(வசுந்தர) ராஜே தர்மா அல்ல ராஜ்ய தர்மாவை பின்பற்றுங்கள்: மோடிக்கு காங்கிரஸ் அறிவுரை
டெல்லி: பிரதமர் மோடி ராஜ்ய தர்மாவுக்கு பதிலாக ராஜே தர்மாவை பின்பற்றுகிறார் என்று காங்கிரஸ் கட்சி தெரிவித்துள்ளது.
பிரதமர் நரேந்திர மோடியை பெரிய மோடி என்றும், ஐபிஎல் முன்னாள் தலைவர் லலித் மோடியை சின்ன மோடி என்றும் காங்கிரஸ் விமர்சித்துள்ளது. இந்நிலையில் லலித் மோடி விவகாரம் குறித்து காங்கிரஸ் செய்தித் தொடர்பாளர் அஜோய் குமார் கூறுகையில்,
பிரதமர் ராஜ்ய தர்மாவை பின்பற்ற வேண்டும். ராஜே தர்மாவையோ, லலித் தர்மாவையோ பின்பற்றக் கூடாது. லலித் மோடிக்கு உதவி செய்த மத்திய வெளியுறவுத் துறை அமைச்சர் சுஷ்மா ஸ்வராஜ் மற்றும் ராஜஸ்தான் முதல்வர் வசுந்தரா ராஜேவை பாஜக பதவி நீக்கம் செய்யாமல் உள்ளது.
லோக்சபா தேர்தலின்போது வெளிநாட்டு வங்கிகளில் பதுக்கி வைக்கப்பட்டுள்ள கருப்பு பணத்தை மீட்பதாக மோடி வாக்குறுதி அளித்தார். ஆனால் அவர் தனது வாக்குறுதியை நிறைவேற்றவில்லை. அவரின் இந்த செயல் அதிருப்தி அளிப்பதாக உள்ளது.
கருப்பு பணம் வைத்திருப்பவர்கள் மீது நடவடிக்கை எடுக்காமல் அவர்களுக்கு மோடி பாதுகாப்பாக உள்ளார். லலித் மோடிக்கு உதவியதன் மூலம் ராஜே தேசத்திற்கு எதிரான செயலை செய்துள்ளார் என்றார்.