போலீஸ் ஸ்டேஷனில் பிறந்தநாள் கொண்டாடிய பாஜக தலைவர்.. “காவல் நிலையமா? கட்சி ஆபீஸா?” காங்கிரஸ் கொதிப்பு

அகமதாபாத்: குஜராத் மாநிலத்தில், காவல் நிலையத்தில் பாஜக தலைவரின் பிறந்தநாள் கொண்டாடப்பட்டதாக வீடியோ வெளியிட்டு கடுமையாக விமர்சித்தது காங்கிரஸ் கட்சி. ஆனால், இதனை அகமதாபாத் போலீசார் மறுத்துள்ளனர்.

குஜராத் மாநிலத்தில் பூபேந்திர படேல் தலைமையிலான பாஜக ஆட்சி நடைபெற்று வருகிறது. கடந்த 26 ஆண்டு காலமாகவே அங்கு தொடர்ந்து பாஜக ஆட்சியில் இருந்து வருகிறது. இந்நிலையில், அகமதாபாத்தில் உள்ள காவல் நிலையத்தில், பாஜக தலைவர் ஒருவரின் பிறந்தநாளை போலீசார் சேர்ந்து கொண்டாடிய சம்பவம் சர்ச்சையை ஏற்படுத்தி உள்ளது.

பாஜகவை சேர்ந்த முக்கிய தலைவர் ஹிமான்ஷு சௌகான் தனது பிறந்தநாளை குஜராத்தின், அகமதாபாத்தில் அமைந்துள்ள காவல் நிலையத்தில் கேக் வெட்டி கொண்டாடி உள்ளார். அப்போது போலீஸ் அதிகாரிகளும் உடன் இருக்கின்றனர். இது தொடர்பான வீடியோ தற்போது, சமூக வலைதளத்தில் பரவி வருகிறது. இந்த வீடியோவை பகிர்ந்து குஜராத் மாநில காங்கிரஸ் கட்சி விமர்சித்துள்ளது.

அந்த வீடியோவில் டிசிபி கனன் தேசாய் உள்ளிட்ட போலீசார் அதிகாரிகள் உள்ளனர். பாஜகவை சேர்ந்த ஹிமான்ஷு சௌகான் கேக் வெட்ட, போலீசார் உள்ளிட்ட அனைவரும் பிறந்தநாள் வாழ்த்து பாடலை பாடி, கேக் ஊட்டிவிட்டு கொண்டாடி உள்ளனர். பிறந்தநாள் வாழ்த்து பாடலின் இறுதியில் அவர்கள் 'பாரத் மாதா கி ஜெய்' என்றும் கூறுகின்றனர்.

இந்த வீடியோவை பகிர்ந்த குஜராத் காங்கிரஸ் கட்சி, "காவல்துறையினர் பாஜக தலைமையிடம் இருந்து சம்பளம் பெறுவதுபோல் காவல் நிலையத்தையே பாஜக அலுவலகம் போல் மாற்றிவிட்டனர். பாஜக தலைவரின் பிறந்தநாள் கொண்டாட்டத்துக்காக சிறப்பு ஏற்பாடு செய்யப்பட்டுள்ளது.

ભાજપ ના લાલ માટે પોલીસ નું ખાસ આયોજન

કમલમના પગારદારની જેમ કામ કરતા અધિકારીઓએ #પોલીસ સ્ટેશનને જ કમલમ બનાવી દીધુ.

ભાજપના કાર્યકર્તા અને નેતાઓ માટે જન્મ દિવસની ઉજવણી માટે કમલમ તરફથી ખાસ આયોજન.

ગુજરાતની પ્રજાના ટેક્ષના પૈસાથી ચાલતા પોલીસ સ્ટેશનો કાયદો-વ્યવસ્થા સાચવવા છે કે કમલમના… pic.twitter.com/E8hArljo9I

— Gujarat Congress (@INCGujarat) June 28, 2024

குஜராத் மக்களின் வரிப்பணத்தில் இயங்கும் காவல் நிலையங்கள் சட்டம் ஒழுங்கைப் பாதுகாக்கவா? அல்லது பாஜகவின் கட்சி கூடங்களாக இருக்கவா? இதற்கு குஜராத் மாநில அரசு பதில் வேண்டும்" என்று தேரிவித்துள்ளது.

காவல் நிலையத்தில் இதுபோன்ற கொண்டாட்டங்கள் நடத்துவது மோசமான முன்னுதாரணம் என்று பலர் விமர்சித்துள்ளனர். ஆனால், இது அரசியல் உள்நோக்கம் இல்லாதது. இந்து முஸ்லீம் ஒற்றுமையை வலியுறுத்தி நடைபெற்ற ரத்த தான முகாமின் வெற்றிக்காக எளிமையாக கேக் வெட்டி கொண்டாடப்பட்டது என அகமதாபாத் போலீசார் கூறி உள்ளனர்.

English summary

A video showing BJP leader Himanshu Chauhan celebrating his birthday at police station has caused controversy. Gujarat Congress accusing the police of favouring BJP.