இந்தியாவில் 277 போலி இன்ஜினீயரிங் காலேஜ்கள்.. தமிழகத்தில் மட்டும் 11.. ஷாக் பட்டியல்!

இந்தியாவில் மொத்தம் 277 போலி பொறியியல் கல்லூரிகள் இருப்பதாக மத்திய அமைச்சர் தெரிவித்துள்ளார்.

டெல்லி: இந்தியாவில் 277 போலி பொறியியல் கல்லூரிகள் மற்றும் 24 போலி பல்கலைக்கழகங்கள் உள்ளதாக மத்திய அமைச்சர் சத்யா பால் சிங் தெரிவித்துள்ளார். இதில், தமிழகத்தில் 11 போலி பொறியியல் கல்லூரிகள் உள்ளன.

மக்களவையில் இந்தியாவில் உள்ள போலி பொறியியல் கல்லூரிகள் குறித்து அதிமுக எம்பி நாகராஜன் மற்றும் பாஜக எம்.பிக்கள் லக்‌ஷ்மண் கிலுவா மற்றும் ரமாதேவி ஆகியோர் கேள்வி எழுப்பினர்.

இதற்கு பதிலளிக்கும் விதமாக மத்திய மனிதவள மேம்பாட்டுத் துறை அமைச்சர் சத்யா பால் சிங் பொறியியல் மற்றும் தொழில்நுட்ப படிப்புகளை வழங்கும் 277 போலி கல்லூரிகள் பட்டியல் ஒன்றை வெளியிட்டார்.

அதில், 66 போலி பொறியியல் கல்லூரிகளுடன் டெல்லி முதலிடத்திலும், 35 போலி பொறியியல் கல்லூரிகளுடன் தெலுங்கானா இரண்டாவது இடத்திலும் உள்ளது. மேற்கு வங்காளம் 27 போலி பொறியியல் கல்லூரிகளுடன் 3 வது இடத்தில் உள்ளது.

இதேபோல், கர்நாடகாவில் 23 போலி பொறியியல் கல்லூரிகளும், உத்தரபிரதேசத்தில் 22 போலி கல்லூரிகளும், அரியானாவில் 18 போலி கல்லூரிகளும் இருப்பதாக அந்த அறிக்கையில் தெரிவிக்கப்பட்டுள்ளது.

இந்தப் பட்டியலில் தமிழகத்தில் 11 போலி பொறியியல் கல்லூரிகள் இருப்பதாக தெரிவிக்கப்பட்டுள்ளது.

அதுபோல் பல்கலைக்கழக மானிய ஆணைக்குழு (UGC) அதன் வலைத்தளத்தில் 24 போலி பல்கலைக் கழகங்களின் பட்டியலை வெளியிட்டு உள்ளது குறித்தும் அமைச்சர் சுட்டி காட்டினார். இதிலும் அதிக போலி பல்கலைக்கழகங்களுடன் டெல்லியே முதலிடத்தில் உள்ளது குறிப்பிடத்தக்கது.

English summary

According to a document tabled in the Lok Sabha by Minister of State Human Resource Development, Satya Pal Singh, apart from the national capital, Telangana has 35 and West Bengal has an 27 such fake technical institutes.