சியாச்சன் மலைச் சிகரம் முதல் தென் சீனக் கடல் வரை.. யோகா செய்த இந்திய ராணுவ, கடற்படை வீரர்கள்

டெல்லி: பனிச் சிகரமான சியாச்சன் முதல் தென் சீனக் கடல் வரை உலகின் பல பகுதிகளில் நிலை கொண்டுள்ள இந்திய ராணுவ, கடற்படை வீரர்கள் இன்று சர்வதேச யோகா தினத்தில் பங்கேற்று யோகா செய்தனர்.

இந்தியக் கடற்படையினர் போர்க் கப்பல்களில் யோகாசனம் செய்து அனைவரையும் கவர்ந்தனர். உலகின் மிக உயர்ந்த போர்க்களம் என வர்ணிக்கப்படும் சியாச்சின் பனிச் சிகரத்திலும் இந்திய ராணுவத்தினர் யோகா செய்து உலகின் கவனத்தை ஈர்த்தனர்.

ராணுவத் தலைமைத் தளபதி தல்பீர் சிங் சுஹாக், விமானப்படைத் தலைமைத் தளபதி அரூப் ரஹா, கடற்படைத் தலைமைத் தளபதி ஆர்.கே.தோவன் ஆகியோர் ராஜ்பா்தில் நடந்த பிரதமர் தலைமையிலான யோகா நிகழ்ச்சியில் கலந்து கொண்டனர்.

பாதுகாப்புத் துறை அமைச்சர் மனோகர் பாரிக்கர் மீரட்டில் நடந்த நிகழ்ச்சியில் யோகா செய்தார்.

சியாச்சின் மலைச் சிகரமானது பூமியிலிருந்து 18,800 அடி உயரத்தில் உள்ளது. அங்கு சிறப்பு உடை அணிந்து ராணுவத்தினர் யோகா செய்தனர்.

காலை 7 மணிக்கு இந்த நிகழ்ச்சி நடைபெற்றது. அப்போது வெப்ப நிலை மைனஸ் 4 டிகிரி செல்சியஸ் ஆகும். இதேபோல கார்கில், லடாக் போன்ற பகுதிகளிலும் ராணுவத்தினர் யோகா செய்தனர்.

தென் சீனக் கடலில் நிலை கொண்டுள்ள இந்தியக் கடற்படையினர் தங்களது கப்பல்களிலேயே யோகா செய்தனர்.

தென் சீனக் கடல் பிராந்தியத்தில் ஐஎன்எஸ் ரன்வீர், சத்புரா, கமோர்தா, சக்தி ஆகிய கப்பல்கள் உள்ளன. அதில் உள்ள இந்திய வீரர்கள் கப்பல்களின் மேல்தளத்தில் யோகா செய்தனர்.

மேலும் இந்திய விமானப்படையும், யோகா தினத்தைக் கொண்டாடியது. பல விமானப்படைத் தளங்களில் விமானப்படை வீரர்களும், குடும்பத்தினரும் இதில் கலந்து கொண்டனர்.

மொத்தம் 191 நாடுகளில் இன்று யோகா தினம் கொண்டாடப்பட்டது. இந்தியாவில் ராஜ்பாத்தில் நடந்த யோகாசன பயிற்சி கின்னஸ் சாதனை படைத்து விட்டது குறிப்பிடத்தக்கது.

English summary

From ice-capped Siachen, the highest battlefield in the world, to the warships in the contentious South China Sea, Indian armed forces today joined the International Yoga Day celebrations.