'உனோ வெர்கோக்னா பெர் லா நஸியோன்'... உம்மன் சாண்டியை இத்தாலி மொழியில் திட்டிய சிபிஎம்!
திருவனந்தபுரம்: கேரளாவை உலுக்கிய சூரிய சக்தி ஊழல் உள்ளிட்டவற்றைக் கண்டிக்கும் வகையில், முதல்வர் உம்மன் சாண்டியை, இத்தாலி மொழியில் கண்டனம் செய்து போஸ்டர் ஒட்டி காங்கிரஸ் கட்சிக்கு டென்ஷனைக் கொடுத்துள்ளது மார்க்சிஸ்ட் கம்யூனிஸ்ட் கட்சி.
கேரளாவில் உள்ள மார்க்சிஸ்ட் கம்யூனிஸ்ட் கட்சியின் தலைமை அலுவலகத்திற்கு அருகே இந்த போஸ்டரை ஒட்டினர் அக்கட்சியினர்.
அந்த போஸ்டரில் உனா வெர்கோக்னா பெர் லா நஸியோன் என்ற வாசகம் இடம் பெற்றிருந்தது. இதை சுருக்கமாக மொழி பெயர்த்தால் நாட்டுக்கு அவமானம் என்று பொருள் வருமாம்.
கேரளாவை உலுக்கிய சூரிய சக்தி பேனல் ஊழல் விவகாரத்தில் முதல்வர் சாண்டியின் செயல்பாடுகளைக் கண்டிக்கும் வகையிலும், காங்கிரஸ் தலைவர் சோனியா காந்தி சாண்டி விவகாரத்தில் பாராமுகமாக இருப்பதைக் கண்டிக்கும் வகையிலும் இத்தாலி மொழியில் போஸ்டர் போட்டு கலக்கியுள்ளனர் மார்க்சிஸ்ட் கம்யூனிஸ்ட் கட்சியினர்.
ஆனால் இந்த போஸ்டர்கள் ஒட்டப்பட்ட சில மணி நேரங்களில் அவற்றை போலீஸார் வந்து கிழித்து கையோடு அள்ளிக் கொண்டு போய் விட்டனர்.
Click it and Unblock the Notifications
Sign in with Google