ஹைதராபாத்தில் ஏர் ஹோஸ்டஸை பலாத்காரம் செய்ய முயன்று தாக்கிய கேப் டிரைவர்
ஹைதராபாத்: ஹைதராபாத்தில் 24 வயது விமான பணிப்பெண்ணை கேப் டிரைவர் ஒருவர் பாலியல் பலாத்காரம் செய்ய முயன்று தாக்கியுள்ளார்.
ஹைதராபாத்தில் உள்ள அபார்ட்மென்ட் ஒன்றில் வசித்து வரும் 24 வயது விமான பணிப்பெண் செவ்வாய்க்கிழமை அதிகாலை மருந்து வாங்க கடைக்கு கிளம்பியுள்ளார். தனது வீட்டிற்கு அருகே மருந்து கடைகள் எதுவும் திறந்திருக்காததால் அவர் அங்கு நின்று கொண்டிருந்த கேப் டிரைவர் இம்ரானிடம் கடைக்கு செல்ல வேண்டும் என்று கூறியுள்ளார்.
இம்ரான் அந்த பெண்ணை தனது கேபில் ஏற்றிக் கொண்டு கடைக்கு செல்வதற்கு பதில் ஆள் நடமாட்டம் இல்லாத இடத்திற்கு சென்றுள்ளார். அவுட்டர் ரிங் ரோடு அருகே சென்றதும் இம்ரான் அந்த பெண்ணை பாலியல் பலாத்காரம் செய்ய முயன்றார்.
அந்த பெண் இம்ரானிடம் இருந்து தப்ப முயன்றார். உடனே இம்ரான் அந்த பெண்ணின் செல்போனை பறித்துக் கொண்டு அவரை தாக்கினார். பின்னர் ஆளில்லா இடத்தில் அந்த பெண்ணை விட்டுவிட்டு தப்பியோடிவிட்டார்.
இந்த சம்பவம் குறித்து வழக்குப்பதிவு செய்த போலீசார் இம்ரானை பிடிக்க 6 தனிப்படைகள் அமைத்துள்ளனர்.