முதல்முறையாக போக்கோ ஹரம் வீடியோவில் ஐஎஸ்ஐஎஸ் தலைவர் அல் பாக்தாதி

அபுஜா: ஆப்பிரிக்க நாடுகளில் அட்டூழியம் செய்து வரும் போக்கோ ஹரம் தீவிரவாதிகள் வெளியிட்டுள்ள வீடியோவில் முதல்முறையாக ஐ.எஸ்.ஐ.எஸ். அமைப்பின் தலைவர் அல் பாக்தாதியை காண்பித்துள்ளனர்.

வடகிழக்கு நைஜீரியாவைச் சேர்ந்த போக்கோ ஹரம் தீவிரவாத அமைப்பு அங்கு அட்டூழியம் செய்து வருகிறது. அந்த அமைப்பினர் இதுவரை 5 ஆயிரத்திற்கும் மேற்பட்ட பொதுமக்களை கொலை செய்துள்ளனர். அவர்கள் பெண்கள், சிறுமிகளை கடத்திச் சென்றுள்ளனர்.

போக்கோ ஹரம் தீவிரவாதிகள் நைஜீரியாவின் மத்திய, மத்திய வடக்கு, வடகிழக்கு ஆகிய பகுதிகளில் தாக்குதல் நடத்தி வருகின்றனர். அவர்களுக்கு அஞ்சி இதுவரை 1.5 மில்லியன் பேர் வீடுகளை விட்டு வெளியேறியுள்ளனர்.

இந்நிலையில் போக்கோ ஹரம் வீடியோ ஒன்றை வெளியிட்டுள்ளது. அந்த வீடியோவில் முதன்முறையாக ஐ.எஸ்.ஐ.எஸ். அமைப்பின் தலைவர் அல்பாக்தாதியை காண்பித்துள்ளனர். தீவிரவாதிகள் நைஜீரியாவின் யோப் மாநிலத்தில் உள்ள தமாதாரு பகுதியை தாக்கியதும் வீடியோவில் காண்பிக்கப்பட்டுள்ளது.

உலகின் பணக்கார மற்றும் சக்தி வாய்ந்த தீவிரவாத அமைப்பு ஐ.எஸ்.ஐ.எஸ். தான் என்பது குறிப்பிடத்தக்கது.

English summary

ISIS chief Al Baghdadi is shown for the first time in Boko Haram video.