பாஸ்.. அந்தப் பக்கம் போகாதீங்க.. அம்மாவும், மகளும் அடிச்சிக்குறாங்க!

டெல்லி: அப்னா தள் கட்சியில் இருந்து நீக்கப்பட்ட மகள் அனுப்பிரியாவுக்கு மத்திய அமைச்சர் பதவி கொடுக்கப்பட்டதற்கு அவரது தாயாரும் அப்னா தள் கட்சித் தலைவருமான கிருஷ்ணா கடும் எதிர்ப்புத் தெரிவித்துள்ளார். அத்துடன் பாரதிய ஜனதாவுடனான கூட்டணியை முறித்துக் கொள்வதாகவும் அப்னா தள் அறிவித்துள்ளது.

பிரதமர் மோடி தலைமையிலான அமைச்சரவை அண்மையில் விரிவாக்கம் செய்யப்பட்டது. இதில் 35 வயதான அனுப்பிரியா படேல் அமைச்சராக இடம்பெற்றார். தற்போது அனுப்பிரியா அமைச்சராக்கப்பட்டது பாஜகவுக்கு தலைவலியாக உருவெடுத்துள்ளது.

உத்தரப்பிரதேசத்தில் தலித் தலைவரான பகுஜன் சமாஜ் கட்சியின் நிறுவனரான கன்சிராமின் வலதுகரமாக இருந்தவர் குர்மி எனும் பிற்படுத்தப்பட்ட சமூகத்தைச் சேர்ந்த சோன்லால் பட்டேல். ஆனால் 1995-ல் கன்சிராம் தமக்கு அடுத்து மாயாவதியை முன்னிறுத்த தொடங்கிய போதே பகுஜன் சமாஜ் கட்சியில் இருந்து வெளியே அப்னா தள் கட்சியை உருவாக்கினார் சோன்லால் பட்டேல்.

குர்மி சமூகத்தில் செல்வாக்குடன் இருந்து வருகிறது அப்னா தள் கட்சி. 2009-ல் சோன்லால் பட்டேல் மறைவைத் தொடர்ந்து அவரது மனைவி கிருஷ்ணா அப்னாதள் கட்சித் தலைவரானார். கடந்த லோக்சபா தேர்தலில் பாஜக தலைமையிலான தேசிய ஜனநாயகக் கூட்டணியில் அப்னா தள் இடம்பெற்று 2 இடங்களில் போட்டியிட்டது. போட்டியிட்ட 2 இடங்களிலும் அப்னா தள் வென்றது. இதில் அக்கட்சி பொதுச்செயலரான அனுப்பிரியாவும் ஒருவர்.

இதனைத் தொடர்ந்து அனுப்பிரியா தம்முடைய எம்.எல்.ஏ. பதவியை ராஜினாமா செய்தார். தாம் ராஜினாமா செய்ததால் நடைபெறும் இடைத்தேர்தலில் கணவர்தான் வேட்பாளராக போட்டியிட வேண்டும் என அனுப்பிரியா விரும்பினார். ஆனால் தானே போட்டியிடுவேன் என அவரது தாயார் கிருஷ்ணா அடம்பிடித்தார். இதனால் அப்னாதள் இரண்டாக உடைந்தது. அனுப்பிரியாவும் அவரது ஆதரவாளர்களும் கடந்த மே மாதம் கட்சியில் இருந்து நீக்கப்பட்டனர்.

இந்த நிலையில்தான் மத்திய அமைச்சரவையில் அனுப்பிரியாவுக்கு இடம் கொடுக்கப்பட்டது. இதை அவரது தாயாரும் அப்னாதள் தலைவருமான கிருஷ்ணா கடுமையாக எதிர்த்து வருகிறார். அத்துடன் பாஜக தலைமையிலான தேசிய ஜனநாயகக் கூட்டணியில் இருந்து விலகவும் அப்னா தள் முடிவு செய்துள்ளது.

இதனால் அனுப்பிரியாவை தலைவராக கொண்ட புதிய கட்சி ஒன்றை உருவாக்கி அதனுடன் தேர்தல் உடன்பாடு வைத்து உத்தரப்பிரதேச சட்டசபை தேர்தலை எதிர்கொள்ள பாஜக திட்டமிட்டு வருகிறது.

English summary

Apna Dal, led by Union Minister Anupriya Patel's mother Krishna Patel, on Thursday snapped ties with BJP accusing the latter of not following the decorum of alliance.