கடந்த தேர்தலில் துல்லியமாக கணித்த ABP C Voter: இப்போ எக்சிட் போல் முடிவு இதுதான்! ஆஹா.. காங்கிரஸ்?

போபால்: மத்திய பிரதேசத்தில் காங்கிரஸ் கட்சி 113 முதல் 137 இடங்களிலும், பாஜக 88 முதல் 112 இடங்கள் வரை பிடிக்கும் என ஏபிசி - சி வோட்டர் எக்சிட் போல் ரிசல்ட் தெரிவித்துள்ளது.

5 மாநில சட்டசபை தேர்தல் நடைபெற்று முடிந்துள்ளது. மத்திய பிரதேசத்தில் உள்ள 230 சட்டசபை தொகுதிகளுக்கும் நவம்பர் 17ம் தேதி ஒரே கட்டமாக வாக்குப்பதிவு நடந்தது. ம.பியில் 73.71 சதவீத ஓட்டுகள் பதிவாகி உள்ளன என தேர்தல் ஆணையம் தெரிவித்துள்ளது. 5 மாநிலங்களின் சட்டசபை தேர்தல் முடிவுகள் டிசம்பர் 3ஆம் தேதி அறிவிக்கப்பட உள்ளது.

மத்திய பிரதேச தேர்தல்: மத்திய பிரதேசத்தில் கடந்த 2003, 2008, 2013ஆம் ஆண்டுகளில் நடைபெற்ற தேர்தலில் பாஜக வென்று ஆட்சியைப் பிடித்திருந்தது. 2018 சட்டமன்றத் தேர்தலில் காங்கிரஸ் 114 இடங்களிலும், பாஜக 109 இடங்களிலும் வெற்றி பெற்றன. சமாஜ்வாதி, பகுஜன் சமாஜ் மற்றும் சுயேச்சை எம்எல்ஏக்கள் ஆதரவுடன் காங்கிரஸ் ஆட்சி அமைத்தது. ம.பி முதல்வராக கமல்நாத் பொறுப்பேற்றார்.

காங்கிரஸ் கட்சியின் முன்னணி தலைவராக இருந்த ஜோதிராதித்ய சிந்தியா 22 எம்.எல்.ஏக்களுடன் பாஜகவுக்கு சென்றதால் ஒன்றரை ஆண்டுகளில் காங்கிரஸ் ஆட்சி கவிழ்ந்தது. பின்னர் நடைபெற்ற இடைத்தேர்தலில் பாஜக அதிக இடங்களில் வென்று, மெஜாரிட்டியை நிரூபித்து ஆட்சியைப் பிடித்தது. இந்நிலையில், 5வது முறையாக மத்திய பிரதேசத்தில் ஆட்சி அமைக்கும் நம்பிக்கையில் உள்ளது பாஜக.

ஜெயிக்க விட்ருவோமா? மத்திய பிரதேசத்தில் ஷாக் கொடுக்கும் பாஜக.. இது Dainik bhaskar எக்ஸிட் போல்!


மத்திய பிரதேச மாநிலத்தில் மொத்தம் 230 தொகுதிகள் உள்ளன. பாஜக, காங்கிரஸ் இடையே கடுமையான போட்டி நிலவி வரும் இந்த மாநிலத்தில் ஆட்சியைப் பிடிக்க 116 தொகுதிகளில் வெற்றி பெற வேண்டும். தேர்தலுக்குப் பிந்தைய கருத்துக்கணிப்புகள், மத்திய பிரதேசத்தில் கடுமையான போட்டி நிலவும் என்பதை உறுதி செய்துள்ளன.

ஏபிபி சி வோட்டர் கணிப்பு: ஏபிபி - சி வோட்டர் நடத்திய தேர்தலுக்குப் பிந்தைய கருத்துக்கணிப்பின் படி, மத்திய பிரதேசத்தில் காங்கிரஸ் கட்சி 113 முதல் 137 இடங்களிலும், பாஜக 88 முதல் 112 இடங்களிலும் வெற்றி பெறும் எனக் கணிக்கப்பட்டுள்ளது. மற்றவர்கள் 2-8 இடங்கள் வரை வெல்ல வாய்ப்பு உள்ளதாக கணிக்கப்பட்டுள்ளது.

காங்கிரஸ் கட்சி : 113-137

பாஜக: 88-112

மற்றவை: 2-8

கடந்த முறை துல்லிய கணிப்பு: கடந்த 2018 சட்டசபை தேர்தலின் போது மத்திய பிரதேசத்தில் காங்கிரஸ் கட்சி 118 இடங்களிலும், பாஜக 106 இடங்களிலும் வெல்லும் எனக் கணித்திருந்தது ஏபிபி - சி வோட்டர் சர்வே. தேர்தல் ரிசல்ட் இதற்கு மிகவும் நெருக்கமாகவே வந்திருந்தது. காங்கிரஸ் 114, பாஜக 109 இடங்களைப் பிடித்திருந்தது குறிப்பிடத்தக்கது.

230 சீட்கள் உள்ள மத்திய பிரதேசத்தில், காங்கிரஸ்- பாஜக இடையே கடும் போட்டி நிலவுவதாக பல்வேறு கணிப்புகள் தெரிவித்தாலும், காங்கிரஸ் முந்தும் என்கிறது ஏபிசி சி வோட்டர் எக்ஸிட் போல் கணிப்பு. கருத்துக்கணிப்புகளிலும் கடுமையான போட்டி நிலவும் மத்திய பிரதேசத்தில், கணிப்புகளை உடைத்து எந்தக் கட்சி பெரும்பான்மை பெறப்போகிறது என்பது டிசம்பர் 3ஆம் தேதி தெரியவரும்.

அடுத்த ஆண்டு ஏப்ரல் - மே மாதங்களில் நடைபெறவுள்ள மக்களவைத் தேர்தலுக்கு சில மாதங்களுக்கு முன்னதாக இந்தத் தேர்தல்கள் நடப்பதால், இந்தத் தேர்தல்கள் முக்கியமானவையாகப் பார்க்கப்படுகின்றன. அதிலும், தற்போது தேர்தல் நடப்பதில் பெரிய மாநிலமான மத்திய பிரதேசத்தின் ரிசல்ட் அனைவராலும் உற்று கவனிக்கப்படுகிறது.

English summary

Uncover the dynamics of Madhya Pradesh Assembly Election 2023 through ABP-C Voter Exit Poll Predictions. Congress appears set for success with 108-120 seats, as BJP aims for 106-118.