில் போட்டியிடுவோம் என்றார் அவர்.

English summary

AAP will contest in TN LS polls, said party senior leader Prashant Bhushan.