நாங்களும் வருவோம்ல: டிக்கெட் சலுகை கோதாவில் குதித்த ஏர் இந்தியா

டெல்லி: தனியார் விமான நிறுவனங்கள் சலுகையில் விலையில் பயண டிக்கெட்டுகளை அளித்து வருகையில் தேசிய நிறுவனமான ஏர் இந்தியாவும் உள்நாட்டு சேவைக்கான விமான டிக்கெட்டுகளை ரூ.1,777ல் இருந்து விற்பனை செய்கிறது.

தனியார் விமான நிறுவனங்கள் வாடிக்கையாளர்களை கவர குறைந்த விலையில் பயண டிக்கெட்டுகளை அளித்து வருகின்றன. இந்நிலையில் தேசிய நிறுவனமான ஏர் இந்தியாவும் இந்த சலுகை கோதாவில் குதித்துள்ளது.

உள்நாட்டு சேவையில் 66 இடங்களுக்கான விமான டிக்கெட் விலைகள் ரூ.1,777ல் இருந்து துவங்குவதாக ஏர் இந்தியா அறிவித்துள்ளது. ஜூன் 10ம் தேதி முதல் 12ம் தேதி வரை ஏர் இந்தியா டிக்கெட்டுகள் சலுகை விலையில் கிடைக்கும். சலுகை விலையில் வாங்கப்படும் டிக்கெட்டுகளை ஜூலை 1ம் தேதி முதல் செப்டம்பர் மாதம் 30ம் தேதி வரை பயன்படுத்தலாம்.

டிக்கெட்டுகளை www.airindia.in இணையதளம், ஏர் இந்தியாவின் கட்டணமில்லா எண் 1800 180 1407 அல்லது அங்கீகரிக்கப்பட்ட டிராவல் ஏஜெண்டுகள் மூலமாக வாங்கலாம்.

விமான பயன்பாட்டை அதிகரிக்க பல விமான நிறுவனங்கள் இந்த ஆண்டு சலுகை விலையில் டிக்கெட்டுகளை விற்று வருகின்றன. கடந்த ஆண்டு ஜனவரி முதல் ஏப்ரல் மாதம் வரை உள்நாட்டு விமானங்களில் 207 லட்சம் பேர் பயணம் செய்தனர். அந்த எண்ணிக்கை இந்த ஆண்டு 251.05 லட்சமாக அதிகரித்துள்ளது.

English summary

Inorder to promote airline traffic, Air India has introduced a promotional scheme according to which fares start from Rs.1,777 on its domestic network.