நடிகர் பின்னால் ஓடாமல், சசிகலாவுடன் கூட்டணி வைக்கலாம்.. பாஜகவுக்கு சு.சாமி அட்வைஸ்
டெல்லி: சசிகலா தலைமையிலான அதிமுகவுடன் பாஜக கூட்டணி வைத்துக்கொள்ள வேண்டும் என்று பாஜக ராஜ்யசபா எம்.பி. சுப்பிரமணியன் சுவாமி தெரிவித்துள்ளார்.
தமிழகத்தில் காலூன்ற துடிக்கும் பாஜக அதற்கு ஏற்ப ஒரு முகத்தை தேடி வருகிறது. ரஜினிகாந்த்தான் அவர்களின் கொள்கைகளுக்கு ஏற்றவர் என பாஜக தலைமை நினைக்கிறது.
ரஜினிகாந்த்தும் அரசியல் ஆசையில் இருப்பதாக தகவல்கள் வெளியாகிவருகின்றன. ஆனால் அவர் ப.சிதம்பரம் உள்ளிட்ட காங்கிரஸ் தலைவர்களோடும் நெருக்கமானவர். எனவே தனிக்கட்சி தொடங்குவதுதான் அனைத்து மத ரசிகர்களையும் இணைக்க உதவும் என நினைக்கிறாராம். ஆனால் பாஜகவோ விடுவதாக இல்லை. ஆசை வார்த்தை கூறி அவரது பின்னால் தூதுவிட்டு வருகிறதாம்.
Even now I say that in TN rather than chasing cinema stars the BJP should invite ADMK of Sasikala join the NDA
— Subramanian Swamy (@Swamy39) May 24, 2017
இந்த நிலையில், சுப்பிரமணியன் சாமி இன்று வெளியிட்ட டிவிட்டில், "இப்போதும் நான் கூறுகிறேன், தமிழகத்தில் சினிமா ஸ்டார்கள் பின்னால் ஓடுவதை தவிர்த்து, சசிகலா தலைமையிலான அதிமுகவை தேசிய ஜனநாயக கூட்டணியில் இணைக்க பாஜக முயல வேண்டும்" என கூறியுள்ளார்.
ஆரம்பத்தில் சசிக்கு ஆதரவாக கருத்துக்கள் தெரிவித்து வந்த சுப்பிரமணியன் சாமி சில காலம் கருத்து தெரிவிக்காமல் இருந்தார். இந்த நிலையில், இப்போது மீண்டும் சசி ஆதரவு கருத்தை வெளியிட்டுள்ளார்.