பாஜகவின் முதல் வேட்பாளர் பட்டியல் ஜனவரி இறுதியில் வெளியீடு!
டெல்லி: லோக்சபா தேர்தலுக்கான பாரதிய ஜனதா கட்சியின் முதல் வேட்பாளர் பட்டியல் அடுத்த மாதம் இறுதியில் வெளியிடப்பட இருக்கிறது.
லோக்சபா தேர்தல் அட்டவணை வரும் மார்ச் மாதம் அறிவிக்கப்பட உள்ளது. இதையடுத்து தேர்தலை சந்திக்க எல்லா கட்சிகளும் தயாராகி விட்டன. காங்கிரஸ் கட்சியின் காரியக் கமிட்டி கூட்டம் அடுத்த மாதம் 17-ந் தேதி டெல்லியில் நடைபெற உள்ளது. அதில் தேர்தல் வியூகம் இறுதி செய்யப்பட உள்ளது.
பா.ஜ.க. மூத்த தலைவர்கள் ஏற்கனவே பிரசாரத்தை தொடங்கி விட்டனர். அவர்கள் அடுத்தக் கட்ட பணிகளில் தீவிரம் காட்ட தொடங்கியுள்ளனர். கடந்த 3 நாட்களாக டெல்லியில் மாநில பா.ஜ.க. தலைவர்களின் ஆலோசனை கூட்டம் நடந்தது. அதில் வாக்காளர்களை கவரும் வகையில் பூத் கமிட்டிகளை வலுப்படுத்துவதுபற்றி விவாதிக்கப்பட்டது.
அடுத்தக்கட்டமாக வரும் 24-ந் தேதி பா.ஜ.க.வின் பிரசாரக்குழு கூட்டம் நடைபெற உள்ளது. அதில் பா.ஜ.க.வின் பிரசார வியூகத்துக்கு இறுதி வடிவம் கொடுக்கப்பட உள்ளது.
இதையடுத்து அடுத்த மாதம் 17-ந் தேதி பா.ஜ.க. செயற்குழு கூடுகிறது. அடுத்தடுத்த நாட்களில் பா.ஜ.க. தேசியக்குழு கூட்டம் நடைபெற உள்ளது.
அந்த கூட்டங்களில் பா.ஜ.க. வேட்பாளர்கள் தேர்வு பற்றி ஆலோசிக்கப்படுகிறது. இதற்காக எல்லா மாநில தலைவர்களிடமும் வேட்பாளர்கள் பெயர், அவர்களது தகுதி, திறமை பற்றிய விவரங்களை உரிய பரிந்துரையுடன் தருமாறு பா.ஜ.க. தேசிய தலைவர் ராஜ்நாத்சிங் கேட்டுக் கொண்டுள்ளார்.
பா.ஜ.க. தேசிய குழுவில் வேட்பாளர்கள் தேர்வு ஆய்வு செய்யப்படும். அதன் அடிப்படையில் தேர்தலில் போட்டியிடும் பா.ஜ.க. வேட்பாளர்களின் முதல் பட்டியல் வெளியிடப்படும். ஜனவரி மாத இறுதியில் அந்த வேட்பாளர் பட்டியல் வெளியாகும் என்று எதிர்பார்க்கப்படுகிறது.
Click it and Unblock the Notifications
Sign in with Google